મહાપ્રતિસરામહાવિદ્યારાજ્ઞી · અધ્યાય 5

તેનાહં મોચયિષ્યામિ અતિદુઃખમહાભયાત્ ।
[27] તતઃ સ મહાસાર્થવાહસ્ તસ્યાં વેલાયામ્ ઇમાં મહાપ્રતિસરાં મહાવિદ્યારાજ્ઞીં લિખિત્વા ધ્વજાગ્રાવરોપિતાં કારયતિ સ્મ । સમનન્તરધ્વજાગ્રાવરોપિતે ઽસ્મિન્ મહાપ્રતિસરે સર્વ એવ તે તિમિઙ્ગિલાસ્ તત્ પોતમ્ એકજ્વાલીભૂતં પશ્યન્તિ । તતસ્ તે નાગા મૈત્રમનસસ્ તેષામ્ અન્તિકે ઽવતીર્ય પૂજાં કર્તુમ્ આરબ્ધાઃ । તે ચ તિમિઙ્ગિલા અસ્યા એવ મહાપ્રતિસરાવિદ્યારાજ્ઞ્યા અનુભાવેન દહ્યમાના નિષ્પલાયિતા વિલયં ગતાસ્ તે ચ સાર્થિકાસ્ તૈર્ મહાનાગૈર્ મહતિ મહારત્નદ્વીપે પ્રાપિતા ઇતિ ।
[28] જ્ઞાનવતી મહાવિદ્યા મહાપ્રતિસરા સર્વતથાગતાધિષ્ઠિતા । તેન હેતુનેયં મહાબ્રાહ્મણ મહાવિદ્યેતિ ખ્યાતા । અવશ્યમ્ એવેયં ધ્વજાગ્રાવરોપિતાં કૃત્વા ધારયિતવ્યા । સર્વવાતશીતાકાલમેઘવિદ્યુદશનિં પ્રશમયતિ । સર્વદેવમનુષ્યામનુષ્યવિગ્રહવિવાદેષુ પરિમોચયતિ । સર્વદંશમશકશલભપ્રાણકજાતા વિવિધરૂપાઃ સસ્યવિનાશકા ન પ્રભવન્તિ । પ્રશમં ગચ્છન્તિ । સર્વે ચ દુષ્ટચિત્તા મૃગપક્ષિણો દંષ્ટ્રિણો વિનશ્યન્તિ । સર્વાણિ ચ પુષ્પફલપત્ત્રવનસ્પત્યોષધિસસ્યાદીન્ય્ અભિવર્ધન્તે । સુરસાનિ સ્વાદૂનિ મૃદૂનિ ચ ભવિષ્યન્તિ । સમ્યગ્ એવ પરિપાચિતાનિ ભવિષ્યન્તિ । અતિવૃષ્ટ્યનાવૃષ્ટિદોષાઃ સર્વેણ સર્વં ન ભવિષ્યન્તિ । કાલવૃષ્ટિર્ ભવિષ્યતિ નાકાલવૃષ્ટિઃ । યે ચ તસ્મિન્ વિષયે મહાનાગાસ્ તે ચ સમ્યગ્ એવ કાલેન કાલં વર્ષધારા ઉત્સૃજન્તિ । યસ્મિન્ વિષયે ઇયં મહાવિદ્યારાજ્ઞી મહાપ્રતિસરા નામ પ્રચરિષ્યતિ તત્ર તૈઃ સત્ત્વૈર્ જ્ઞાત્વા પૂજાસત્કારં કૃત્વા નાનાગન્ધૈર્ નાનાધૂપૈર્ નાનાપુષ્પૈર્ નાનાવસ્ત્રૈઃ પરિવેષ્ટયિત્વા ચૈત્યસ્યોપરિ ધ્વજાગ્રાવરોપિતાં કૃત્વા નાનાવાદ્યતૂર્યસંગીતિભિર્ વાદ્યમાનાભિઃ પ્રદક્ષિણીકર્તવ્યા । તેષાં મહાસત્ત્વાનાં યથાચિન્તિતમ્ આશાં પરિપૂરયિષ્યન્તિ દેવતાઃ શક્રબ્રહ્મપ્રભૃતયઃ । અથવા યથા યથા વિધિના લિખ્યતે તથા તથા સમૃધ્યતે ।
પુત્રાર્થી લભતે પુત્રં ગર્ભસંધારિણી પરા ।
સુખેન વર્ધતે ગર્ભઃ સુખેન ચ પ્રસૂયતે