લિઙ્ગપુરાણ · અધ્યાય 1.87

નિશમ્ય તે મહાપ્રાજ્ઞાઃ કુમારાદ્યાઃ પિનાકિનમ્
પ્રોચુઃ પ્રણમ્ય વૈ ભીતાઃ પ્રસન્નં પરમેશ્વરમ્ ॥

એવં ચેદનયા દેવ્યા હૈમવત્યા મહેશ્વર
ક્રીડસે વિવિધૈર્ભોગૈઃ કથં વક્તુમિહાર્હસિ ॥

એવમુક્તઃ પ્રહસ્યેશઃ પિનાકી નીલલોહિતઃ
પ્રાહ તામ્ અંબિકાં પ્રેક્ષ્ય પ્રણિપત્ય સ્થિતાન્ દ્વિજાન્ ॥

બન્ધમોક્ષૌ ન ચૈવેહ મમ સ્વેચ્છા શરીરિણઃ
અકર્તજ્ઞઃ પશુર્જીવો વિભુર્ભોક્તા હ્યણુઃ પુમાન્ ॥

માયી ચ માયયા બદ્ધઃ કર્મભિર્ યુજ્યતે તુ સઃ
જ્ઞાનં ધ્યાનં ચ બન્ધશ્ ચ મોક્ષો નાસ્ત્યાત્મનો દ્વિજાઃ ॥

યદૈવં મયિ વિદ્વાન્ યસ્ તસ્યાપિ ન ચ સર્વતઃ
એષા વિદ્યા હ્યહં વેદ્યઃ પ્રજ્ઞૈષા ચ શ્રુતિઃ સ્મૃતિઃ ॥

ધૃતિરેષા મયા નિષ્ઠા જ્ઞાનશક્તિઃ ક્રિયા તથા
ઇચ્છાખ્યા ચ તથા હ્યાજ્ઞા દ્વે વિદ્યે ન ચ સંશયઃ ॥

ન હ્યેષા પ્રકૃતિર્જૈવી વિકૃતિશ્ ચ વિચારતઃ
વિકારો નૈવ માયૈષા સદસદ્વ્યક્તિવર્જિતા ॥

પુરા મમાજ્ઞા મદ્વક્ત્રાત્ સમુત્પન્ના સનાતની
પઞ્ચવક્ત્રા મહાભાગા જગતામભયપ્રદા ॥

તામાજ્ઞાં સમ્પ્રવિશ્યાહં ચિન્તયન્ જગતાં હિતમ્
સપ્તવિંશત્પ્રકારેણ સર્વં વ્યાપ્યાનયા શિવઃ ॥

તદાપ્રભૃતિ વૈ મોક્ષ પ્રવૃત્તિર્દ્વિજસત્તમાઃ
એવમુક્ત્વા તદાપશ્યદ્ ભવાનીં પરમેશ્વરઃ ॥

ભવાની ચ તમાલોક્ય માયામહરદવ્યયા
તે માયામલનિર્મુક્તા મુનયઃ પ્રેક્ષ્ય પાર્વતીમ્ ॥

પ્રીતા બભૂવુર્મુક્તાશ્ ચ તસ્માદેષા પરા ગતિઃ
ઉમાશઙ્કરયોર્ભેદો નાસ્ત્યેવ પરમાર્થતઃ ॥

દ્વિધાસૌ રૂપમાસ્થાય સ્થિત એવ ન સંશયઃ
યદા વિદ્વાનસંગઃ સ્યાદ્ આજ્ઞયા પરમેષ્ઠિનઃ ॥

તદા મુક્તિઃ ક્ષણાદેવ નાન્યથા કર્મકોટિભિઃ
ક્રમો ઽવિવક્ષિતો ભૂત વિવૃદ્ધઃ પરમેષ્ઠિનઃ ॥

પ્રસાદેન ક્ષણાન્મુક્તિઃ પ્રતિજ્ઞૈષા ન સંશયઃ
ગર્ભસ્થો જાયમાનો વા બાલો વા તરુણો ઽપિ વા ॥

વૃદ્ધો વા મુચ્યતે જન્તુઃ પ્રસાદાત્પરમેષ્ઠિનઃ
અણ્ડજશ્ ચોદ્ભિજ્જો વાપિ સ્વેદજો વાપિ મુચ્યતે ॥

પ્રસાદાદ્દેવદેવસ્ય નાત્ર કાર્યા વિચારણા
એષ એવ જગન્નાથો બન્ધમોક્ષકરઃ શિવઃ ॥

ભૂર્ભૂવઃસ્વર્મહશ્ ચૈવ જનઃ સાક્ષાત્તપઃ સ્વયમ્
સત્યલોકસ્ તથાણ્ડાનાં કોટિકોટિશતાનિ ચ ॥

વિગ્રહં દેવદેવસ્ય તથાણ્ડાવરણાષ્ટકમ્
સપ્તદ્વીપેષુ સર્વેષુ પર્વતેષુ વનેષુ ચ ॥

સમુદ્રેષુ ચ સર્વેષુ વાયુસ્કન્ધેષુ સર્વતઃ
તથાન્યેષુ ચ લોકેષુ વસન્તિ ચ ચરાચરાઃ ॥

સર્વે ભવાંશજા નૂનં ગતિસ્ત્વેષાં સ એવ વૈ
સર્વો રુદ્રો નમસ્તસ્મૈ પુરુષાય મહાત્મને ॥

વિશ્વં ભૂતં તથા જાતં બહુધા રુદ્ર એવ સઃ
રુદ્રાજ્ઞૈષા સ્થિતા દેવી હ્ય્ અનયા મુક્તિરંબિકા ॥

ઇત્યેવં ખેચરાઃ સિદ્ધા જજલ્પુઃ પ્રીતમાનસાઃ
યદાવલોક્ય તાન્ સર્વાન્ પ્રસાદાદનયાંબિકા ॥

તદા તિષ્ઠન્તિ સાયુજ્યં પ્રાપ્તાસ્તે ખેચરાઃ પ્રભોઃ ॥