લિઙ્ગપુરાણ · અધ્યાય 1.82

વ્યપોહનસ્તવં વક્ષ્યે સર્વસિદ્ધિપ્રદં શુભમ્
નન્દિનશ્ ચ મુખાચ્છ્રુત્વા કુમારેણ મહાત્મના ॥

વ્યાસાય કથિતં તસ્માદ્ બહુમાનેન વૈ મયા
નમઃ શિવાય શુદ્ધાય નિર્મલાય યશસ્વિને ॥

દુષ્ટાન્તકાય સર્વાય ભવાય પરમાત્મને
પઞ્ચવક્ત્રો દશભુજો હ્ય્ અક્ષપઞ્ચદશૈર્યુતઃ ॥

શુદ્ધસ્ફટિકસંકાશઃ સર્વાભરણભૂષિતઃ
સર્વજ્ઞઃ સર્વગઃ શાન્તઃ સર્વોપરિ સુસંસ્થિતઃ ॥

પદ્માસનસ્થઃ સોમેશઃ પાપમાશુ વ્યપોહતુ
ઈશાનઃ પુરુષશ્ચૈવ અઘોરઃ સદ્ય એવ ચ ॥

વામદેવશ્ ચ ભગવાન્ પાપમાશુ વ્યપોહતુ
અનન્તઃ સર્વવિદ્યેશઃ સર્વજ્ઞઃ સર્વદઃ પ્રભુઃ ॥

શિવધ્યાનૈકસમ્પન્નઃ સ મે પાપં વ્યપોહતુ
સૂક્ષ્મઃ સુરાસુરેશાનો વિશ્વેશો ગણપૂજિતઃ ॥

શિવધ્યાનૈકસમ્પન્નઃ સ મે પાપં વ્યપોહતુ
શિવોત્તમો મહાપૂજ્યઃ શિવધ્યાનપરાયણઃ ॥

સર્વગઃ સર્વદઃ શાન્તઃ સ મે પાપં વ્યપોહતુ
એકાક્ષો ભગવાનીશઃ શિવાર્ચનપરાયણઃ ॥

શિવધ્યાનૈકસમ્પન્નઃ સ મે પાપં વ્યપોહતુ
ત્રિમૂર્તિર્ ભગવાન્ ઈશઃ શિવભક્તિપ્રબોધકઃ ॥

શિવધ્યાનૈકસમ્પન્નઃ સ મે પાપં વ્યપોહતુ
શ્રીકણ્ઠઃ શ્રીપતિઃ શ્રીમાઞ્ શિવધ્યાનરતઃ સદા ॥

શિવાર્ચનરતઃ શ્રીમાન્ સ મે પાપં વ્યપોહતુ
ત્રૈલોક્યનમિતા દેવી સોલ્કાકારા પુરાતની ॥

શિવાર્ચનરતઃ શ્રીમાન્ સ મે પાપં વ્યપોહતુ
ત્રૈલોક્યનમિતા દેવી સોલ્કાકારા પુરાતની ॥

દાક્ષાયણી મહાદેવી ગૌરી હૈમવતી શુભા
એકપર્ણાગ્રજા સૌમ્યા તથા વૈ ચૈકપાટલા ॥

અપર્ણા વરદા દેવી વરદાનૈકતત્પરા
ઉમા સુરહરા સાક્ષાત્ કૌશિકી વા કપર્દિની ॥

ખટ્વાઙ્ગધારિણી દિવ્યા કરાગ્રતરુપલ્લવા
નૈગમેયાદિભિર્ દિવ્યૈશ્ ચતુર્ભિઃ પુત્રકૈર્વૃતા ॥

મેનાયા નન્દિની દેવી વારિજા વારિજેક્ષણા
અંબાયા વીતશોકસ્ય નન્દિનશ્ ચ મહાત્મનઃ ॥

શુભાવત્યાઃ સખી શાન્તા પઞ્ચચૂડા વરપ્રદા
સૃષ્ટ્યર્થં સર્વભૂતાનાં પ્રકૃતિત્વં ગતાવ્યયા ॥

