લિઙ્ગપુરાણ · અધ્યાય 1.100

વિજિત્ય વિષ્ણુના સાર્ધં ભગવાન્પરમેશ્વરઃ
સર્વાન્દધીચવચનાત્ કથં ભેજે મહેશ્વરઃ ॥

દક્ષયજ્ઞે સુવિપુલે દેવાન્ વિષ્ણુપુરોગમાન્
દદાહ ભગવાન્ રુદ્રઃ સર્વાન્ મુનિગણાન્ અપિ ॥

ભદ્રો નામ ગણસ્તેન પ્રેષિતઃ પરમેષ્ઠિના
વિપ્રયોગેન દેવ્યા વૈ દુઃસહેનૈવ સુવ્રતાઃ ॥

સો ઽસૃજદ્ વીરભદ્રશ્ ચ ગણેશાન્રોમજાઞ્છુભાન્
ગણેશ્વરૈઃ સમારુહ્ય રથં ભદ્રઃ પ્રતાપવાન્ ॥

ગન્તું ચક્રે મતિં યસ્ય સારથિર્ભગવાનજઃ
ગણેશ્વરાશ્ ચ તે સર્વે વિવિધાયુધપાણયઃ ॥

વિમાનૈર્વિશ્વતો ભદ્રૈસ્ તમન્વયુરથો સુરાઃ
હિમવચ્છિખરે રમ્યે હેમશૃઙ્ગે સુશોભને ॥

યજ્ઞવાટસ્ તથા તસ્ય ગઙ્ગાદ્વારસમીપતઃ
તદ્દેશે ચૈવ વિખ્યાતં શુભં કનખલં દ્વિજાઃ ॥

દગ્ધું વૈ પ્રેષિતશ્ચાસૌ ભગવાન્ પરમેષ્ઠિના
તદોત્પાતો બભૂવાથ લોકાનાં ભયશંસનઃ ॥

પર્વતાશ્ ચ વ્યશીર્યન્ત પ્રચકમ્પે વસુંધરા
મરુતશ્ ચાપ્ય્ અઘૂર્ણન્ત ચુક્ષુભે મકરાલયઃ ॥

અગ્નયો નૈવ દીપ્યન્તિ ન ચ દીપ્યતિ ભાસ્કરઃ
ગ્રહાશ્ ચ ન પ્રકાશ્યન્તે ન દેવા ન ચ દાનવાઃ ॥

તતઃ ક્ષણાત્ પ્રવિશ્યૈવ યજ્ઞવાટં મહાત્મનઃ
રોમજૈઃ સહિતો ભદ્રઃ કાલાગ્નિરિવચાપરઃ ॥

ઉવાચ ભદ્રો ભગવાન્ દક્ષં ચામિતતેજસમ્
સંપર્કાદેવ દક્ષાદ્ય મુનીન્દેવાન્ પિનાકિના ॥

દગ્ધું સંપ્રેષિતશ્ ચાહં ભવન્તં સમુનીશ્વરૈઃ
ઇત્યુક્ત્વા યજ્ઞશાલાં તાં દદાહ ગણપુઙ્ગવઃ ॥

ગણેશ્વરાશ્ ચ સંક્રુદ્ધા યૂપાનુત્પાટ્ય ચિક્ષિપુઃ
પ્રસ્તોત્રા સહ હોત્રા ચ દગ્ધં ચૈવ ગણેશ્વરૈઃ ॥

ગૃહીત્વા ગણપાઃ સર્વાન્ ગઙ્ગાસ્રોતસિ ચિક્ષિપુઃ
વીરભદ્રો મહાતેજાઃ શક્રસ્યોદ્યચ્છતઃ કરમ્ ॥

વ્યષ્ટમ્ભયદ્ અદીનાત્મા તથાન્યેષાં દિવૌકસામ્
ભગસ્ય નેત્રે ચોત્પાટ્ય કરજાગ્રેણ લીલયા ॥

નિહત્ય મુષ્ટિના દન્તાન્ પૂષ્ણશ્ચૈવં ન્યપાતયત્
તથા ચન્દ્રમસં દેવં પાદાઙ્ગુષ્ઠેન લીલયા ॥

