મહાભારત · અધ્યાય 3.75

અથ તાં વ્યુષિતો રાત્રિં નલો રાજા સ્વલન્કૃતઃ ।
વૈદર્ભ્યા સહિતઃ કાલ્યં દદર્શ વસુધાધિપમ્ ॥

તતોઽભિવાદયામાસ પ્રયતઃ શ્વશુરં નલઃ ।
તતો નુ દમયન્તી ચ વવન્દે પિતરં શુભા ॥

તં ભીમઃ પ્રતિજગ્રાહ પુત્રવત્પરયા મુદા ।
યથાર્હં પૂજયિત્વા ચ સમાશ્વાસયત પ્રભુઃ ॥

નલેન સહિતાં તત્રદમયન્તીં પતિવ્રતામ્ ।
અનુજગ્રાહ મહતા સત્કારેણ ક્ષિતીશ્વરઃ ॥

તામર્હણાં નલો રાજા પ્રતિગૃહ્ય યથાવિધિ ।
પરિચર્યાં સ્વકાં તસ્મૈ યથાવત્પ્રત્યવેદયત્ ॥

તતો બભૂવ નમરે સુમહાન્હર્ષજઃ સ્વનઃ ।
જનસ્ય સમ્પ્રહૃષ્ટસ્ય નલં દૃષ્ટ્વા તથાઽગતમ્ ॥

અશોભયચ્ચ નગરીં પતાકાધ્વજમાલિનીમ્ ।
સિક્તાઃ સુમૃષ્ટપુષ્પાઢ્યા રાજમાર્ગાઃ સ્વલન્કૃતાઃ ॥

દ્વારિદ્વારિ ચ પૌરાણાં પુષ્પભઙ્ગઃ પ્રકલ્પિતઃ ।
અર્ચિતાનિ ચ સર્વાણિ દેવતાયતનાનિ ચ ॥

ઋતુપર્ણોઽપિશુશ્રાવ બાહુકચ્છદ્મિનં નલમ્ ।
દમયન્ત્યા સમાયુક્તં જહૃષે ચ નરાધિપઃ ॥

તમાનાય્ય નલં રાજા ક્ષમયામાસ પાર્થિવઃ ।
સ ચ તં ક્ષમયામાસ હેતુભિર્બુદ્ધિસમ્મિતઃ ॥

સ સત્કૃતોમહીપાલો નૈષધં વિસ્મિતાનનઃ ।
દિષ્ટ્યા સમેતો દારૈઃ સ્વૈર્ભવાનિત્યભ્યનન્દત ॥

કચ્ચિત્તુ નાપરાધં તે કૃતવાનસ્મિ નૈષધ ।
અજ્ઞાતવાસે વસતો મદ્ગૃહેવસુધાધિપ ॥

યદિ વાઽબુદ્ધિપૂર્વાણિ યદિ બુદ્ધ્યાઽપિ કાનિચિત્ ।
મયા કૃતાન્યકાર્યાણિ તાનિ ત્વં ક્ષન્તુમર્હસિ ॥
નલ ઉવાચ ।

ન મેઽપરાધં કૃતવાંસ્ત્વં સ્વલ્પમપિ પાર્થિવ ।
કૃતેઽપિ ચ ન મે કોપઃ ક્ષન્તવ્યં હિ મયા તવ ॥

પૂર્વં હ્યાપિ સખા મેઽસિ સમ્બન્ધી ચ જનાધિપ ।
અત ઊર્ધ્વં તુ ભૂયસ્ત્વં પ્રીતિમાહર્તુમર્હસિ ॥

સર્વકામૈઃ સુવિહિતૈઃ સુખમસ્મ્યુષિતસ્ત્વયિ ।
ન તથા સ્વગૃહેરાજન્યથા તવ ગૃહે સદા ॥

ઇદં ચૈવ હયજ્ઞાનં ત્વદીયં મયિ તિષ્ઠતિ ।
તદુપાકર્તુમિચ્છામિ મન્યસે યદિ પાર્થિવ ॥

એવમુક્ત્વા દદૌ વિદ્યામૃતુપર્ણાય નૈષધઃ ।
સ ચ તાં પ્રતિજગ્રાહ વિધિદૃષ્ટેન ક્રમણા ॥

ગૃહીત્વા ચાશ્વહૃદયં પ્રીતો ભાગસ્વરિર્નૃપ । નિષધાધિપતેશ્ચાપિ દત્તાઽક્ષહૃદયં નૃપઃ ।
સૂતમન્યમુપાદાય યયૌ સ્વપુરમેવ હ ॥

ઋતુપર્ણે ગતે રાજન્નલો રાજા વિશામ્પતે । નગરે કુણ્ડિને કાલં નાતિદીર્ગમિવાવસત્ ॥