મહાસુભાષિતસંગ્રહ · શ્લોક 0181-0200

અગા ગાઙ્ગાઙ્ગકાકાકગાહકાઘકકાકહા ।
અહાહાઙ્ક ખગાઙ્કાગકઙ્કાગખગકાકક ॥

અગાધજલસંચારી વિકારી ન ચ રોહિતઃ ।
ગણ્ડૂષજલમાત્રે તુ શફરી ફર્ફરાયતે ॥

અગાધહૃદયા ભૂપાઃ કૂપા ઇવ દુરાસદાઃ ।
ઘટકા ગુણિનો નો ચેત્ કથં લભ્યેત જીવનમ્ ॥

અગાધેનાપિ કિં તેન તોયેન લવણામ્બુધેઃ ।
જનુમાત્રં વરં વારિ તૃષ્ણાચ્છેદકરં નૃણામ્ ॥

અગારેઽસ્મિન્ કાન્તે ગિરિશમનિશાનાથશકલં ભુજંગાનુત્તુઙ્ગાન્ સકલમપિ વાતાયનપથે ।
નિકુઞ્જેષુ શ્યેનાનધિગૃહશિરો રાહુવલયં લિખન્ત્યા નીયન્તે શિવ શિવ તયા હન્ત દિવસાઃ ॥

અગુણકણો ગુણરાશિર્ દ્વયમપિ દૈવેન ખલમુખે પતિતમ્ ।
પ્રસરતિ તૈલમિવૈકઃ સલિલે ઘૃતવજ્જડત્વમેત્યન્યઃ ॥

અગુરુરિતિ વદતુ લોકો ગૌરવમત્રૈવ પુનરહં મન્યે ।
દર્શિતગુણૈકવૃત્તિર્ યસ્ય જને જનિતદાહેઽપિ ॥

અગુરુસુરભિધૂપાશોભિતં કેશપાશં ગલિતકુસુમમાલં ધુન્વતી કુઞ્ચિતાગ્રમ્ ।
ત્યજતિ ગુરુનિતમ્બા નિમ્નનાભિઃ સુમધ્યાપ્ય્ ઉષસિ શયનવાસઃ કામિની કામશોભા ॥

અગુરોરપિ સત ઉચ્ચૈઃ પ્રશંસનં તદ્ગુણા વિતન્વન્તિ ।
અગુરુર્જ્વલનેઽપ્યસ્તઃ સૌરભમિષતો ગુણાન્ વમતિ ॥

અગૂઢવિભવા યસ્ય પૌરા રાષ્ટ્રવાસિનઃ ।
નયાપનયવેત્તાયઃ સ રાજા રાજસત્તમઃ ॥

અગૂઢહાસસ્ફુટદન્તકેસરં મુખં સ્વિદેતદ્વિકસન્નુ પઙ્કજમ્ ।
ઇતિ પ્રલીનાં નલિનીવને સખીં વિદામ્બભૂવુઃ સુચિરેણ યોષિતઃ ॥

અગ્નિં પ્રાપ્ય યથા સદ્યસ્ તૂલરાશિર્વિનશ્યતિ ।
તથા ગઙ્ગાજલેનૈવ સર્વપાપં વિનશ્યતિ ॥

અગ્નિં સ્તોકમિવાત્માનં સંધુક્ષયતિ યો નરઃ ।
સ વર્ધમાનો ગ્રસતે મહાન્તમપિ સંચયમ્ ॥

અગ્નિઃ સ્તોકો વર્ધતે ચાજ્યસિક્તો બીજં ચૈકં બહુસાહસ્રમેતિ ।
ક્ષયોદયૌ વિપુલૌ સંનિયમ્ય તસ્માદલ્પં નાવમન્યેત વિત્તમ્ ॥

અગ્નિકુણ્ડસમા નારી ઘૃતકુમ્ભસમો નરઃ ।
સંગમેન પરસ્ત્રીણાં કસ્ય નો ચલતે મનઃ ॥

અગ્નિકુમ્ભસમા નારી ઘૃતકુમ્ભસમો નરઃ ।
ઉભયોરપિ સંયોગઃ કસ્ય વિશ્વાસકારકઃ ॥

અગ્નિદાહે ન મે દુઃખં છેદે ન નિકષે ન વા ।
યત્તદેવ મહદ્દુઃખં ગુઞ્જયા સહ તોલનમ્ ॥

અગ્નિદો ગરદશ્ચૈવ શસ્ત્રપાણિર્ધનાપહઃ ।
ક્ષેત્રદારાપહારી ચ ષડેતે હ્યાતતાયિનઃ ॥

અગ્નિના ભસ્મના ચૈવ સ્તમ્ભેન ચ જનેન ચ ।
અદ્વારેણૈવ માર્ગેણ પઙ્ક્તિતદોષો ન વિદ્યતે ॥

અગ્નિરાપઃ સ્ત્રિયો મૂર્ખાઃ સર્પા રાજકુલાનિ ચ ।
નિત્યં યત્નેન સેવ્યાનિ સદ્યઃ પ્રાણહરાણિ ષટ્ ॥