મહાપ્રતિસરામહાવિદ્યારાજ્ઞી · અધ્યાય 7

[40] તતો રાજ્ઞા પ્રહૃષ્ટમાનસેન મહાપ્રતિસરા મહાવિદ્યારાજ્ઞી પૂજિતાભિનન્દિતા । તસ્ય પુરુષસ્ય પટ્ટબન્ધં કૃત્વા સ્વકસ્ય જનપદસ્ય પુરસ્તાન્ નગરજ્યેષ્ઠતાયામ્ અભિષેકો દત્તઃ ।
[41] એવં મહાબ્રાહ્મણેયં મહાપ્રતિસરા વિદ્યારાજ્ઞી સર્વત્ર મહતીં પૂજાં લભતે । અનતિક્રમણીયા સર્વદુષ્ટચિત્તૈઃ સત્ત્વૈઃ । પૂર્વમ્ ઇયં પરિજ્ઞાતા મહાવિદ્યારાજ્ઞી ન ક્વચિત્ પ્રતિહન્યતે । તસ્માદ્ અવશ્યં કાયગતાં કૃત્વા ધારયિતવ્યા । અપિ તુ મહાબ્રાહ્મણ સુનક્ષત્રેણેયં સુપ્રશસ્તવિધાનેન લિખિતવ્યા । અથ સ મહાબ્રાહ્મણો ઽતીવપ્રહૃષ્ટમના ભગવન્તં પઞ્ચમણ્ડલકેનાભિપ્રણમ્ય પ્રષ્ટુમ્ આરબ્ધઃ । કીદૃશેન ભગવન્ વિધાનેનેયં મહાવિદ્યારાજ્ઞી લિખિતવ્યા । ભગવાન્ આહ । શૃણુ મહાબ્રાહ્મણ ત્વામ્ અહં વક્ષ્યે સર્વસત્ત્વાનુકમ્પયા ।
[42] યેન સત્ત્વાઃ સુખિનો ભોન્તિ મુચ્યન્તે કર્મસંકટાત્ ।
વ્યાધિતાનાં ચ મોક્ષાર્થં સ્ત્રીનાં ગર્ભસમુદ્ભવમ્

ભવિષ્યતિ ચ સત્ત્વાનાં દારિદ્ર્યવ્રણરોહણમ્ ।
ઉપવાસોષિતો ભૂત્વા નક્ષત્રે પુષ્યસંમતે

બુદ્ધપૂજાપરો ભૂત્વા ચિત્તમ્ ઉત્પાદ્ય બોધયે ।
કરુણામ્રેડિતચિત્તેન મૈત્ર્યા ચાપિ સમન્વિતઃ

હિતાધાનપરશ્ ચાપિ સર્વસત્ત્વેષુ નિત્યશઃ ।
સ્નાત્વા ચન્દનકર્પૂરૈઃ સકસ્તૂર્યોદકેન ચ

શુચિવસ્ત્રાણિ પ્રાવૃત્ય ધૂપિતાનિ ચ ધૂપનૈઃ ।
તતો મણ્ડલકં કૃત્વા મૃદ્ગોમયસમન્વિતમ્

પૂર્ણકુમ્ભાંશ્ ચ ચત્વારઃ પઞ્ચમં મધ્યમણ્ડલે ।
પુષ્પધૂપાશ્ ચ ગન્ધાશ્ ચ દાતવ્યાત્ર મહાર્હાઃ

ધૂપનં ચન્દનં ચૈવ સ્પૃક્કાગરુ તથૈવ ચ ।
પઞ્ચશર્કરાસ્ તુરુષ્કાશ્ ચ દાતવ્યાનિ વિધાનતઃ

નાનાવિધાનિ પુષ્પાનિ યથાકાલં યથાવિધિ ।
સર્વપુષ્પફલૈર્ બીજૈર્ ગન્ધૈશ્ ચાપિ સુમણ્ડિતાન્

ઘૃતમાક્ષિકદુગ્ધૈશ્ ચ પાવકૈઃ પાયસાદિભિઃ ।
પૂરયેદ્ બલિકુમ્ભાંશ્ ચ લક્ષણાઢ્યાન્ સુમઙ્ગલાન્

સ્થાપયેચ્ ચતુરો દિક્ષુ પઞ્ચમં મધ્યમણ્ડલે ।
સ્થાપનીયાઃ શરાવાશ્ ચ કોણેષુ ગન્ધપૂરિતાઃ

ચત્વારઃ કીલકાશ્ ચાપિ ખાદિરા દૃઢવેષ્ટિતાઃ ।
પઞ્ચરઙ્ગેન સૂત્રેણ વેષ્ટયિત્વા વિચક્ષણઃ