ત્રયોવિંશતિભિસ્ તત્ત્વૈર્ મહદાદ્યૈર્ વિજૃમ્ભિતા
લક્ષ્મ્યાદિશક્તિભિર્ નિત્યં નમિતા નન્દનન્દિની ॥

મનોન્મની મહાદેવી માયાવી મણ્ડનપ્રિયા
માયયા યા જગત્સર્વં બ્રહ્માદ્યં સચરાચરમ્ ॥

ક્ષોભિણી મોહિની નિત્યં યોગિનાં હૃદિ સંસ્થિતા
એકાનેકસ્થિતા લોકે ઇન્દીવરનિભેક્ષણા ॥

ભક્ત્યા પરમયા નિત્યં સર્વદેવૈરભિષ્ટુતા
ગણેન્દ્રામ્ભોજગર્ભેન્દ્ર યમવિત્તેશપૂર્વકૈઃ ॥

સંસ્તુતા જનની તેષાં સર્વોપદ્રવનાશિની
ભક્તાનામાર્તિહા ભવ્યા ભવભાવવિનાશની ॥

ભુક્તિમુક્તિપ્રદા દિવ્યા ભક્તાનામપ્રયત્નતઃ
સા મે સાક્ષાન્મહાદેવી પાપમ્ આશુ વ્યપોહતુ ॥

ચણ્ડઃ સર્વગણેશાનો મુખાચ્છંભોર્વિનિર્ગતઃ
શિવાર્ચનરતઃ શ્રીમાન્ સ મે પાપં વ્યપોહતુ ॥

શાલઙ્કાયનપુત્રસ્તુ હલમાર્ગોત્થિતઃ પ્રભુઃ
જામાતા મરુતાં દેવઃ સર્વભૂતમહેશ્વરઃ ॥

સર્વગઃ સર્વદૃક્ શર્વઃ સર્વેશસદૃશઃ પ્રભુઃ
સનારાયણકૈર્ દેવૈઃ સેન્દ્રચન્દ્રદિવાકરૈઃ ॥

સિદ્ધૈશ્ ચ યક્ષગન્ધર્વૈર્ ભૂતૈર્ભૂતવિધાયકૈઃ
ઉરગૈરૃષિભિશ્ચૈવ બ્રહ્મણા ચ મહાત્મના ॥

સ્તુતસ્ત્રૈલોક્યનાથસ્તુ મુનિરન્તઃ પુરં સ્થિતઃ
સર્વદા પૂજિતઃ સર્વૈર્ નન્દી પાપં વ્યપોહતુ ॥

મહાકાયો મહાતેજા મહાદેવ ઇવાપરઃ
શિવાર્ચનરતઃ શ્રીમાન્ સ મે પાપં વ્યપોહતુ ॥

મેરુમન્દારકૈલાસ તટકૂટપ્રભેદનઃ
ઐરાવતાદિભિર્ દિવ્યૈર્ દિગ્ગજૈશ્ ચ સુપૂજિતઃ ॥

સપ્તપાતાલપાદશ્ ચ સપ્તદ્વીપોરુજઙ્ઘકઃ
સપ્તાર્ણવાઙ્કુશશ્ચૈવ સર્વતીર્થોદરઃ શિવઃ ॥

આકાશદેહો દિગ્બાહુઃ સોમસૂર્યાગ્નિલોચનઃ
હતાસુરમહાવૃક્ષો બ્રહ્મવિદ્યામહોત્કટઃ ॥

બ્રહ્માદ્યાધોરણૈર્ દિવ્યૈર્ યોગપાશસમન્વિતૈઃ
બદ્ધો હૃત્પુણ્ડરીકાખ્યે સ્તંભે વૃત્તિં નિરુધ્ય ચ ॥

