લિઙ્ગપુરાણ · અધ્યાય 1.99

સંભવઃ સૂચિતો દેવ્યાસ્ ત્વયા સૂત મહામતે
સવિસ્તરં વદસ્વાદ્ય સતીત્વે ચ યથાતથમ્ ॥

મેનાજત્વં મહાદેવ્યા દક્ષયજ્ઞવિમર્દનમ્
વિષ્ણુના ચ કથં દત્તા દેવદેવાય શંભવે ॥

કલ્યાણં વા કથં તસ્ય વક્તુમર્હસિ સાંપ્રતમ્
તેષાં તદ્વચનં શ્રુત્વા સૂતઃ પૌરાણિકોત્તમઃ ॥

સંભવં ચ મહાદેવ્યાઃ પ્રાહ તેષાં મહાત્મનામ્
બ્રહ્મણા કથિતં પૂર્વં દણ્ડિને તત્ સુવિસ્તરમ્ ॥

યુષ્માભિર્ વૈ કુમારાય તેન વ્યાસાય ધીમતે
તસ્માદહમુપશ્રુત્ય પ્રવદામિ સુવિસ્તરમ્ ॥

વચનાદ્વો મહાભાગાઃ પ્રણમ્યોમાં તથા ભવમ્
સા ભગાખ્યા જગદ્ધાત્રી લિઙ્ગમૂર્તેસ્ત્રિવેદિકા ॥

લિઙ્ગસ્તુ ભગવાન્દ્વાભ્યાં જગત્સૃષ્ટિર્દ્વિજોત્તમાઃ
લિઙ્ગમૂર્તિઃ શિવો જ્યોતિસ્ તમસશ્ચોપરિ સ્થિતઃ ॥

લિઙ્ગવેદિસમાયોગાદ્ અર્ધનારીશ્વરોભવત્
બ્રહ્માણં વિદધે દેવમ્ અગ્રે પુત્રં ચતુર્મુખમ્ ॥

પ્રાહિણોતિ સ્મ તસ્યૈવ જ્ઞાનં જ્ઞાનમયો હરઃ
વિશ્વાધિકો ઽસૌ ભગવાન્ અર્ધનારીશ્વરો વિભુઃ ॥

હિરણ્યગર્ભં તં દેવો જાયમાનમપશ્યત
સો ઽપિ રુદ્રં મહાદેવં બ્રહ્માપશ્યત શઙ્કરમ્ ॥

તં દૃષ્ટ્વા સંસ્થિતં દેવમ્ અર્ધનારીશ્વરં પ્રભુમ્
તુષ્ટાવ વાગ્ભિર્ ઇષ્ટાભિર્ વરદં વારિજોદ્ભવઃ ॥

વિભજસ્વેતિ વિશ્વેશં વિશ્વાત્માનમજો વિભુઃ
સસર્જ દેવીં વામાઙ્ગાત્ પત્નીં ચૈવાત્મનઃ સમામ્ ॥

શ્રદ્ધા હ્યસ્ય શુભા પત્ની તતઃ પુંસઃ પુરાતની
સૈવાજ્ઞયા વિભોર્દેવી દક્ષપુત્રી બભૂવ હ ॥

સતીસંજ્ઞા તદા સા વૈ રુદ્રમેવાશ્રિતા પતિમ્
દક્ષં વિનિન્દ્ય કાલેન દેવી મૈના હ્યભૂત્પુનઃ ॥

નારદસ્યૈવ દક્ષો ઽપિ શાપાદેવં વિનિન્દ્ય ચ
અવજ્ઞાદુર્મદો દક્ષો દેવદેવમુમાપતિમ્ ॥

અનાદૃત્ય કૃતિં જ્ઞાત્વા સતી દક્ષેણ તત્ક્ષણાત્
ભસ્મીકૃત્વાત્મનો દેહં યોગમાર્ગેણ સા પુનઃ ॥

બભૂવ પાર્વતી દેવી તપસા ચ ગિરેઃ પ્રભોઃ
જ્ઞાત્વૈતદ્ભગવાન્ ભર્ગો દદાહ રુષિતઃ પ્રભુઃ ॥

દક્ષસ્ય વિપુલં યજ્ઞં ચ્યાવનેર્ વચનાદપિ
ચ્યવનસ્ય સુતો ધીમાન્ દધીચ ઇતિ વિશ્રુતઃ ॥

વિજિત્ય વિષ્ણું સમરે પ્રસાદાત્ ત્ર્યંબકસ્ય ચ
વિષ્ણુના લોકપાલાંશ્ ચ શશાપ ચ મુનીશ્વરઃ ॥

રુદ્રસ્ય ક્રોધજેનૈવ વહ્નિના હવિષા સુરાઃ
વિનાશો વૈ ક્ષણાદેવ માયયા શઙ્કરસ્ય વૈ ॥