લિઙ્ગપુરાણ · અધ્યાય 1.77

લિઙ્ગપ્રતિષ્ઠાપુણ્યં ચ લિઙ્ગસ્થાપનમેવ ચ
લિઙ્ગાનાં ચૈવ ભેદાશ્ ચ શ્રુતં તવ મુખાદિહ ॥

મૃદાદિરત્નપર્યન્તૈર્ દ્રવ્યૈઃ કૃત્વા શિવાલયમ્
યત્ફલં લભતે મર્ત્યસ્ તત્ફલં વક્તુમર્હસિ ॥

યસ્ય ભક્તો ઽપિ લોકે ઽસ્મિન્ પુત્રદારગૃહાદિભિઃ
બાધ્યતે જ્ઞાનયુક્તશ્ચેન્ ન ચ તસ્ય ગૃહૈસ્તુ કિમ્ ॥

તથાપિ ભક્તાઃ પરમેશ્વરસ્ય કૃત્વેષ્ટલોષ્ટૈરપિ રુદ્રલોકમ્
પ્રયાન્તિ દિવ્યં હિ વિમાનવર્યં સુરેન્દ્રપદ્મોદ્ભવવન્દિતસ્ય ॥

ગૃહં ચ તાદૃગ્વિધમસ્ય શંભોઃ સમ્પૂજ્ય રુદ્રત્વમવાપ્નુવન્તિ ॥

તસ્માત્સર્વપ્રયત્નેન ભક્ત્યા ભક્તૈઃ શિવાલયમ્
કર્તવ્યં સર્વયત્નેન ધર્મકામાર્થસિદ્ધયે ॥

કેસરં નાગરં વાપિ દ્રાવિડં વા તથાપરમ્
કૃત્વા રુદ્રાલયં ભક્ત્યા શિવલોકે મહીયતે ॥

કૈલાસાખ્યં ચ યઃ કુર્યાત્ પ્રાસાદં પરમેષ્ઠિનઃ
કૈલાસશિખરાકારૈર્ વિમાનૈર્ મોદતે સુખી ॥

મન્દરં વા પ્રકુર્વીત શિવાય વિધિપૂર્વકમ્
ભક્ત્યા વિત્તાનુસારેણ ઉત્તમાધમમધ્યમમ્ ॥

મન્દરાદ્રિપ્રતીકાશૈર્ વિમાનૈર્વિશ્વતોમુખૈઃ
અપ્સરોગણસંકીર્ણૈર્ દેવદાનવદુર્લભૈઃ ॥

ગત્વા શિવપુરં રમ્યં ભુક્ત્વા ભોગાન્ યથેપ્સિતાન્
જ્ઞાનયોગં સમાસાદ્ય ગાણપત્યં લભેન્નરઃ ॥

યઃ કુર્યાન્મેરુનામાનં પ્રાસાદં પરમેષ્ઠિનઃ
સ યત્ફલમવાપ્નોતિ ન તત્ સર્વૈર્ મહામખૈઃ ॥

સર્વયજ્ઞતપોદાન તીર્થવેદેષુ યત્ફલમ્
તત્ફલં સકલં લબ્ધ્વા શિવવન્મોદતે ચિરમ્ ॥

નિષધં નામ યઃ કુર્યાત્ પ્રાસાદં ભક્તિતઃ સુધીઃ
શિવલોકમનુપ્રાપ્ય શિવવન્મોદતે ચિરમ્ ॥

કુર્યાદ્વા યઃ શુભં વિપ્રા હિમશૈલમનુત્તમમ્
હિમશૈલોપમૈર્ યાનૈર્ ગત્વા શિવપુરં શુભમ્ ॥

જ્ઞાનયોગં સમાસાદ્ય ગાણપત્યમવાપ્નુયાત્
નીલાદ્રિશિખરાખ્યં વા પ્રાસાદં યઃ સુશોભનમ્ ॥

કૃત્વા વિત્તાનુસારેણ ભક્ત્યા રુદ્રાય શંભવે
યત્ફલં લભતે મર્ત્યસ્ તત્ફલં પ્રવદામ્યહમ્ ॥

હિમશૈલે કૃતે ભક્ત્યા યત્ફલં પ્રાક્ તવોદિતમ્
તત્ફલં સકલં લબ્ધ્વા સર્વદેવનમસ્કૃતઃ ॥

રુદ્રલોકમનુપ્રાપ્ય રુદ્રૈઃ સાર્ધં પ્રમોદતે
મહેન્દ્રશૈલનામાનં પ્રાસાદં રુદ્રસંમતમ્ ॥

કૃત્વા યત્ફલમાપ્નોતિ તત્ફલં પ્રવદામ્યહમ્
મહેન્દ્રપર્વતાકારૈર્ વિમાનૈર્વૃષસંયુતૈઃ ॥

ગત્વા શિવપુરં દિવ્યં ભુક્ત્વા ભોગાન્યથેપ્સિતાન્
જ્ઞાનં વિચારિતં રુદ્રૈઃ સમ્પ્રાપ્ય મુનિપુઙ્ગવાઃ ॥

વિષયાન્ વિષવત્ ત્યક્ત્વા શિવસાયુજ્યમાપ્નુયાત્
હેમ્ના યસ્તુ પ્રકુર્વીત પ્રાસાદં રત્નશોભિતમ્ ॥

દ્રાવિડં નાગરં વાપિ કેસરં વા વિધાનતઃ
કૂટં વા મણ્ડપં વાપિ સમં વા દીર્ઘમ્ એવ ચ ॥

ન તસ્ય શક્યતે વક્તું પુણ્યં શતયુગૈરપિ
જીર્ણં વા પતિતં વાપિ ખણ્ડિતં સ્ફુટિતં તથા ॥