નાગેન્દ્રવક્ત્રો યઃ સાક્ષાદ્ ગણકોટિશતૈર્વૃતઃ
શિવધ્યાનૈકસમ્પન્નઃ સ મે પાપં વ્યપોહતુ ॥

ભૃઙ્ગીશઃ પિઙ્ગલાક્ષો ઽસૌ ભસિતાશસ્તુ દેહયુક્
શિવાર્ચનરતઃ શ્રીમાન્ સ મે પાપં વ્યપોહતુ ॥

ચતુર્ભિસ્તનુભિર્ નિત્યં સર્વાસુરનિબર્હણઃ
સ્કન્દઃ શક્તિધરઃ શાન્તઃ સેનાનીઃ શિખિવાહનઃ ॥

દેવસેનાપતિઃ શ્રીમાન્ સ મે પાપં વ્યપોહતુ
ભવઃ શર્વસ્તથેશાનો રુદ્રઃ પશુપતિસ્ તથા ॥

ઉગ્રો ભીમો મહાદેવઃ શિવાર્ચનરતઃ સદા
એતાઃ પાપં વ્યપોહન્તુ મૂર્તયઃ પરમેષ્ઠિનઃ ॥

મહાદેવઃ શિવો રુદ્રઃ શઙ્કરો નીલલોહિતઃ
ઈશાનો વિજયો ભીમો દેવદેવો ભવોદ્ભવઃ ॥

કપાલીશશ્ ચ વિજ્ઞેયો રુદ્રા રુદ્રાંશસંભવાઃ
શિવપ્રણામસમ્પન્ના વ્યપોહન્તુ મલં મમ ॥

વિકર્તનો વિવસ્વાંશ્ ચ માર્તણ્ડો ભાસ્કરો રવિઃ
લોકપ્રકાશકશ્ચૈવ લોકસાક્ષીત્રિવિક્રમઃ ॥

આદિત્યશ્ ચ તથા સૂર્યશ્ ચાંશુમાંશ્ ચ દિવાકરઃ
એતે વૈ દ્વાદશાદિત્યા વ્યપોહન્તુ મલં મમ ॥

ગગનં સ્પર્શનં તેજો રસશ્ ચ પૃથિવી તથા
ચન્દ્રઃ સૂર્યસ્તથાત્મા ચ તનવઃ શિવભાષિતાઃ ॥

પાપં વ્યપોહન્તુ મમ ભયં નિર્ણાશયન્તુ મે
વાસવઃ પાવકશ્ચૈવ યમો નિરૃતિરેવ ચ ॥

વરુણો વાયુસોમૌ ચ ઈશાનો ભગવાન્ હરિઃ
પિતામહશ્ ચ ભગવાન્ શિવધ્યાનપરાયણઃ ॥

એતે પાપં વ્યપોહન્તુ મનસા કર્મણા કૃતમ્
નભસ્વાન્સ્પર્શનો વાયુર્ અનિલો મારુતસ્ તથા ॥

પ્રાણઃ પ્રાણેશજીવેશૌ મારુતઃ શિવભાષિતાઃ
શિવાર્ચનરતાઃ સર્વે વ્યપોહન્તુ મલં મમ ॥

ખેચરી વસુચારી ચ બ્રહ્મેશો બ્રહ્મબ્રહ્મધીઃ
સુષેણઃ શાશ્વતઃ પૃષ્ટઃ સુપુષ્ટશ્ ચ મહાબલઃ ॥

એતે વૈ ચારણાઃ શંભોઃ પૂજયાતીવ ભાવિતાઃ
વ્યપોહન્તુ મલં સર્વં પાપં ચૈવ મયા કૃતમ્ ॥

મન્ત્રજ્ઞો મન્ત્રવિત્ પ્રાજ્ઞો મન્ત્રરાટ્ સિદ્ધપૂજિતઃ
સિદ્ધવત્પરમઃ સિદ્ધઃ સર્વસિદ્ધિપ્રદાયિનઃ ॥