સમભાગેન માપ્યૈતાન્ નિખન્યાન્ મણ્ડલાદ્ બહિઃ ।
એવં કૃતે લિખેદ્ વિપ્ર યદ્ ઇચ્છેત્ સિદ્ધિમ્ આત્મનઃ

શુક્લભોજનભુક્તેન લિખિતવ્યં સુખૈષિણા ।
પટે વા વસ્ત્રભૂર્જે વાન્યત્ર વા યત્ર કુત્રચિત્

લિખેત્ સ્ત્રીષુ પુત્રાર્થી સમ્યગ્ ગોરોચનેન વૈ ।
મધ્યે ચ દારકં કુર્યાત્ સર્વાલંકારવિભૂષિતમ્

રત્નપૂર્ણં તથા પાત્રં વામહસ્તેન ધારયેત્ ।
કાર્યઃ પદ્મે નિષણ્ણો ઽસૌ પ્રફુલ્લિતવિભૂષિતે

મણિહારસુવર્ણં ચ નાનારત્નં વિશેષતઃ ।
દુર્ધર્ષાશ્ ચાપિ કર્તવ્યાશ્ ચતુઃકોણેષુ પર્વતાઃ

એવં લિખેત્ પ્રયત્નેન યદ્ ઇચ્છેજ્ જીવિતું સુખમ્ ।
કુઙ્કુમેન લિખેત્ વાપિ પુરુષાનાં તુ વિશેષતઃ

તસ્યેપ્સિતાનિ કાર્યાણિ સિધ્યન્તે નાત્ર સંશયઃ ।
નાનારૂપાશ્ ચ કર્તવ્યા મુદ્રાચિહ્નાશ્ ચ પદ્મિની

દ્વે પદ્મે અથવા ત્રીણિ ચત્વારિ પઞ્ચ વા લિખેત્ ।
પદ્માનાં ચ તથા કુર્યાત્ કેસરાણિ સમન્તતઃ

સુપુષ્પિતં પદ્મં કુર્વીત સદણ્ડં પટ્ટબદ્ધકમ્ ।
ત્રિશૂલં પદ્મં કુર્વીતાષ્ટકોણં પટ્ટબદ્ધકમ્

સપરશું તથા પદ્મમ્ અષ્ટપત્ત્રં સમન્તતઃ ।
સખડ્ગં પદ્મં કુર્વીત સ પદ્મં સિતમ્ એવ ચ

શઙ્ખં પદ્મે તથા કુર્યાત્ સર્વત્ર વિધિવિસ્તરમ્ ઇતિ ।
સર્વત્ર વિધિચિહ્નાનિ કારયેદ્ વિચક્ષણઃ

વર્જયેદ્ બાલરૂપાણિ યત્ર ચિત્તં પ્રદુષ્યતિ ।
દેવરૂપં ચ કર્તવ્યં નાનાલંકારભૂષિતમ્

ભિક્ષું વજ્રધરં કુર્યાદ્ દુષ્ટતર્જનતત્પરમ્ ।
ચતુરશ્ ચ મહારાજ્ઞશ્ ચતુઃપાર્શ્વેષુ સંલિખેત્

બ્રાહ્મણે ઈશ્વરો લેખ્યઃ ક્ષત્રિયેષુ મહેશ્વરઃ ।
શૂદ્રેષુ સદા સૌમ્યં ચક્રસ્વામિનમ્ આલિખેત્

વૈશ્યેષુ વૈશ્રવણમ્ ઇન્દ્રં ચૈવ સુરેશ્વરમ્ ।
દારકે સદા લેખ્યઃ પ્રજાપતિર્ મહામતિઃ

શ્યામવર્ણા ભવેદ્ યા તુ રૌદ્રં તસ્યાઃ સમાલિખેત્ ।
ગૌરાયા રૂપસંપન્નં લિખેન્ નિત્યં યશસ્વિનમ્

સ્થૂલાયાં માણિભદ્રશ્ ચ લિખિતવ્યઃ પ્રયત્નતઃ ।
કૃષાયાં પૂર્ણભદ્રસ્ તુ મયા હ્ય્ ઉક્તં સ્વયમ્ભુવા

ગુર્વિણ્યાશ્ ચ મહાકાલં લિખેચ્ ચ બ્રહ્મદેવતામ્ ।
અન્યાંશ્ ચાપિ યથાપૂર્વં વિધિનોક્તાન્ સમાલિખેત્

લિખિત્વૈવં પ્રયત્નેન વિધિદૃષ્ટેન કર્મણા ।
ધારયેત્ સતતં કણ્ઠે ભદ્રકં તસ્ય ભવિષ્યતિ

