મહાપ્રતિસરામહાવિદ્યારાજ્ઞી · અધ્યાય 4

પરિવારિતં સમન્તેન પૂજાં કુર્વન્ત્ય્ અનુત્તરામ્ ।
[24] યાવત્ તસ્ય તૈર્ યક્ષૈઃ પ્રતિસરકૂટો નામ સ્થાપિતઃ । અથ તે યક્ષાઃ પુનર્ આગત્ય યમસ્ય ધર્મરાજસ્ય નિશ્ચયં વિસ્તરેણારોચયન્તિ સ્મ । એવમ્ એતદ્ દેવ યથા ત્વયાભિહિતમ્ । સમનન્તરારોચિતે ઽસ્મિન્ વચનપર્યવસાને સ મહાસત્ત્વસ્ તં નારકં શરીરં વિજહ્ય ત્રયસ્ત્રિંશેષુ દેવેષૂપપન્નઃ । તેન હેતુના પ્રતિસરપૂર્વી દેવપુત્ર ઇત્ય્ ઉચ્યતે ।
[25] તેન હિ મહાબ્રાહ્મણ પરિજ્ઞાતપૂર્વમ્ । તસ્માદ્ અવશ્યમ્ એવેયં મહાપ્રતિસરેતિ ધારયિતવ્યા વાચયિતવ્યા લિખિતવ્યા યથાવિધિના નિત્યં શરીરગતાં કૃત્વા ધારયિતવ્યા । સ નિત્યં સર્વવ્યસનદુઃખેભ્યઃ પરિમુચ્યતે । સર્વદુર્ગતિભયભૈરવેભ્ય ઉત્તરતિ । ન ચ વિદ્યુતા શક્યં પાતયિતુમ્ । કિમ્ ઇતિ વિદ્યુતા પરિજ્ઞાતપૂર્વમ્ ।
[26] મહાબ્રાહ્મણ હિઙ્ગુમર્દને મહાનગરવરે વિમલશઙ્ખો નામ શ્રેષ્ઠી મહાધનકનકસમૃદ્ધઃ પરિપૂર્ણકોશકોષ્ઠાગારસંપન્નો બભૂવ । સાર્થવાહ ઇતિ ખ્યાતવાન્ । અથ સ મહાસાર્થવાહો યાનપાત્રમ્ આસાદ્ય મહાસમુદ્રે ઽવતીર્ણઃ । યાવત્ તિમિઙ્ગિલૈઃ સો ઽસ્ય પોતો ઽવષ્ટબ્ધઃ । વિનાશયિતુકામા નાગાશ્ ચ સંક્ષુબ્ધા મહાન્તં ગર્જનાસ્ફોટં કુર્વન્તિ વિદ્યુદુલ્કામ્ ઉત્સૃજન્તિ વજ્રાશનિં પ્રવર્ષિતુમ્ આરબ્ધાઃ । તતસ્ તે વણિજો મહતા દુઃખેનાભ્યાહતચિત્તાસ્ તં મહાન્તં નાગસંક્ષોભં વિદ્યુદુલ્કાં વજ્રાશનિં ચોત્સૃજન્તં તૈશ્ ચ તિમિઙ્ગિલૈઃ પોતમ્ અવષ્ટબ્ધં દૃષ્ટ્વા મહાન્તમ્ ઉત્ક્રોશનાશબ્દં કર્તુમ્ આરબ્ધાઃ । તે દેવતાવિશેષાન્ આયાચયન્તિ । ન ચ કશ્ચિત્ તેષાં પરિત્રાણં ભવતિ । તતસ્ તે સાર્થવાહસ્યોપગમ્ય કરુણકરુણમ્ ઇદં વચનમ્ અબ્રુવન્ ।
પરિત્રાયસ્વ મહાસત્ત્વ મોચયાસ્માન્ મહાભયાત્ ।
અથ ખલુ મહાસાર્થવાહો દૃઢચિત્તો મહામતિઃ

વણિજો વિક્લવીભૂતાન્ ઇદં વચનમ્ અબ્રવીત્ ।
મા ભૈર્ મા ભૈર્ વણિજો ભવન્તો ધીરતાં વ્રજત

અહં વો મોચયિષ્યામિ અતો દુઃખમહાર્ણવાત્ ।
તતો ધીરમનસો ભૂત્વા વણિજ ઇદં વચનમ્ અબ્રુવન્

કિમ્ એતન્ મહાસત્ત્વ બ્રૂહિ શીઘ્રમ્ અવિઘ્નતઃ ।
યાવજ્ જીવિતમ્ અસ્માકં ત્વત્પ્રભાવાન્ મહામતે

કથ્યતાં જ્ઞાનમાહાત્મ્યં પશ્ચાત્ ત્વં કિં કરિષ્યસિ ।
તતઃ સાર્થપતિસ્ તેષામ્ ઇમાં વિદ્યામ્ ઉદાહરત્

અસ્તિ મે મહાવિદ્યા પ્રતિસરાનામવિશ્રુતા ।
દમની સર્વદુષ્ટાનાં મહાબલપરાક્રમા