મહાભારત · અધ્યાય 13.175

અહિંસા વૈદિકં કર્મ ધ્યાનમિન્દ્રિયસંયમઃ ।
તપોઽથ ગુરુશુશ્રૂષા કિં શ્રેયઃ પુરુષં પ્રતિ ॥
બૃહસ્પતિરુવાચ ।

સર્વાણ્યેતાનિ ધર્મસ્ય પૃથગ્દ્વારાણિ નિત્યશઃ ।
શૃણુ સન્કીર્ત્યમાનાનિ ષડેવ ભરતર્ષભ ॥

હન્ત નિઃશ્રેયસં જન્તોરહં વક્ષ્યામ્યનુત્તમમ્ ।
અહિંસાપાશ્રયં ધર્મં દાન્તો વિદ્વાન્સમાચરેત્ ॥

ત્રિદણ્ડં સર્વભૂતેષુ નિધાય પુરુષઃ શુચિઃ ।
કામક્રોધૌ ચ સંયમ્ય તતઃ સિદ્ધિમવાપ્નુતે ॥

અહિંસકાનિ ભૂતાનિ દણ્ડેન વિનિહન્તિ યઃ ।
આત્મનઃ સુખમન્વિચ્છન્સ પ્રેત્ય ન સુખી ભવેત્ ॥

આત્મોપમસ્તુ ભૂતેષુ યો વૈ ભવતિ પૂરુષઃ ।
ત્યક્તદણ્ડો જિતક્રોધઃ સ પ્રેત્ય સુખમેધતે ॥

સર્વભૂતાત્મભૂતસ્ય સર્વભૂતાનિ પશ્યતઃ ।
દેવાઽપિ માર્ગે મુહ્યન્તિ હ્યપદસ્ય પદેષિણઃ ॥

ન તત્પરસ્ય સન્દધ્યાત્પ્રતિકૂલં યદાત્મનઃ ।
એષ સાઙ્ગ્રાહિકો ધર્મઃ કામાદન્યઃ પ્રવર્તતે ॥

પ્રખ્યાપને ચ દાને ચ સુખદુઃખે પ્રિયાપ્રિયે ।
આત્મૌપમ્યેન પુરુષઃ પ્રમાણમધિગચ્છતિ ॥

યથા પરઃ પ્રક્રમતે પરેષુ તથા પરે પ્રક્રમન્તે પરસ્મિન્ ।
નિષેવતે સ્વસમાં જીવલોકે યથા ધર્મો નૈપુણેનોપદિષ્ટઃ ।
વૈશમ્પાયન ઉવાચ ।

ઇત્યુક્ત્વા તં સુરગુરુધર્મરાજં યુધિષ્ઠિરમ્ ।
દિવામચક્રમે ધીમાન્પશ્યતામેવ નસ્તદા ॥