ઘર્ષયામાસ ભગવાન્ વીરભદ્રઃ પ્રતાપવાન્
ચિછેદ ચ શિરસ્તસ્ય શક્રસ્ય ભગવાન્પ્રભોઃ ॥

વહ્નેર્હસ્તદ્વયં છિત્ત્વા જિહ્વામુત્પાટ્ય લીલયા
જઘાન મૂર્ધ્નિ પાદેન વીરભદ્રો મહાબલઃ ॥

યમસ્ય દણ્ડં ભગવાન્ પ્રચિછેદ સ્વયં પ્રભુઃ
જઘાન દેવમીશાનં ત્રિશૂલેન મહાબલમ્ ॥

ત્રયસ્ત્રિંશત્સુરાનેવં વિનિહત્યાપ્રયત્નતઃ
ત્રયશ્ ચ ત્રિશતં તેષાં ત્રિસાહસ્રં ચ લીલયા ॥

ત્રયં ચૈવ સુરેન્દ્રાણાં જઘાન ચ મુનીશ્વરાન્
અન્યાંશ્ ચ દેવાન્ દેવો ઽસૌ સર્વાન્યુદ્ધાય સંસ્થિતાન્ ॥

જઘાન ભગવાન્ રુદ્રઃ ખડ્ગમુષ્ટ્યાદિસાયકૈઃ
અથ વિષ્ણુર્મહાતેજાશ્ ચક્રમ્ ઉદ્યમ્ય મૂર્છિતઃ ॥

યુયોધ ભગવાંસ્તેન રુદ્રેણ સહ માધવઃ
તયોઃ સમભવદ્યુદ્ધં સુઘોરં રોમહર્ષણમ્ ॥

વિષ્ણોર્યોગબલાત્તસ્ય દિવ્યદેહાઃ સુદારુણાઃ ॥

શઙ્ખચક્રગદાહસ્તા અસંખ્યાતાશ્ ચ જજ્ઞિરે
તાન્સર્વાનપિ દેવો ઽસૌ નારાયણસમપ્રભાન્ ॥

નિહત્ય ગદયા વિષ્ણું તાડયામાસ મૂર્ધનિ
તતશ્ચોરસિ તં દેવં લીલયૈવ રણાજિરે ॥

પપાત ચ તદા ભૂમૌ વિસંજ્ઞઃ પુરુષોત્તમઃ
પુનરુત્થાય તં હન્તું ચક્રમુદ્યમ્ય સ પ્રભુઃ ॥

ક્રોધરક્તેક્ષણઃ શ્રીમાન્ અતિષ્ઠત્ પુરુષર્ષભઃ
તસ્ય ચક્રં ચ યદ્રૌદ્રં કાલાદિત્યસમપ્રભમ્ ॥

વ્યષ્ટમ્ભયદ્ અદીનાત્મા કરસ્થં ન ચચાલ સઃ
અતિષ્ઠત્ સ્તમ્ભિતસ્તેન શૃઙ્ગવાનિવ નિશ્ચલઃ ॥

ત્રિભિશ્ ચ ધર્ષિતં શાર્ઙ્ગં ત્રિધાભૂતં પ્રભોસ્તદા
શાર્ઙ્ગકોટિપ્રસઙ્ગાદ્ વૈ ચિછેદ ચ શિરઃ પ્રભોઃ ॥