વ્યપોહન્તુ મલં સર્વે સિદ્ધાઃ શિવપદાર્ચકાઃ
યક્ષો યક્ષેશધનદો જૃમ્ભકો મણિભદ્રકઃ ॥

પૂર્ણભદ્રેશ્વરો માલી શિતિકુણ્ડલિરેવ ચ
નરેન્દ્રશ્ચૈવ યક્ષેશા વ્યપોહન્તુ મલં મમ ॥

અનન્તઃ કુલિકશ્ચૈવ વાસુકિસ્તક્ષકસ્તથા
કર્કોટકો મહાપદ્મઃ શઙ્ખપાલો મહાબલઃ ॥

શિવપ્રણામસમ્પન્નાઃ શિવદેહપ્રભૂષણાઃ
મમ પાપં વ્યપોહન્તુ વિષં સ્થાવરજઙ્ગમમ્ ॥

વીણાજ્ઞઃ કિન્નરશ્ચૈવ સુરસેનઃ પ્રમર્દનઃ
અતીશયઃ સ પ્રયોગી ગીતજ્ઞશ્ચૈવ કિન્નરાઃ ॥

શિવપ્રણામસમ્પન્ના વ્યપોહન્તુ મલં મમ
વિદ્યાધરશ્ ચ વિબુધો વિદ્યારાશિર્વિદાં વરઃ ॥

વિબુદ્ધો વિબુધઃ શ્રીમાન્ કૃતજ્ઞશ્ ચ મહાયશાઃ
એતે વિદ્યાધરાઃ સર્વે શિવધ્યાનપરાયણાઃ ॥

વ્યપોહન્તુ મલં ઘોરં મહાદેવપ્રસાદતઃ
વામદેવી મહાજમ્ભઃ કાલનેમિર્મહાબલઃ ॥

સુગ્રીવો મર્દકશ્ચૈવ પિઙ્ગલો દેવમર્દનઃ
પ્રહ્રાદશ્ચાપ્યનુહ્રાદઃ સંહ્રાદઃ કિલ બાષ્કલૌ ॥

