લિઙ્ગપુરાણ · અધ્યાય 1.78

વસ્ત્રપૂતેન તોયેન કાર્યં ચૈવોપલેપનમ્
શિવક્ષેત્રે મુનિશ્રેષ્ઠા નાન્યથા સિદ્ધિરિષ્યતે ॥

આપઃ પૂતા ભવન્ત્યેતા વસ્ત્રપૂતાઃ સમુદ્ધૃતાઃ
અફેના મુનિશાર્દૂલા નાદેયાશ્ ચ વિશેષતઃ ॥

તસ્માદ્વૈ સર્વકાર્યાણિ દૈવિકાનિ દ્વિજોત્તમાઃ
અદ્ભિઃ કાર્યાણિ પૂતાભિઃ સર્વકાર્યપ્રસિદ્ધયે ॥

જન્તુભિર્ મિશ્રિતા હ્યાપઃ સૂક્ષ્માભિસ્તાન્નિહત્ય તુ
યત્પાપં સકલં ચાદ્ભિર્ અપૂતાભિશ્ચિરં લભેત્ ॥

સંમાર્જને તથા નૄણાં માર્જને ચ વિશેષતઃ
અગ્નૌ કણ્ડનકે ચૈવ પેષણે તોયસંગ્રહે ॥

હિંસા સદા ગૃહસ્થાનાં તસ્માદ્ધિંસાં વિવર્જયેત્
અહિંસેયં પરો ધર્મઃ સર્વેષાં પ્રાણિનાં દ્વિજાઃ ॥

તસ્માત્સર્વપ્રયત્નેન વસ્ત્રપૂતં સમાચરેત્
તદ્દાનમભયં પુણ્યં સર્વદાનોત્તમોત્તમમ્ ॥

તસ્માત્તુ પરિહર્તવ્યા હિંસા સર્વત્ર સર્વદા
મનસા કર્મણા વાચા સર્વદાહિંસકં નરમ્ ॥

રક્ષન્તિ જન્તવઃ સર્વે હિંસકં બાધયન્તિ ચ
ત્રૈલોક્યમખિલં દત્ત્વા યત્ફલં વેદપારગે ॥

તત્ફલં કોટિગુણિતં લભતે ઽહિંસકો નરઃ
મનસા કર્મણા વાચા સર્વભૂતહિતે રતાઃ ॥

દયાદર્શિતપન્થાનો રુદ્રલોકં વ્રજન્તિ ચ
સ્વામિવત્પરિરક્ષન્તિ બહૂનિ વિવિધાનિ ચ ॥

યે પુત્રપૌત્રવત્સ્નેહાદ્ રુદ્રલોકં વ્રજન્તિ તે
તસ્માત્સર્વપ્રયત્નેન વસ્ત્રપૂતેન વારિણા ॥

કાર્યમભ્યુક્ષણં નિત્યં સ્નપનં ચ વિશેષતઃ
ત્રૈલોક્યમખિલં હત્વા યત્ફલં પરિકીર્ત્યતે ॥

શિવાલયે નિહત્યૈકમ્ અપિ તત્સકલં લભેત્
શિવાર્થં સર્વદા કાર્યા પુષ્પહિંસા દ્વિજોત્તમાઃ ॥

યજ્ઞાર્થં પશુહિંસા ચ ક્ષત્રિયૈર્દુષ્ટશાસનમ્
વિહિતાવિહિતં નાસ્તિ યોગિનાં બ્રહ્મવાદિનામ્ ॥

યતસ્તસ્માન્ન હન્તવ્યા નિષિદ્ધાનાં નિષેવણાત્
સર્વકર્માણિ વિન્યસ્ય સંન્યસ્તા બ્રહ્મવાદિનઃ ॥

ન હન્તવ્યાઃ સદા પૂજ્યાઃ પાપકર્મરતા અપિ
પવિત્રાસ્તુ સ્ત્રિયઃ સર્વા અત્રેશ્ ચ કુલસંભવાઃ ॥

બ્રહ્મહત્યાસમં પાપમ્ આત્રેયીં વિનિહત્ય ચ
સ્ત્રિયઃ સર્વા ન હન્તવ્યાઃ પાપકર્મરતા અપિ ॥

ન યજ્ઞાર્થં સ્ત્રિયો ગ્રાહ્યાઃ સર્વૈઃ સર્વત્ર સર્વદા
સર્વવર્ણેષુ વિપ્રેન્દ્રાઃ પાપકર્મરતા અપિ ॥

મલિના રૂપવત્યશ્ ચ વિરૂપા મલિનાંબરાઃ
ન હન્તવ્યાઃ સદા મર્ત્યૈઃ શિવવચ્છઙ્કયા તથા ॥

વેદબાહ્યવ્રતાચારાઃ શ્રૌતસ્માર્તબહિષ્કૃતાઃ
પાષણ્ડિન ઇતિ ખ્યાતા ન સંભાષ્યા દ્વિજાતિભિઃ ॥

ન સ્પૃષ્ટવ્યા ન દ્રષ્ટવ્યા દૃષ્ટ્વા ભાનું સમીક્ષતે
તથાપિ તેન વધ્યાશ્ ચ નૃપૈરન્યૈશ્ ચ જન્તુભિઃ ॥

પ્રસંગાદ્વાપિ યો મર્ત્યઃ સતાં સકૃદહો દ્વિજાઃ
રુદ્રલોકમવાપ્નોતિ સમભ્યર્ચ્ય મહેશ્વરમ્ ॥

ભવન્તિ દુઃખિતાઃ સર્વે નિર્દયા મુનિસત્તમાઃ
ભક્તિહીના નરાઃ સર્વે ભવે પરમકારણે ॥

યે ભક્તા દેવદેવસ્ય શિવસ્ય પરમેષ્ઠિનઃ
ભાગ્યવન્તો વિમુચ્યન્તે ભુક્ત્વા ભોગાનિહૈવ તે ॥

પુત્રેષુ દારેષુ ગૃહેષુ નૄણાં ભક્તં યથા ચિત્તમથાદિદેવે
સકૃત્પ્રસંગાદ્યતિતાપસાનાં તેષાં ન દૂરઃ પરમેશલોકઃ ॥