લિઙ્ગપુરાણ · અધ્યાય 1.79

કથં પૂજ્યો મહાદેવો મર્ત્યૈર્મન્દૈર્મહામતે
કલ્પાયુષૈર્ અલ્પવીર્યૈર્ અલ્પસત્ત્વૈઃ પ્રજાપતિઃ ॥

સંવત્સરસહસ્રૈશ્ ચ તપસા પૂજ્ય શઙ્કરમ્
ન પશ્યન્તિ સુરાશ્ચાપિ કથં દેવં યજન્તિ તે ॥

કથિતં તથ્યમ્ એવાત્ર યુષ્માભિર્ મુનિપુઙ્ગવાઃ
તથાપિ શ્રદ્ધયા દૃશ્યઃ પૂજ્યઃ સંભાષ્ય એવ ચ ॥

પ્રસંગાચ્ચૈવ સમ્પૂજ્ય ભક્તિહીનૈરપિ દ્વિજાઃ
ભાવાનુરૂપફલદો ભગવાનિતિ કીર્તિતઃ ॥

ઉચ્છિષ્ટઃ પૂજયન્યાતિ પૈશાચં તુ દ્વિજાધમઃ
સંક્રુદ્ધો રાક્ષસં સ્થાનં પ્રાપ્નુયાન્ મૂઢધીર્ દ્વિજાઃ ॥

અભક્ષ્યભક્ષી સમ્પૂજ્ય યાક્ષં પ્રાપ્નોતિ દુર્જનઃ
ગાનશીલશ્ ચ ગાન્ધર્વં નૃત્યશીલસ્તથૈવ ચ ॥

ખ્યાતિશીલસ્ તથા ચાન્દ્રં સ્ત્રીષુ સક્તો નરાધમઃ
મદાર્તઃ પૂજયન્ રુદ્રં સોમસ્થાનમવાપ્નુયાત્ ॥

ગાયત્ર્યા દેવમભ્યર્ચ્ય પ્રાજાપત્યમવાપ્નુયાત્
બ્રાહ્મં હિ પ્રણવેનૈવ વૈષ્ણવં ચાભિનન્દ્ય ચ ॥

શ્રદ્ધયા સકૃદેવાપિ સમભ્યર્ચ્ય મહેશ્વરમ્
રુદ્રલોકમનુપ્રાપ્ય રુદ્રૈઃ સાર્ધં પ્રમોદતે ॥

સંશોધ્ય ચ શુભં લિઙ્ગમ્ અમરાસુરપૂજિતમ્
જલૈઃ પૂતૈસ્તથા પીઠે દેવમાવાહ્ય ભક્તિતઃ ॥

દૃષ્ટ્વા દેવં યથાન્યાયં પ્રણિપત્ય ચ શઙ્કરમ્
કલ્પિતે ચાસને સ્થાપ્ય ધર્મજ્ઞાનમયે શુભે ॥

વૈરાગ્યૈશ્વર્યસમ્પન્ને સર્વલોકનમસ્કૃતે
ઓઙ્કારપદ્મમધ્યે તુ સોમસૂર્યાગ્નિસંભવે ॥

પાદ્યમાચમનં ચાર્ઘ્યં દત્ત્વા રુદ્રાય શંભવે
સ્નાપયેદ્દિવ્યતોયૈશ્ ચ ઘૃતેન પયસા તથા ॥

દધ્ના ચ સ્નાપયેદ્રુદ્રં શોધયેચ્ચ યથાવિધિ
તતઃ શુદ્ધાંબુના સ્નાપ્ય ચન્દનાદ્યૈશ્ ચ પૂજયેત્ ॥

રોચનાદ્યૈશ્ ચ સમ્પૂજ્ય દિવ્યપુષ્પૈશ્ ચ પૂજયેત્
બિલ્વપત્રૈરખણ્ડૈશ્ ચ પદ્મૈર્નાનાવિધૈસ્ તથા ॥

નીલોત્પલૈશ્ ચ રાજીવૈર્ નદ્યાવર્તૈશ્ ચ મલ્લિકૈઃ
ચમ્પકૈર્ જાતિપુષ્પૈશ્ચ બકુલૈઃ કરવીરકૈઃ ॥

શમીપુષ્પૈર્ બૃહત્પુષ્પૈર્ ઉન્મત્તાગસ્ત્યજૈરપિ
અપામાર્ગકદમ્બૈશ્ ચ ભૂષણૈરપિ શોભનૈઃ ॥