જમ્ભઃ કુંભશ્ ચ માયાવી કાર્તવીર્યઃ કૃતંજયઃ
એતે ઽસુરા મહાત્માનો મહાદેવપરાયણાઃ ॥

વ્યપોહન્તુ ભયં ઘોરમ્ આસુરં ભાવમેવ ચ
ગરુત્માન્ ખગતિશ્ચૈવ પક્ષિરાટ્ નાગમર્દનઃ ॥

નાગશત્રુર્ હિરણ્યાઙ્ગો વૈનતેયઃ પ્રભઞ્જનઃ
નાગાશીર્વિષનાશશ્ ચ વિષ્ણુવાહન એવ ચ ॥

એતે હિરણ્યવર્ણાભા ગરુડા વિષ્ણુવાહનાઃ
નાનાભરણસમ્પન્ના વ્યપોહન્તુ મલં મમ ॥

અગસ્ત્યશ્ ચ વસિષ્ઠશ્ ચ અઙ્ગિરા ભૃગુરેવ ચ
કાશ્યપો નારદશ્ચૈવ દધીચશ્ચ્યવનસ્ તથા ॥

ઉપમન્યુસ્તથાન્યે ચ ઋષયઃ શિવભાવિતાઃ
શિવાર્ચનરતાઃ સર્વે વ્યપોહન્તુ મલં મમ ॥

પિતરઃ પિતામહાશ્ ચ તથૈવ પ્રપિતામહાઃ
અગ્નિષ્વાત્તા બર્હિષદસ્ તથા માતામહાદયઃ ॥

વ્યપોહન્તુ ભયં પાપં શિવધ્યાનપરાયણાઃ
લક્ષ્મીશ્ ચ ધરણી ચૈવ ગાયત્રી ચ સરસ્વતી ॥

દુર્ગા ઉષા શચી જ્યેષ્ઠા માતરઃ સુરપૂજિતાઃ
દેવાનાં માતરશ્ ચૈવ ગણાનાં માતરસ્ તથા ॥

ભૂતાનાં માતરઃ સર્વા યત્ર યા ગણમાતરઃ
પ્રસાદાદ્દેવદેવસ્ય વ્યપોહન્તુ મલં મમ ॥

ઉર્વશી મેનકા ચૈવ રંભા રતિતિલોત્તમાઃ
સુમુખી દુર્મુખી ચૈવ કામુકી કામવર્ધની ॥

તથાન્યાઃ સર્વલોકેષુ દિવ્યાશ્ચાપ્સરસસ્ તથા
શિવાય તાણ્ડવં નિત્યં કુર્વન્ત્યો ઽતીવ ભાવિતાઃ ॥

દેવ્યઃ શિવાર્ચનરતા વ્યપોહન્તુ મલં મમ
અર્કઃ સોમો ઽઙ્ગારકશ્ ચ બુધશ્ચૈવ બૃહસ્પતિઃ ॥

શુક્રઃ શનૈશ્ચરશ્ચૈવ રાહુઃ કેતુસ્તથૈવ ચ
વ્યપોહન્તુ ભયં ઘોરં ગ્રહપીડાં શિવાર્ચકાઃ ॥

મેષો વૃષો ઽથ મિથુનસ્ તથા કર્કટકઃ શુભઃ
સિંહશ્ ચ કન્યા વિપુલા તુલા વૈ વૃશ્ચિકસ્ તથા ॥

ધનુશ્ ચ મકરશ્ચૈવ કુંભો મીનસ્તથૈવ ચ
રાશયો દ્વાદશ હ્યેતે શિવપૂજાપરાયણાઃ ॥

વ્યપોહન્તુ ભયં પાપં પ્રસાદાત્પરમેષ્ઠિનઃ
અશ્વિની ભરણી ચૈવ કૃત્તિકા રોહિણી તથા ॥

શ્રીમન્મૃગશિરશ્ચાર્દ્રા પુનર્વસુપુષ્યસાર્પકાઃ
મઘા વૈ પૂર્વફાલ્ગુન્ય ઉત્તરાફાલ્ગુની તથા ॥

હસ્તચિત્રા તથા સ્વાતી વિશાખા ચાનુરાધિકા
જ્યેષ્ઠા મૂલં મહાભાગા પૂર્વાષાઢા તથૈવ ચ ॥

ઉત્તરાષાઢિકા ચૈવ શ્રવણં ચ શ્રવિષ્ઠિકા
શતભિષક્ પૂર્વભદ્રા તથા પ્રોષ્ઠપદા તથા ॥

પૌષ્ણં ચ દેવ્યઃ સતતં વ્યપોહન્તુ મલં મમ
જ્વરઃ કુમ્ભોદરશ્ચૈવ શઙ્કુકર્ણો મહાબલઃ ॥

મહાકર્ણઃ પ્રભાતશ્ ચ મહાભૂતપ્રમર્દનઃ
શ્યેનજિચ્છિવદૂતશ્ ચ પ્રમથાઃ પ્રીતિવર્ધનાઃ ॥

કોટિકોટિશતૈશ્ચૈવ ભૂતાનાં માતરઃ સદા
વ્યપોહન્તુ ભયં પાપં મહાદેવપ્રસાદતઃ ॥

શિવધ્યાનૈકસમ્પન્નો હિમરાડ્ અંબુસન્નિભઃ
કુન્દેન્દુસદૃશાકારઃ કુંભકુન્દેન્દુભૂષણઃ ॥

વડવાનલશત્રુર્યો વડવામુખભેદનઃ
ચતુષ્પાદસમાયુક્તઃ ક્ષીરોદ ઇવ પાણ્ડુરઃ ॥

રુદ્રલોકે સ્થિતો નિત્યં રુદ્રૈઃ સાર્ધં ગણેશ્વરૈઃ
વૃષેન્દ્રો વિશ્વધૃગ્ દેવો વિશ્વસ્ય જગતઃ પિતા ॥

