મહાસુભાષિતસંગ્રહ · શ્લોક 0341-0360

અચકમત સપલ્લવાં ધરિત્રીં મૃદુસુરભિં વિરહય્ય પુષ્પશય્યામ્ ।
ભૃશમરતિમવાપ્ય તત્ર ચાસ્યાસ્ તવ સુખશીતમુપૈતુમઙ્કમિચ્છા ॥

અચઞ્ચલં મુગ્ધમુદઞ્ચિતં દૃશોર્ અનુન્નતં શ્રીમદુરો મૃગીદૃશઃ ।
અભઙ્ગુરાકૂતવતી ગતિર્ભ્રુવોર્ અબદ્ધલક્ષ્યં ક્વચિદુત્કમાન્તરમ્ ॥

અચતુર્વદનો બ્રહ્મા દ્વિબાહુરપરો હરિઃ ।
અભાલલોચનઃ શંભુર્ ભગવાન્ બાદરાયણઃ ॥

અચલં ચલદિવ ચક્ષુઃ પ્રકૃતમપીદં સમુદ્યદિવ વક્ષઃ ।
અતદિવ તદપિ શરીરં સંપ્રતિ વામભ્રુવો જયતિ ॥

અચલા કમલા કસ્ય કસ્ય મિત્રં મહીપતિઃ ।
શરીરં ચ સ્થિરં કસ્ય કસ્ય વશ્યા વરાઙ્ગના ॥

અચલા કમલા હિ કસ્ય કસ્ય ક્ષિતિપાલઃ કિલ મિત્રમસ્તિ લોકે ।
ઇહ વશ્યતમા ચ કસ્ય વેશ્યા સ્થિરમપ્યસ્તિ ચ કસ્ય દેહમત્ર ॥

અચિન્તનીયા વિધિવઞ્ચનેયં યદમ્બુજાક્ષી સ્થવિરસ્ય ભર્તુઃ ।
સ્વયં સમાદાય કરં નિધાય વક્ષોજયુગ્મે સ્વપિતિ શ્વસન્તી ॥

અચિન્તિતાનિ દુઃખાનિ યથૈવાયાન્તિ દેહિનામ્ ।
સુખાન્યપિ તથા મન્યે દૈવમત્રાતિરિચ્યતે ॥

અચિન્ત્યમતિદુઃસહં ત્રિવિધદુઃખમેનોઽર્જિતં ચતુર્વિધગતિશ્રિતં ભવભૃતા ન કિં પ્રાપ્યતે ।
શરીરમસુખાકરં જગતિ ગૃહ્ણતા મુઞ્ચતા તનોતિ ન તથાપ્યયં વિરતિમૂર્જિતાં પાપતઃ ॥

અચિન્ત્યાઃ પન્થાનઃ કિમપિ મહતામન્ધકરિપોર્ યદક્ષ્ણોઽભૂત્ તેજસ્તદકૃત કથાશેષમદનમ્ ।
મુનેર્નેત્રાદત્રેર્યદજનિ પુનર્જ્યોતિરહહ પ્રતેને તેનેદં મદનમયમેવ ત્રિભુવનમ્ ॥

અચિરાત્ પરાત્મનિષ્ઠા ભવતિ યતસ્તત્ક્રિયેત ચતુરેણ ક્લેશેન્ કામદમનં ધિગેકદારઞ્જયન્તમાત્માનમ્ ॥

અચિરાદુપકર્તુરાચરેદ્ અથ વાત્મૌપયિકીમુપક્રિયામ્ ।
પૃથુરિત્થમથાણુરસ્તુ સા ન વિશેષે વિદુષામિહ ગ્રહઃ ॥

અચિરાધિષ્ઠિતરાજ્યઃ શત્રુઃ પ્રકૃતિષ્વરૂઢમૂલત્વાત્ ।
નવસંરોપણશિથિલસ્ તરુરિવ સુકરઃ સમુદ્ધર્તુમ્ ॥

અચિરેણ પરસ્ય ભૂયસોં વિપરીતાં વિગણય્ય ચાત્મનઃ ।
ક્ષયયુક્તિમુપેક્ષતે કૃતી કુરુતે તત્પ્રતિકારમન્યથા ॥

અચિરેણ રોચતે મે દિવસાનેવં વૃથાતિવાહયતે ।
શ્રિતકૃષ્ણપક્ષગતયે વયસ્ય કામ્યસ્તનીવિરહઃ ॥

અચુમ્બિ યા ચન્દનબિન્દુમણ્ડલી નલીયવક્ત્રેણ સરોજતર્જિના ।
શ્રિયં શ્રિતા કાચન તારકાસખી કૃતાશશાઙ્કસ્ય તયાઙ્કવર્તિની ॥

અચેતના અપિ પ્રાયો મૈત્રીમેવાનુબધ્યતે ।
સ્વવૃદ્ધાત્ ક્ષીયતે ક્ષીરાત્ ક્ષીરાત્ પ્રાગેવ વારિણા ॥

અચેષ્ટમાનમાસીનં શ્રીઃ કંચિદુપતિષ્ઠતિ ।
કશ્ચિત્ કર્માણિ કુર્વન્ હિ ન પ્રાપ્યમધિગચ્છતિ ॥

અચોદ્યમાનાનિ યથા પુષ્પાણિ ચ ફલાનિ ચ ।
સ્વકાલં નાતિવર્તન્તે તથા કર્મ પુરાકૃતમ્ ॥

અચ્છપ્રકાશવતિ ચન્દ્રમસિ પ્રિયેઽસ્મિન્ન્ આહ્લાદકારિણિ સુધાવતિ પૂર્ણબિમ્બે ।
ધાતા વિચિન્ત્ય મનસાખિલદૃષ્ટિપાતં હર્તું ચકાર કિમુ કજ્જલબિન્દુયોગમ્ ॥