છિન્નં ચ નિપપાતાસુ શિરસ્તસ્ય રસાતલે
વાયુના પ્રેરિતં ચૈવ પ્રાણજેન પિનાકિના ॥

પ્રવિવેશ તદા ચૈવ તદીયાહવનીયકમ્
તત્ પ્રતિધ્વસ્તકલશં ભગ્નયૂપં સતોરણમ્ ॥

પ્રદીપિતમહાશાલં દૃષ્ટ્વા યજ્ઞો ઽપિ દુદ્રુવે
તં તદા મૃગરૂપેણ ધાવન્તં ગગનં પ્રતિ ॥

વીરભદ્રઃ સમાધાય વિશિરસ્કમથાકરોત્
તતઃ પ્રજાપતિં ધર્મં કશ્યપં ચ જગદ્ગુરુમ્ ॥

અરિષ્ટનેમિનં વીરો બહુપુત્રં મુનીશ્વરમ્
મુનિમ્ અઙ્ગિરસં ચૈવ કૃષ્ણાશ્વં ચ મહાબલઃ ॥

જઘાન મૂર્ધ્નિ પાદેન દક્ષં ચૈવ યશસ્વિનમ્
ચિછેદ ચ શિરસ્તસ્ય દદાહાગ્નૌ દ્વિજોત્તમાઃ ॥

સરસ્વત્યાશ્ ચ નાસાગ્રં દેવમાતુસ્તથૈવ ચ
નિકૃત્ય કરજાગ્રેણ વીરભદ્રઃ પ્રતાપવાન્ ॥

તસ્થૌ શ્રિયા વૃતો મધ્યે પ્રેતસ્થાને યથા ભવઃ
એતસ્મિન્નેવ કાલે તુ ભગવાન્પદ્મસંભવઃ ॥

ભદ્રમાહ મહાતેજાઃ પ્રાર્થયન્પ્રણતઃ પ્રભુઃ
અલં ક્રોધેન વૈ ભદ્ર નષ્ટાશ્ચૈવ દિવૌકસઃ ॥

પ્રસીદ ક્ષમ્યતાં સર્વં રોમજૈઃ સહ સુવ્રત
સો ઽપિ ભદ્રઃ પ્રભાવેણ બ્રહ્મણઃ પરમેષ્ઠિનઃ ॥

શમં જગામ શનકૈઃ શાન્તસ્તસ્થૌ તદાજ્ઞયા
દેવો ઽપિ તત્ર ભગવાન્ અન્તરિક્ષે વૃષધ્વજઃ ॥

સગણઃ સર્વદઃ શર્વઃ સર્વલોકમહેશ્વરઃ
પ્રાર્થિતશ્ચૈવ દેવેન બ્રહ્મણા ભગવાન્ ભવઃ ॥

હતાનાં ચ તદા તેષાં પ્રદદૌ પૂર્વવત્તનુમ્
ઇન્દ્રસ્ય ચ શિરસ્તસ્ય વિષ્ણોશ્ચૈવ મહાત્મનઃ ॥

દક્ષસ્ય ચ મુનીન્દ્રસ્ય તથાન્યેષાં મહેશ્વરઃ
વાગીશ્યાશ્ચૈવ નાસાગ્રં દેવમાતુસ્તથૈવ ચ ॥

નષ્ટાનાં જીવિતં ચૈવ વરાણિ વિવિધાનિ ચ
દક્ષસ્ય ધ્વસ્તવક્ત્રસ્ય શિરસા ભગવાન્પ્રભુઃ ॥

કલ્પયામાસ વૈ વક્ત્રં લીલયા ચ મહાન્ ભવઃ
દક્ષો ઽપિ લબ્ધસંજ્ઞશ્ ચ સમુત્થાય કૃતાઞ્જલિઃ ॥

તુષ્ટાવ દેવદેવેશં શઙ્કરં વૃષભધ્વજમ્
સ્તુતસ્તેન મહાતેજાઃ પ્રદાય વિવિધાન્વરાન્ ॥

ગાણપત્યં દદૌ તસ્મૈ દક્ષાયાક્લિષ્ટકર્મણે
દેવાશ્ ચ સર્વે દેવેશં તુષ્ટુવુઃ પરમેશ્વરમ્ ॥

નારાયણશ્ ચ ભગવાન્ તુષ્ટાવ ચ કૃતાઞ્જલિઃ
બ્રહ્મા ચ મુનયઃ સર્વે પૃથક્પૃથગજોદ્ભવમ્ ॥

તુષ્ટુવુર્ દેવદેવેશં નીલકણ્ઠં વૃષધ્વજમ્
તાન્ દેવાન્ અનુગૃહ્યૈવ ભવો ઽપ્યન્તરધીયત ॥