મહાસુભાષિતસંગ્રહ · શ્લોક 0261-0280

અઙ્કોલ્લક્વથિતં સ્વિન્નં નૃમાંસં છાગદુગ્ધયુક્ ।
પિણ્યાકસહિતં મૂલે સહકારસ્ય નિક્ષિપેત્ ॥

અઙ્કોલ્લતૈલભાવિતમ્ ઉષિતં ગોશકૃતિ કુમુદકન્દમલમ્ ।
કરકામ્બુકર્દમભૃતે કલશે કુસુમં સમુદ્વહતિ ॥

અઙ્કોલ્લતૈલસૂકર- શિશુમારવસાસુ ભાવિતં બીજમ્ ।
સદ્યો રોહતિ નિહિતં ભૂમૌ કરકામ્ભસા સિક્તમ્ ॥

અઙ્કોલ્લપત્રધપેન યદ્વા કેશસમન્વિતૈઃ ।
સક્તુભિઃ કટુતૈલાક્તૈર્ યાતિ મત્સ્યવિષં ક્ષયમ્ ॥

અઙ્કોલ્લબીજમજ્જાનાં સૂક્ષ્મચૂર્ણં વિધીયતે ।
તિલતૈલેન તચ્ચૂર્ણં સમ્યક્કૃત્વા ચ ભાવયેત્ ॥

અઙ્ગં ગલિતં પલિતં મુણ્ડં દન્તવિહીનં જાતં તુણ્ડમ્ ।
કરધૃતકમ્પિતશોભિતદણ્ડં તદપિ ન મુઞ્ચત્યાશા પિણ્ડમ્ ॥

અઙ્ગં ચન્દનપઙ્કપઙ્કજબિસચ્છેદાવલીનં મુહુસ્ તાપઃ શાપ ઇવૈષ શોષણપટુઃ કમ્પઃ સખીકમ્પનઃ ।
શ્વાસાઃ સંવૃતતારહારરુચયઃ સંભિન્નચીનાંશુકા જાતઃ પ્રાગતિદાહવેદનમહારમ્ભઃ સ તસ્યા જ્વરઃ ॥

અઙ્ગં ચન્દનપાણ્ડુ પલ્લવમૃદુસ્તામ્બૂલતામ્રોઽવરો ધારાયન્ત્રજલાભિષેકકલુષે ધૌતાઞ્જને લોચને ।
અન્તઃપુષ્પસુગન્ધિરાર્દ્રકબરી સ્વચ્છં તનીયોઽમ્બરં કાન્તાનાં કમનીયતાં બિદધતે ગ્રીષ્મેઽપરાહ્ણગમે ॥

અઙ્ગં દક્ષિણમારુહ્ય વામેનોત્તરતિ સ્ફુટમ્ ।
તદા હાનિકરી જ્ઞેયા વ્યત્યયેન તુ લાભદા ॥

અઙ્ગં દમનપત્ત્રાભમઙ્ગે યસ્મિન્ પ્રતીયતે ।
વિદ્યાદ્દમનવજ્રં તુ તીક્ષ્ણધારં મહાગુણમ્ ॥

અઙ્ગં પ્રતીયતે યત્ર બહુગ્રન્થિસમન્વિતમ્ ।
દુર્લભં તન્મહામૂલ્યં ગ્રન્થિવજ્રકમુચ્યતે ॥

અઙ્ગં ભૂષણનિકરો ભૂષયતીત્યેષ લૌકિકો વાદઃ ।
અઙ્ગાનિ ભૂષણાનાં કામપિ સુષમામજીજનંસ્તસ્યાઃ ॥

અઙ્ગં યેન રથીકૃતં નયનયોર્યુગ્મં રથાઙ્ગીકૃતં પત્રં સ્વં રથકર્મસારત્થિકૃતં શ્વાસસ્તુરંગીકૃતાઃ ।
કોદઽડીકૃતમાત્મવીર્યમચિરાન્મૌર્વીકૃતં ભૂષણં વામાઙ્ગં વિશિખીકૃતં દિશતુ નઃ ક્ષેમં સ ધન્વી પુમાન્ ॥

અઙ્ગણં તદિદમુન્મદદ્વિપ- શ્રેણિશોણિતવિહારિણો હરેઃ ।
ઉલ્લસત્તરુણકેલિપલ્લવાં સલ્લકીં ત્યજતિ કિં મતઙ્ગજઃ ॥

અઙ્ગણવેદિર્વસુધા કુલ્યા જલધિઃ સ્થલી ચ પાતાલમ્ ।
વલ્મીકશ્ચ સુમેરુઃ કૃતપ્રતિજ્ઞસ્ય ધીરસ્ય ॥

અઙ્ગદોષપરિત્યક્તશ્ ચતુર્માર્ગકૃતશ્રમઃ ।
જ્ઞાતા કુલકવાદ્યસ્ય રઞ્જકો વાદકઃ સ્મૃતઃ ॥

અઙ્ગનાનામિવાઙ્ગાનિ ગોપ્યન્તે સ્વગુણા યદા ।
તદા તે સ્પૃહણીયાઃ સ્યુર્ ઇમે હ્યત્યન્તદુર્લભાઃ ॥

અઙ્ગનામઙ્ગનામન્તરે માધવો માધવં માધવં ચાન્તરેણાઙ્ગના ।
ઇત્થમાકલ્પિતે મણ્ડલે મધ્યગઃ સંજગૌ વેણુના દેવકીનન્દનઃ ॥

અઙ્ગન્યાસસ્તતઃ કાર્યઃ શિવોક્તઃ સિદ્ધિમિચ્છતા ।
આચાર્યેણ ચ શિષ્યસ્ય પાપઘ્નો વિઘ્નનાશનઃ ॥

અઙ્ગપ્રત્યઙ્ગજઃ પુત્રો હૃદયાચ્ચાપિ જાયતે ।
તસ્માત્ પ્રિયતરો માતુઃ પ્રિયત્વાન્ન તુ બાન્ધવઃ ॥