મહાસુભાષિતસંગ્રહ · શ્લોક 0161-0180

અખર્વપર્વગર્તેષુ વિચ્છિન્નો યસ્ય વારિધિઃ ।
સ એવ હિ મુનેઃ પાણિર્ અધસ્તાદ્વિન્ધ્યભૂભૃતઃ ॥

અખિલં વિદુષામનાવિલં સુહૃદા ચ સ્વહૃદા ચ પશ્યતામ્ ।
સવિધેઽપિ નસૂક્ષ્મસાક્ષિણી વદનાલંકૃતિમાત્રમક્ષિણી ॥

અખિલેષુ વિહંગેષુ હન્ત સ્વચ્છન્દચારિષુ ।
શુક પઞ્જરબન્ધસ્તે મધુરાણાં ગિરાં ફલમ્ ॥

અગજાનનપદ્માર્કં ગજાનનમહર્નિશમ્ ।
અનેકદં તં ભક્તાનામ્ એકદન્તમુપાસ્મહે ॥

અગણિતગુણેન સુન્દર કૃત્વા ચારિત્રમપ્યુદાસીનમ્ ।
ભવતાનન્યગતિઃ સા વિહિતાવર્તેન તરણિરિવ ॥

અગણિતગુરુર્યાચ્ઞાલોલં પદાન્તસદાતિથિઃ સમયમવિદન્ મુગ્ધઃ કાલાસહો રતિલમ્પટઃ ।
કૃતકકુપિતં હસ્તાઘાતં ત્રપારુદિતં હઠા- દપરિગણયન્ લજ્જાયાં માં નિમજ્જયતિ પ્રિયઃ ॥

અગણિતનિજશ્રમાણાં પરકૃત્યેઽભ્યેત્ય વર્તમાનાનામ્ ।
સુજનઘનદિનમણીનાં પરોપકારાર્થમજનિ જનિઃ ॥

અગણિતયશસા ત્યક્ત- સ્થિતિના ક્રિયતેઽથ યાકૃતજ્ઞેન ।
સ્નિગ્ધે સુહૃદિ સરાગે મિત્રે તવ વઞ્ચના ન યુક્તા સા ॥

અગતિત્વમતિશ્રદ્ધા જ્ઞાનાભાસેન તૃપ્તતા ।
ત્રયઃ શિષ્યગુણા હ્યેતે મૂર્ખાચાર્યસ્ય ભાગ્યજાઃ ॥

અગતીનાં ખલીકારાદ્ દુઃખં નૈવોપજાયતે ।
ભવન્ત્યશોકાઃ પ્રાયેણ સાંકુરાઃ પાદતાડિતાઃ ॥

અગદૈઃ સર્વસામાન્યૈર્ વ્યન્તરાણાં વિષં હરેત્ ।
ધૂપો દેવીસહાપિચ્છખણ્ડનૈસ્તદ્વિષાપહઃ ॥

અગમ્યગમનાત્ પ્રાયઃ પ્રાયશ્ચિત્તીયતે જનઃ ।
અગમ્યં ત્વદ્યશો યાતિ સર્વત્રૈવ ચ પાવનમ્ ॥

અગમ્યાનિ પુમાન્ યાતિ યોઽસેવ્યાંશ્ચ નિષેવતે ।
સ મૃત્યુમુપગૃહ્ણાતિ ગર્ભમશ્વતરી યથા ॥

અગમ્યાર્થં તૃણપ્રાણાઃ પૃષ્ઠસ્થીકૃતભીહ્રિયઃ ।
શમ્ભલીભુક્તસર્વસ્વા જના યત્પારિપાર્શ્વિકાઃ ॥

અગમ્યો મન્ત્રાણાં પ્રકૃતિભિષજામપ્યવિષયઃ સુધાસારાસાધ્યો વિસદૃશતરારમ્ભગહનઃ ।
જગદ્ભ્રામીકર્તું પરિણતધિયાનેન વિધિના સ્ફુટં સૃષ્ટો વ્યાધિઃ પ્રકૃતિવિષમો દુર્જનજનઃ ॥

અગસ્તિતુલ્યાશ્ચ ઘૃતાબ્ધિશોષણે દમ્ભોલિતુલ્યા વટકાદ્રિભેદને ।
શાકાવલીકાનનવહ્નિરૂપાસ્ ત એવ ભટ્ટા ઇતરે ભટાશ્ચ ॥

અગસ્તિહસ્તચુલુકમિતેઽબ્ધૌ વાહનાકૃતૌ ।
મગ્નઃ સમુદ્રો વેલાયામ્ ઇતિ દેવાસ્તદા જગુઃ ॥

અગસ્ત્ય ઇવ યસ્યાસિર્ ન્યઞ્ચિતક્ષિતિભૃદ્બભૌ ।
ચિત્રં સોઽપ્યકરોન્નૃત્યત્ કબન્ધં સમરાર્ણવમ્ ॥

અગસ્ત્યસ્ય મુનેઃ શાપાદ્ બ્રહ્મસ્યન્દનમાસ્થિતઃ ।
મહાસુખાત્ પરિભ્રષ્ટો નહુષઃ સર્પતાં ગતઃ ॥

અગસ્ત્યેન પયોરાશેઃ કિયત્ કિં પીતમુજ્ઝિતમ્ ।
ત્વયા વૈરિકુલં વીર સમરે કીદૃશં કૃતમ્ ॥