દત્ત્વા પઞ્ચવિધં ધૂપં પાયસં ચ નિવેદયેત્
દધિભક્તં ચ મધ્વાજ્ય પરિપ્લુતમતઃ પરમ્ ॥

શુદ્ધાન્નં ચૈવ મુદ્ગાન્નં ષડ્વિધં ચ નિવેદયેત્
અથ પઞ્ચવિધં વાપિ સઘૃતં વિનિવેદયેત્ ॥

કેવલં ચાપિ શુદ્ધાન્નમ્ આઢકં તણ્ડુલં પચેત્
કૃત્વા પ્રદક્ષિણં ચાન્તે નમસ્કૃત્ય મુહુર્મુહુઃ ॥

સ્તુત્વા ચ દેવમીશાનં પુનઃ સમ્પૂજ્ય શઙ્કરમ્
ઈશાનં પુરુષં ચૈવ અઘોરં વામમેવ ચ ॥

સદ્યોજાતં જપંશ્ચાપિ પઞ્ચભિઃ પૂજયેચ્છિવમ્
અનેન વિધિના દેવઃ પ્રસીદતિ મહેશ્વરઃ ॥

વૃક્ષાઃ પુષ્પાદિપત્રાદ્યૈર્ ઉપયુક્તાઃ શિવાર્ચને
ગાવશ્ચૈવ દ્વિજશ્રેષ્ઠાઃ પ્રયાન્તિ પરમાં ગતિમ્ ॥

પૂજયેદ્યઃ શિવં રુદ્રં શર્વં ભવમજં સકૃત્
સ યાતિ શિવસાયુજ્યં પુનરાવૃત્તિવર્જિતમ્ ॥

અર્ચિતં પરમેશાનં ભવં શર્વમુમાપતિમ્
સકૃત્પ્રસંગાદ્વા દૃષ્ટ્વા સર્વપાપૈઃ પ્રમુચ્યતે ॥

પૂજિતં વા મહાદેવં પૂજ્યમાનમથાપિ વા
દૃષ્ટ્વા પ્રયાતિ વૈ મર્ત્યો બ્રહ્મલોકં ન સંશયઃ ॥

શ્રુત્વાનુમોદયેચ્ચાપિ સ યાતિ પરમાં ગતિમ્
યો દદ્યાદ્ ઘૃતદીપં ચ સકૃલ્લિઙ્ગસ્ય ચાગ્રતઃ ॥

સ તાં ગતિમ્ અવાપ્નોતિ સ્વાશ્રમૈર્ દુર્લભાં સ્થિરામ્
દીપવૃક્ષં પાર્થિવં વા દારવં વા શિવાલયે ॥

દત્ત્વા કુલશતં સાગ્રં શિવલોકે મહીયતે
આયસં તામ્રજં વાપિ રૌપ્યં સૌવર્ણિકં તથા ॥

શિવાય દીપં યો દદ્યાદ્ વિધિના વાપિ ભક્તિતઃ
સૂર્યાયુતસમૈઃ શ્લક્ષ્ણૈર્ યાનૈઃ શિવપુરં વ્રજેત્ ॥

કાર્તિકે માસિ યો દદ્યાદ્ ઘૃતદીપં શિવાગ્રતઃ
સમ્પૂજ્યમાનં વા પશ્યેદ્ વિધિના પરમેશ્વરમ્ ॥

સ યાતિ બ્રહ્મણો લોકં શ્રદ્ધયા મુનિસત્તમાઃ
આવાહનં સુસાન્નિધ્યં સ્થાપનં પૂજનં તથા ॥

સમ્પ્રોક્તં રુદ્રગાયત્ર્યા આસનં પ્રણવેન વૈ
પઞ્ચભિઃ સ્નપનં પ્રોક્તં રુદ્રાદ્યૈશ્ ચ વિશેષતઃ ॥

એવં સમ્પૂજયેન્નિત્યં દેવદેવમુમાપતિમ્
બ્રહ્માણં દક્ષિણે તસ્ય પ્રણવેન સમર્ચયેત્ ॥

ઉત્તરે દેવદેવેશં વિષ્ણું ગાયત્રિયા યજેત્
વહ્નૌ હુત્વા યથાન્યાયં પઞ્ચભિઃ પ્રણવેન ચ ॥

સ યાતિ શિવસાયુજ્યમ્ એવં સમ્પૂજ્ય શઙ્કરમ્
ઇતિ સંક્ષેપતઃ પ્રોક્તો લિઙ્ગાર્ચનવિધિક્રમઃ ॥

વ્યાસેન કથિતઃ પૂર્વં શ્રુત્વા રુદ્રમુખાત્સ્વયમ્ ॥