મહાભારત · અધ્યાય 1.225

ભીષ્મઃ શાન્તનવો વિદ્વાન્દ્રોણશ્ચ ભગવાનૃષિઃ । હિતં ચ પરમં સત્યમબ્રૂતાં વાક્યમુત્તમમ્ ।
હિતં ચ પરમં વાક્યં ત્વં ચ સત્યં બ્રવીષિ મામ્ ॥

યથૈવ પાણ્ડોસ્તે વીરાઃ કુન્તીપુત્રા મહારથાઃ ।
તથૈવ ધર્મતઃ સર્વે મમ પુત્રા ન સંશયઃ ॥

યથૈવ મમ પુત્રાણામિદં રાજ્યં વિધીયતે ।
તથૈવ પાણ્ડુપુત્રાણામિદં રાજ્યં ન સંશયઃ ॥

ક્ષત્તરાનય ગચ્છૈતાન્સહ માત્રા સુસત્કૃતાન્ ।
તયા ચ દેવરૂપિણ્યા કૃષ્ણયા સહ ભારત ॥

દિષ્ટ્યા જીવન્તિ તે પાર્થા દિષ્ટ્યા જીવતિ સા પૃથા ।
દિષ્ટ્યા દ્રુપદકન્યાં ચ લબ્ધવન્તો મહારથાઃ ॥

દિષ્ટ્યા વર્ધામહે સર્વે દિષ્ટ્યા શાન્તઃ પુરોચનઃ ।
દિષ્ટ્યા મમ પરં દુઃખમપનીતં મહાદ્યુતે ॥

ત્વમેવ ગત્વા વિદુર તાનિહાનય મા ચિરમ્ ।
વૈશમ્પાયન ઉવાચ ।
એવમુક્તસ્તતઃ ક્ષત્તા રથમારુહ્ય શીઘ્રગમ્ ।
આગાત્કતિપયાહોભિઃ પાઞ્ચાલાન્રાજધર્મવિત્ ॥

તતો જગામ વિદુરો ધૃતરાષ્ટ્રસ્ય શાસનાત્ ।
સકાશં યજ્ઞસેનસ્ય પાણ્ડવાનાં ચ ભારત ॥

સમુપાદાય રત્નાનિ વસૂનિ વિવિધાનિ ચ ।
દ્રૌપદ્યાઃ પાણ્ડવાનાં ચ યજ્ઞસેનસ્ય ચૈવ હ ॥

તત્ર ગત્વા સ ધર્મજ્ઞઃ સર્વશાસ્ત્રવિશારદઃ ।
દ્રુપદં ન્યાયતો રાજન્સંયુક્તમુપતસ્થિવાન્ ॥

સ ચાપિ પ્રતિજગ્રાહ ધર્મેણ વિદુરં તતઃ ।
ચક્રતુશ્ચ યથાન્યાયં કુશલપ્રશ્નસંવિદમ્ ॥

દદર્શ પાણ્ડવાંસ્તત્ર વાસુદેવં ચ ભારત ।
સ્નેહાત્પરિષ્વજ્ય સ તાન્પપ્રચ્છાનામયં તતઃ ॥

તૈશ્ચાપ્યમિતબુદ્દિઃ સ પૂજિતો હિ યથાક્રમમ્ ।
વચનાદ્ધૃતરાષ્ટ્રસ્ય સ્નેહયુક્તં પુનઃપુનઃ ॥

પપ્રચ્છાનામયં રાજંસ્તતસ્તાન્પાણ્ડુનન્દનાન્ ।
પ્રદદૌ ચાપિ રત્નાનિ વિવિધાનિ વસૂનિ ચ ॥

પાણ્ડવાનાં ચ કુન્ત્યાશ્ચ દ્રૌપદ્યાશ્ચ વિશામ્પતે ।
દ્રુપદસ્ય ચ પુત્રાણાં યથા દત્તાનિ કૌરવૈઃ ॥

પ્રોવાચ ચામિતમતિઃ પ્રશ્રિતં વિનયાન્વિતઃ ।
દ્રુપદં પાણ્ડુપુત્રાણાં સન્નિધૌ કેશવસ્ય ચ ॥
વિદુર ઉવાચ ।

રાજઞ્છૃણુ સહામાત્યઃ સપુત્રશ્ચ વચો મમ ।
ધૃતરાષ્ટ્રઃ સપુત્રસ્ત્વાં સહામાત્યઃ સબાન્ધવઃ ॥

અબ્રવીત્કુશલં રાજન્પ્રીયમાણઃ પુનઃપુનઃ ।
પ્રીતિમાંસ્તે દૃઢં ચાપિ સમ્બન્ધેન નરાધિપ ॥

તથા ભીષ્મઃ શાન્તનવઃ કૌરવૈઃ સહ સર્વશઃ ।
કુશલં ત્વાં મહાપ્રાજ્ઞઃ સર્વતઃ પરિપૃચ્છતિ ॥

ભારદ્વાજો મહાપ્રાજ્ઞો દ્રોણઃ પ્રિયસખસ્તવ ।
સમાશ્લેષમુપેત્ય ત્વાં કુશલં પરિપૃચ્છતિ ॥

ધૃતરાષ્ટ્રશ્ચ પાઞ્ચાલ્ય ત્વયા સમ્બન્ધમેયિવાન્ ।
કૃતાર્થં મન્યતેત્માનં તથા સર્વેઽપિ કૌરવાઃ ॥

ન તથા રાજ્યસમ્પ્રાપ્તિસ્તેષાં પ્રીતિકરી મતા ।
યથા સમ્બન્ધકં પ્રાપ્ય યજ્ઞસેન ત્વયા સહ ॥

એતદ્વિદિત્વા તુ ભવાન્પ્રસ્થાપયતુ પાણ્ડવાન્ ।
દ્રષ્ટું હિ પાણ્ડુપુત્રાંશ્ચ ત્વરન્તિ કુરવો ભૃશમ્ ॥

વિપ્રોષિતા દીર્ઘકાલમેતે ચાપિ નરર્ષભાઃ ।
ઉત્સુકા નગરં દ્રષ્ટું ભવિષ્યન્તિ તથા પૃથા ॥

કૃષ્ણામપિ ચ પાઞ્ચાલીં સર્વાઃ કુરુવરસ્ત્રિયઃ ।
દ્રષ્ટુકામાઃ પ્રતીક્ષ્તે પુરં ચ વિષયાશ્ચ નઃ ॥

સ ભવાન્પાણ્ડુપુત્રાણામાજ્ઞાપયતુ મા ચિરમ્ ।
ગમનં સહદારાણામેતદત્ર મતં મમ ॥

નિસૃષ્ટેષુ ત્વયા રાજન્પાણ્ડવેષુ મહાત્મસુ । તતોઽહં પ્રેષયિષ્યામિ ધૃતરાષ્ટ્રસ્ય શીઘ્રગાન્ ।
આગમિષ્યન્તિ કૌન્તેયાઃ કુન્તી ચ સહ કૃષ્ણયા ॥