મહાભારત · અધ્યાય 1.130

ધૃતરાષ્ટ્રસ્ય પુત્રાણામાદિતઃ કથિતં ત્વયા ।
ઋષેઃ પ્રસાદાત્તુ શતં ન ચ કન્યા પ્રકીર્તિતા ॥

વૈશ્યાપુત્રો યુયુત્સુશ્ચ કન્યા ચૈકા શતાધિકા ।
ગાન્ધારરાજદુહિતા શતપુત્રેતિ ચાનઘ ॥

ઉક્તા મહર્ષિણા તેન વ્યાસેનામિતતેજસા ।
કથં ત્વિદાનીં ભગવન્કન્યાં ત્વં તુ બ્રવીષિ મે ॥

યદિ ભાગશતં પેશી કૃતા તેન મહર્ષિણા ।
ન પ્રજાસ્યતિ ચેદ્ભૂયઃ સૌબલેયી કથઞ્ચન ॥

કથં તુ સમ્ભવસ્તસ્યા દુઃશલાયા વદસ્વ મે ।
યથાવદિહ વિપ્રર્ષે પરં મેઽત્ર કુતૂહલમ્ ॥
વૈશમ્પાયન ઉવાચ ।

સાધ્વયં પ્રશ્ન ઉદ્દિષ્ટઃ પાણ્ડવેય બ્રવીમિ તે ।
તાં માંસપેશીં ભગવાન્સ્વયમેવ મહાતપાઃ ॥

શીતાભિરદ્ભિરાસિચ્ય ભાગં ભાગમકલ્પયત્ ।
યો યથા કલ્પિતો ભાગસ્તન્ત ધાત્ર્યા તથા નૃપ ॥

ઘૃતપૂર્ણેષુ કુણ્ડેષુ એકૈકં પ્રાક્ષિપત્તદા ।
એતસ્મિન્નન્તરે સાધ્વી ગાન્ધારી સુદૃઢવ્રતા ॥

દુહિતુઃ સ્નેહસંયોગમનુધ્યાય વરાઙ્ગના । નાબ્રવીત્તમૃષિં કિઞ્ચિદ્ગૌરવાચ્ચ યશસ્વિની ।
મનસા ચિન્તયદ્દેવી એતત્પુત્રશતં મમ ॥

ભવિષ્યતિ ન સન્દેહો ન બ્રવીત્યન્યથા મુનિઃ ।
મમેયં પરમા તુષ્ટિર્દુહિતા મે ભવેદ્યદિ ॥

એકા શતાધિકા બાલા ભવિષ્યતિ કનીયસી ।
તતો દૌહિત્રજાલ્લોકાદબાહ્યોઽસૌ પતિર્મમ ॥

અધિકા કિલ નારીણાં પ્રીતિર્જામાતૃજા ભવેત્ ।
યદિ નામ મમાપિ સ્યાદ્દુહિતૈકા શતાધિકા ॥

કૃતકૃત્યા ભવેયં વૈ પુત્રદૌહિત્રસંવૃતા ।
યદિ સત્યં તપસ્તપ્તં દત્તં વાઽપ્યથવા હુતમ્ ॥

ગુરવસ્તોષિતા વાપિ તથાઽસ્તુ દુહિતા મમ ।
એતસ્મિન્નેવ કાલે તુ કૃષ્ણદ્વૈપાયનઃ સ્વયમ્ ॥

વ્યભજત્સ તદા પેશીં ભગવાનૃષિસત્તમઃ ।
ગણ્યમાનેષુ કુણ્ડેષુ શતે પૂર્ણે મહાત્મના ॥

અભવચ્ચાપરં ખણ્ડં વામહસ્તે તદા કિલ । ગણયિત્વા શતં પૂર્ણમંશાનામાહ સૌબલીમ્ ॥
વ્યાસ ઉવાચ ।

પૂર્ણં પુત્રશતં ત્વેતન્ન મિથ્યા વાગુદાહૃતા ।
દૈવયોગાચ્ચ ભાગૈકઃ પરિશિષ્ટઃ શતાત્પરઃ ॥

એષા તે સુભગા કન્યા ભવિષ્યતિ યતેપ્સિતા ।
વૈશમ્પાયન ઉવાચ ।
તતોઽન્યં ઘૃતકુમ્ભં ચ સમાનાય્ય મહાતપાઃ ॥

તં ચાપિ પ્રાક્ષિપત્તત્ર કન્યાભાગં તપોધનઃ ।
સમ્ભૂતા ચૈવ કાલેન સર્વેષાં ચ યવીયસી ॥

ઐતત્તે કથિતં રાજન્દુઃશલાજન્મ ભારત ।
બ્રૂહિ રાજેન્દ્ર કિં ભૂયો વર્તયિષ્યામિ તેઽનઘ ॥