જ્વાલાગ્રં ચિન્તામણિં કુર્યાદ્ વજ્રાગ્રે પદ્મસંસ્થિતમ્ ।
પદ્મસ્ય કેસરે પાશં ચક્રં ચાપિ તથા પરમ્

વજ્રં પદ્મે સમાલિખ્ય મુદ્ગરં પદ્મસંસ્થિતમ્ ।
શક્તિં લિખેત્ તથા પદ્મે યથા વિધિષુ દૃશ્યતે

જ્વાલાગ્રા મણયઃ સર્વે વિસ્ફુલિઙ્ગસમાકુલાઃ ।
પટ્ટબદ્ધાશ્ ચ કર્તવ્યા યથા વિધિષુ કીર્તિતાઃ

નાગાશ્ ચ ફણિનઃ કાર્યા મણિજ્વાલા નવશીર્ષાઃ ।
તે ઽપિ સર્વે પ્રયત્નેન હૃદિ વજ્રપ્રતિષ્ઠિતાઃ

પાર્થિવાનાં બલં નિત્યં સાર્થવાહં લિખેદ્ બુધઃ ।
વિદ્યાધરાણાં ચ સર્વેષાં વિદ્યાદેવીં સમાલિખેત્

ચન્દ્રસૂર્યૌ સનક્ષત્રૌ રાહુકેતુગ્રહાષ્ટકમ્ ।
લિખેચ્ ચ ષણ્ડપણ્ડાનાં પુત્રલાભો ભવિષ્યતિ

નિશ્ચયાદ્ વિધિનાલિખ્ય સર્વસિદ્ધિર્ ભવિષ્યતિ ।
તસ્માત્ સર્વપ્રયત્નેન ધારયેન્ મતિમાન્ નરઃ

[43] સર્વસિદ્ધિકરં હ્ય્ એતન્ મઙ્ગલ્યં પાપનાશનમ્ ।
પ્રાપ્નોતિ પરમં સ્થાનં સ્વયમ્ભૂવચનં યથા

લોકે ઽસ્મિન્ પરમં સૌખ્યં પરલોકે સુખં પરમ્ ।
ત્રયસ્ત્રિંશભવનાદૌ સ્થાનં તસ્ય સુરાલયમ્

જમ્બુદ્વીપે શુભે રમ્યે વિશિષ્ટે કુલસંમતે ।
ક્ષત્રિયેષુ વિશિષ્ટેષુ બ્રાહ્મણેષુ વિશેષતઃ

જન્મ તસ્ય મહાત્મસ્ય વિદ્યા સુખં ચ નિત્યશઃ ।
સર્વબુદ્ધૈર્ ન શક્યં હિ પુણ્યસ્કન્ધં પ્રકીર્તિતુમ્

યત્ પુણ્યં સમવાપ્નોતિ પ્રતિસરાધારકો નરઃ ।
નરકદ્વારાઃ પિથિતાઃ સર્વસ્વર્ગદ્વારા અપાવૃતાઃ

સુખસંપત્તિસંપન્નો ભવિષ્યતિ મહામતિઃ ।
બુદ્ધાશ્ ચ બોધિસત્ત્વાશ્ ચ આશ્વાસયન્તિ ચ નિત્યશઃ

કાયેન સુખસંપન્નો બલેન મહતા ભવેત્ ।
યથાપિ તદ્ વૈ જિનેન્દ્રોક્તં ચક્રવર્તી ભવિષ્યતિ

આશ્વાસનં નૃદેવાનાં ત્રાસનં દુષ્ટચેતસામ્ ।
ભવિષ્યત્ય્ અચિરેણાસૌ યસ્ય વિદ્યા સુભાષિતા

નાસૌ હન્યતિ શસ્ત્રેણ ન વિષેણ ન ચાગ્નિના ।
નાકાલમરણં ચાસ્ય દૂરે ગચ્છન્તિ પાપકાઃ

દર્શનાત્ સ્પર્શનાચ્ ચૈવ શ્રવણાદ્ એવ સર્વતઃ ।
ભૂતગ્રહવિવાદાશ્ ચ ઉદકાગ્નિભયં તથા

મૃગા વ્યાડાહયો નાગા વ્યાધયશ્ ચ સુદારુણાઃ ।
તે સર્વે ન ભવિષ્યન્તિ યેષાં વિદ્યા સુભાષિતા

સર્વથા સર્વમારૈસ્ તુ શૃણુ વક્ષ્યામિ તત્ત્વતઃ ।
પૂજનીયા ભવિષ્યન્તિ સર્વસત્ત્વોત્તમા હિ તે