વૃતો નન્દાદિભિર્ નિત્યં માતૃભિર્ મખમર્દનઃ
શિવાર્ચનરતો નિત્યં સ મે પાપં વ્યપોહતુ ॥

ગઙ્ગા માતા જગન્માતા રુદ્રલોકે વ્યવસ્થિતા
શિવભક્તા તુ યા નન્દા સા મે પાપં વ્યપોહતુ ॥

ભદ્રા ભદ્રપદા દેવી શિવલોકે વ્યવસ્થિતા
માતા ગવાં મહાભાગા સા મે પાપં વ્યપોહતુ ॥

સુરભિઃ સર્વતોભદ્રા સર્વપાપપ્રણાશની
રુદ્રપૂજારતા નિત્યં સા મે પાપં વ્યપોહતુ ॥

સુશીલા શીલસમ્પન્ના શ્રીપ્રદા શિવભાવિતા
શિવલોકે સ્થિતા નિત્યં સા મે પાપં વ્યપોહતુ ॥

વેદશાસ્ત્રાર્થતત્ત્વજ્ઞઃ સર્વકાર્યાભિચિન્તકઃ
સમસ્તગુણસમ્પન્નઃ સર્વદેવેશ્વરાત્મજઃ ॥

જ્યેષ્ઠઃ સર્વેશ્વરઃ સૌમ્યો મહાવિષ્ણુતનુઃ સ્વયમ્
આર્યઃ સેનાપતિઃ સાક્ષાદ્ ગહનો મખમર્દનઃ ॥

ઐરાવતગજારૂઢઃ કૃષ્ણકુઞ્ચિતમૂર્ધજઃ
કૃષ્ણાઙ્ગો રક્તનયનઃ શશિપન્નગભૂષણઃ ॥

ભૂતૈઃ પ્રેતૈઃ પિશાચૈશ્ ચ કૂષ્માણ્ડૈશ્ ચ સમાવૃતઃ
શિવાર્ચનરતઃ સાક્ષાત્ સ મે પાપં વ્યપોહતુ ॥

બ્રહ્માણી ચૈવ માહેશી કૌમારી વૈષ્ણવી તથા
વારાહી ચૈવ માહેન્દ્રી ચામુણ્ડાગ્નેયિકા તથા ॥

એતા વૈ માતરઃ સર્વાઃ સર્વલોકપ્રપૂજિતાઃ
યોગિનીભિર્ મહાપાપં વ્યપોહન્તુ સમાહિતાઃ ॥

વીરભદ્રો મહાતેજા હિમકુન્દેન્દુસન્નિભઃ
રુદ્રસ્ય તનયો રૌદ્રઃ શૂલાસક્તમહાકરઃ ॥

સહસ્રબાહુઃ સર્વજ્ઞઃ સર્વાયુધધરઃ સ્વયમ્
ત્રેતાગ્નિનયનો દેવસ્ ત્રૈલોક્યાભયદઃ પ્રભુઃ ॥

માતૄણાં રક્ષકો નિત્યં મહાવૃષભવાહનઃ
ત્રૈલોક્યનમિતઃ શ્રીમાન્ શિવપાદાર્ચને રતઃ ॥

યજ્ઞસ્ય ચ શિરશ્છેત્તા પૂષ્ણો દન્તવિનાશનઃ
વહ્નેર્હસ્તહરઃ સાક્ષાદ્ ભગનેત્રનિપાતનઃ ॥

પાદાઙ્ગુષ્ઠેન સોમાઙ્ગ પેષકઃ પ્રભુસંજ્ઞકઃ
ઉપેન્દ્રેન્દ્રયમાદીનાં દેવાનામઙ્ગરક્ષકઃ ॥

