મહાભારત · અધ્યાય 5.28

અસંશયં સઞ્જય સત્યમેત- દ્ધર્મો વરઃ કર્મણાં યત્ત્વમાત્થ ।
જ્ઞાત્વા તુ માં સઞ્જય ગર્હયેસ્ત્વં યદિ ધર્મં યદ્યધર્મં ચરામિ ॥

યત્રાધર્મો ધર્મરૂપાણિ ધત્તે ધર્મઃ કૃત્સ્નો દૃશ્યતોઽધર્મરૂપઃ ।
બિભ્રદ્ધર્મો ધર્મરૂપં તથા ચ વિદ્વાંસસ્તં સમ્પ્રપશ્યન્તિ બુદ્ધ્યા ॥

એવં તથૈવાપદિ લિઙ્ગમેત- દ્ધર્માધર્મૌ નિત્યવૃત્તી ભજેતામ્ ।
આદ્યં લિઙ્ગં યસ્ય તસ્ય પ્રમાણ- માપદ્ધર્મં સઞ્જય તં નિબોધ ॥

લુપ્તાયાં તુ પ્રકૃતૌ યેન કર્મ નિષ્પાદયેત્તત્પરીપ્સેદ્વિહીનઃ ।
પ્રકૃતિસ્થશ્ચાપદિ વર્તમાન ઉભૌ ગર્હ્યૌ ભવતઃ સઞ્જયૈતૌ ॥

અવિનાશમિચ્છતાં બ્રાહ્મણાનાં પ્રાયશ્ચિત્તં વિહિતં યદ્વિધાત્રા ।
સમ્પશ્યેથાઃ કર્મસુ વર્તમાનાન્ વિકર્મસ્થાન્સઞ્જય ગર્હયેસ્ત્વમ્ ॥

મનીષિણાં સત્ત્વિચ્છેદનાય વિધિયતે સત્સુ વૃત્તિઃ સદૈવ ।
અબ્રાહ્મણાઃ સન્તિ તુ યે ન વૈદ્યાઃ સર્વોત્સઙ્ગં સાધુ મન્યેત તેભ્યઃ ॥

તદધ્વાનઃ પિતરો યે ચ પૂર્વે પિતામહા યે ચ તેભ્યઃ પરેઽન્યે ।
યજ્ઞૈષિણો યે ચ હિ કર્મ કુર્યુ- ર્નાન્યં તતો નાસ્તિકોઽસ્મીતિ મન્યે ॥

યત્કિઞ્ચનેદં વિત્તમસ્યાં પૃથિવ્યાં યદ્દેવાનાં ત્રિદશાનાં પરં યત્ ।
પ્રાજાપત્યં ત્રિદિવં બ્રહ્મલોકં નાધર્મતઃ સઞ્જય કામયેયમ્ ॥

ધર્મેશ્વરઃ કુશલો નીતિમાંશ્ચા- પ્યુપાસિતા બ્રાહ્મણાનાં મનીષી ।
નાનાવિધાંશ્ચૈવ મહાબલાંશ્ચ રાજન્યભોજાનનુશાસ્તિ કૃષ્ણઃ ॥

યદિ હ્યહં વિસૃજત્સામ ગર્હ્યો નિયુધ્યમાનો યદિ જહ્યાં સ્વધર્મમ્ ।
મહાયશાઃ કેશવસ્તદ્બ્રવીતુ વાસુદેવસ્તૂભયોરર્થકામઃ ॥

શૈનેયોઽયં ચેદયશ્ચાન્ધકાશ્ચ વાર્ષ્ણેયભોજાઃ કુકુરાઃ સૃઞ્જયાશ્ચ ।
ઉપાસીના વાસુદેવસ્ય બુદ્ધિં નિગૃહ્ય શત્રૂન્સુહૃદો નન્દયન્તિ ॥

વૃષ્ણ્યન્ધકા હ્યુગ્રસેનાદયો વૈ કૃષ્ણપ્રણીતાઃ સર્વ એવેન્દ્રકલ્પાઃ ।
મનસ્વિનઃ સત્યપરાયણાશ્ચ મહાબલા યાદવા ભોગવન્તઃ ॥

કાશ્યો બભ્રુઃ શ્રિયમુત્તમાં ગતો લબ્ધ્વા કૃષ્ણં ભ્રાતરમીશિતારમ્ ।
યસ્મૈ કામાન્વર્ષતિ વાસુદેવો ગ્રીષ્માત્યયે મેઘ ઇવ પ્રજાઽભ્યઃ ॥

ઈદૃશોઽયં કેશવસ્તાત વિદ્વાન્ વિદ્ધિ હ્યેનં કર્મણાં નિશ્ચયજ્ઞમ્ ।
પ્રિયશ્ચ નઃ સાધુતમશ્ચ કૃષ્ણો નાતિક્રામે વચનં કેશવસ્ય ॥