મહાભારત · અધ્યાય 5.64

શકુનીનામિહાર્થાય પાશં ભૂમાવયોજયત્ ।
કશ્ચિચ્છાકુનિકસ્તાત પૂર્વેષામિતિ શુશ્રુમ્ ॥

તસ્મિંસ્તૌ શકુનૌ બદ્ધૌ યુગપત્સહચારિણૌ ।
તાવુપાદાય તં પાશં જગ્મતુઃ ખચરાવુભૌ ॥

તૌ વિહાયસમાક્રાન્તૌ દૃષ્ટ્વા શાકુનિકસ્તદા ।
અન્વધાવદનિર્વિણ્ણો યેન યેન સ્મ ગચ્છતઃ ॥

તથા તમનુધાવન્તમૃગયું શકુનાર્થિનમ્ ।
આશ્રમસ્થો મુનિઃ કશ્ચિદ્દદર્શાથ કૃતાહ્નિકઃ ॥

તાવન્તરિક્ષગૌ શીઘ્રમનુયાન્તં મહીચરમ્ ।
શ્લોકેનાનેન કૌરવ્ય પપ્ચ્છ સ મુનિસ્તદા ॥

વિચિત્રમિદમાશ્ચર્યં મૃગહન્પ્રતિભાતિ મે ।
પ્લવમાનૌ હિ ખચરૌ પદાતિરનુધાવસિ ॥
શાકુનિક ઉવાચ ।

પાશમેકમુભાવેતૌ સહિતૌ હરતો મમ ।
યત્ર વૈ વિવદિષ્યેતે તત્ર મે વશમેષ્યતઃ ॥
વિદુર ઉવાચ ।

તૌ વિવાદમનુપ્રાપ્તૌ શકુનૌ મૃત્યુસન્ધિતૌ ।
વિગૃહ્ય ચ સ્રુદુર્બુદ્ધી પૃથિવ્યાં સન્નિપેતતુઃ ॥

તૌ યુધ્યમાનૌ સંરબ્ધૌ મૃત્યુપાશવશાનુગૌ ।
ઉપસૃત્ય પ્રમત્તૌ તૌ જગ્રાહ મૃગહા તદા ॥

એવં યે જ્ઞાતયોઽર્થેષુ મિથો ગચ્છન્તિ વિગ્રહમ્ ।
તે મૃત્યુવશમાયાન્તિ શકુનાવિવ વિગ્રહાત્ ॥

સમ્ભોજનં સન્કથનં સમ્પ્રશ્નોઽથ સમાગમઃ ।
એતાનિ જ્ઞાતિકાર્યાણિ ન વિરોધઃ કદાચન ॥

યે સ્મ કાલે સુમનસઃ સર્વે વૃદ્ધાનુપાસતે ।
સિંહગુપ્તમિવારણ્યમપ્રધૃષ્યા ભવન્તિ તે ॥

યેઽર્થં સન્તતમાસાદ્ય દીના ઇવ સમાસતે ।
શ્રિયં તે સમ્પ્રયચ્છન્તિ દ્વિષદ્ભ્યો ભરતર્ષભ ॥

ધૂમાયન્તે વ્યપેતાનિ જ્વલન્તિ સહિતાનિ ચ ।
ધૃતરાષ્ટ્રોલ્મુકાનીવ જ્ઞાતયો ભરતર્ષભ ॥

ઇદમન્યત્પ્રવક્ષ્યામિ યથા દૃષ્ટં ગિરૌ મયા ।
શ્રુત્વા તદપિ કૌરવ્ય યથા શ્રેયસ્તથા કુરુ ॥

વયં કિરાતૈઃ સહિતા ગચ્છામો ગિરિમુત્તરમ્ ।
બ્રાહ્મણૈર્દેવકલ્પૈશ્ચ વિદ્યાજમ્ભકવાર્તિકૈઃ ॥

કુઞ્ચભૂતં ગિરિં સર્વમભિતો ગન્ધમાદનમ્ ।
દીપ્યમાનૌષધિગણં સિદ્ધગન્ધર્વસેવિતમ્ ॥

તત્રાપશ્યામ વૈ સર્વે મધુ પીતકમાક્ષિકમ્ ।
મરુપ્રપાતે વિષમે નિવિષ્ટં કુમ્ભસમ્મિતમ્ ॥

આશીવિષૈ રક્ષ્યમાણં કુબેરદયિતં ભૃશમ્ ।
યત્પ્રાપ્ય પુરુષો મર્ત્યોઽપ્યમરત્વં નિયચ્છતિ ॥

અચક્ષુર્લભતે ચક્ષુર્વૃદ્ધો ભવતિ વૈ યુવા ।
ઇતિ તે કથયન્તિસ્મ બ્રાહ્મણા જમ્ભસાધકાઃ ॥

તતઃ કિરાતાસ્તદ્દૃષ્ટ્વા પ્રાર્થયન્તો મહીપતે ।
વિનેશુર્વિષમે તસ્મિન્સસર્પે ગિરિગહ્વરે ॥

તથૈવ તવ પુત્રોઽયં પૃથિવીમેક ઇચ્છતિ ।
મધુ પશ્યતિ સમ્મોહાત્પ્રપાતં નાનુપશ્યતિ ॥

દુર્યોધનો યોદ્ધુમનાઃ સમરે સવ્યસાચિના ।
ન ચ પશ્યામિ તેજોસ્ય વિક્રમં વા તથાવિધમ્ ॥

એકેન રથમાસ્થાય પૃથિવી યેન નિર્જિતા ।
ભીષ્મદ્રોણપ્રભૃતયઃ સન્ત્રસ્તાઃ સાધુયાયિનઃ ॥

વિરાટનગરે ભગ્નાઃ કિં તત્ર તવ દૃશ્યતામ્ ।
પ્રતીક્ષમાણો યો વીરઃ ક્ષમતે વીક્ષિતં તવ ॥

દ્રુપદો મત્સ્યરાજશ્ચ સઙ્કુદ્ધશ્ચ ધનઞ્જયઃ ।
ન શેષયેયુઃ સમરે વાયુયુક્તા ઇવાગ્નયઃ ॥

અઙ્કે કુરુષ્વ રાજાનં ધૃતરાષ્ટ્ર યુધિષ્ઠિરમ્ ।
યુધ્યતોર્હિ દ્વયોર્યુદ્ધે નૈકાન્તેન ભવેઞ્જયઃ ॥