સરસ્વત્યા મહાદેવ્યા નાસિકોષ્ઠાવકર્તનઃ
ગણેશ્વરો યઃ સેનાનીઃ સ મે પાપં વ્યપોહતુ ॥

જ્યેષ્ઠા વરિષ્ઠા વરદા વરાભરણભૂષિતા
મહાલક્ષ્મીર્જગન્માતા સા મે પાપં વ્યપોહતુ ॥

મહામોહા મહાભાગા મહાભૂતગણૈર્વૃતા
શિવાર્ચનરતા નિત્યં સા મે પાપં વ્યપોહતુ ॥

લક્ષ્મીઃ સર્વગુણોપેતા સર્વલક્ષણસંયુતા
સર્વદા સર્વગા દેવી સા મે પાપં વ્યપોહતુ ॥

સિંહારૂઢા મહાદેવી પાર્વત્યાસ્તનયાવ્યયા
વિષ્ણોર્નિદ્રા મહામાયા વૈષ્ણવી સુરપૂજિતા ॥

ત્રિનેત્રા વરદા દેવી મહિષાસુરમર્દિની
શિવાર્ચનરતા દુર્ગા સા મે પાપં વ્યપોહતુ ॥

બ્રહ્માણ્ડધારકા રુદ્રાઃ સર્વલોકપ્રપૂજિતાઃ
સત્યાશ્ ચ માનસાઃ સર્વે વ્યપોહન્તુ ભયં મમ ॥

ભૂતાઃ પ્રેતાઃ પિશાચાશ્ ચ કૂષ્માણ્ડગણનાયકાઃ
કૂષ્માણ્ડકાશ્ ચ તે પાપં વ્યપોહન્તુ સમાહિતાઃ ॥

અનેન દેવં સ્તુત્વા તુ ચાન્તે સર્વં સમાપયેત્
પ્રણમ્ય શિરસા ભૂમૌ પ્રતિમાસે દ્વિજોત્તમાઃ ॥

વ્યપોહનસ્તવં દિવ્યં યઃ પઠેચ્છૃણુયાદપિ
વિધૂય સર્વપાપાનિ રુદ્રલોકે મહીયતે ॥

કન્યાર્થી લભતે કન્યાં જયકામો જયં લભેત્
અર્થકામો લભેદર્થં પુત્રકામો બહૂન્ સુતાન્ ॥

વિદ્યાર્થી લભતે વિદ્યાં ભોગાર્થી ભોગમાપ્નુયાત્
યાન્યાન્પ્રાર્થયતે કામાન્ માનવઃ શ્રવણાદિહ ॥

તાન્સર્વાન્ શીઘ્રમાપ્નોતિ દેવાનાં ચ પ્રિયો ભવેત્
પઠ્યમાનમિદં પુણ્યં યમુદ્દિશ્ય તુ પઠ્યતે ॥

તસ્ય રોગા ન બાધન્તે વાતપિત્તાદિસંભવાઃ
નાકાલે મરણં તસ્ય ન સર્પૈરપિ દશ્યતે ॥

યત્પુણ્યં ચૈવ તીર્થાનાં યજ્ઞાનાં ચૈવ યત્ફલમ્
દાનાનાં ચૈવ યત્પુણ્યં વ્રતાનાં ચ વિશેષતઃ ॥

તત્પુણ્યં કોટિગુણિતં જપ્ત્વા ચાપ્નોતિ માનવઃ
ગોઘ્નશ્ચૈવ કૃતઘ્નશ્ ચ વીરહા બ્રહ્મહા ભવેત્ ॥

શરણાગતઘાતી ચ મિત્રવિશ્વાસઘાતકઃ
દુષ્ટઃ પાપસમાચારો માતૃહા પિતૃહા તથા ॥

વ્યપોહ્ય સર્વપાપાનિ શિવલોકે મહીયતે ॥