પૂર્વવત્કારયેદ્યસ્તુ દ્વારાદ્યૈઃ સુશુભં દ્વિજાઃ
પ્રાસાદં મણ્ડપં વાપિ પ્રાકારં ગોપુરં તુ વા ॥

કર્તુરપ્યધિકં પુણ્યં લભતે નાત્ર સંશયઃ
વૃત્ત્યર્થં વા પ્રકુર્વીત નરઃ કર્મ શિવાલયે ॥

યઃ સ યાતિ ન સંદેહઃ સ્વર્ગલોકં સબાન્ધવઃ
યશ્ચાત્મભોગસિદ્ધ્યર્થમ્ અપિ રુદ્રાલયે સકૃત્ ॥

કર્મ કુર્યાદ્યદિ સુખં લબ્ધ્વા ચાપિ પ્રમોદતે
તસ્માદ્ આયતનં ભક્ત્યા યઃ કુર્યાન્ મુનિસત્તમાઃ ॥

કાષ્ઠેષ્ટકાદિભિર્ મર્ત્યઃ શિવલોકે મહીયતે
પ્રસાદાર્થં મહેશસ્ય પ્રાસાદે મુનિપુઙ્ગવાઃ ॥

કર્તવ્યઃ સર્વયત્નેન ધર્મકામાર્થમુક્તયે
અશક્તશ્ચેન્મુનિશ્રેષ્ઠાઃ પ્રાસાદં કર્તુમુત્તમમ્ ॥

સંમાર્જનાદિભિર્ વાપિ સર્વાન્કામાનવાપ્નુયાત્
સંમાર્જનં તુ યઃ કુર્યાન્ માર્જન્યા મૃદુસૂક્ષ્મયા ॥

ચાન્દ્રાયણસહસ્રસ્ય ફલં માસેન લભ્યતે
યઃ કુર્યાદ્વસ્ત્રપૂતેન ગન્ધગોમયવારિણા ॥

આલેપનં યથાન્યાયં વર્ષચાન્દ્રાયણં લભેત્
અર્ધક્રોશં શિવક્ષેત્રં શિવલિઙ્ગાત્સમન્તતઃ ॥

યસ્ ત્યજેદ્ દુસ્ત્યજાન્ પ્રાણાઞ્ શિવસાયુજ્યમ્ આપ્નુયાત્
સ્વાયંભુવસ્ય માનં હિ તથા બાણસ્ય સુવ્રતાઃ ॥

સ્વાયંભુવે તદર્ધં સ્યાત્ સ્યાદ્ આર્ષે ચ તદર્ધકમ્
માનુષે ચ તદર્ધં સ્યાત્ ક્ષેત્રમાનં દ્વિજોત્તમાઃ ॥

એવં યતીનામાવાસે ક્ષેત્રમાનં દ્વિજોત્તમાઃ
રુદ્રાવતારે ચાદ્યં યચ્ છિષ્યે ચૈવ પ્રશિષ્યકે ॥

નરાવતારે તચ્છિષ્યે તચ્છિષ્યે ચ પ્રશિષ્યકે
શ્રીપર્વતે મહાપુણ્યે તસ્ય પ્રાન્તે ચ વા દ્વિજાઃ ॥

તસ્મિન્વા યસ્ત્યજેત્પ્રાણાઞ્ છિવસાયુજ્યમાપ્નુયાત્
વારાણસ્યાં તથાપ્યેવમ્ અવિમુક્તે વિશેષતઃ ॥

કેદારે ચ મહાક્ષેત્રે પ્રયાગે ચ વિશેષતઃ
કુરુક્ષેત્રે ચ યઃ પ્રાણાન્ સંત્યજેદ્યાતિ નિર્વૃતિમ્ ॥

પ્રભાસે પુષ્કરે ઽવન્ત્યાં તથા ચૈવામરેશ્વરે
વણીશૈલાકુલે ચૈવ મૃતો યાતિ શિવાત્મતામ્ ॥

વારાણસ્યાં મૃતો જન્તુર્ ન જાતુ જન્તુતાં વ્રજેત્
ત્રિવિષ્ટપે વિમુક્તે ચ કેદારે સંગમેશ્વરે ॥

શાલઙ્કે વા ત્યજેત્પ્રાણાંસ્ તથા વૈ જમ્બુકેશ્વરે
શુક્રેશ્વરે વા ગોકર્ણે ભાસ્કરેશે ગુહેશ્વરે ॥

હિરણ્યગર્ભે નન્દીશે સ યાતિ પરમાં ગતિમ્
નિયમૈઃ શોષ્ય યો દેહં ત્યજેત્ક્ષેત્રે શિવસ્ય તુ ॥

સ યાતિ શિવતાં યોગી માનુષે દૈવિકે ઽપિ વા
આર્ષે વાપિ મુનિશ્રેષ્ઠાસ્ તથા સ્વાયંભુવે ઽપિ વા ॥

સ્વયંભૂતે તથા દેવે નાત્ર કાર્યા વિચારણા
આધાયાગ્નિં શિવક્ષેત્રે સમ્પૂજ્ય પરમેશ્વરમ્ ॥

સ્વદેહપિણ્ડં જુહુયાદ્ યઃ સ યાતિ પરાં ગતિમ્
યાવત્તાવન્નિરાહારો ભૂત્વા પ્રાણાન્ પરિત્યજેત્ ॥

શિવક્ષેત્રે મુનિશ્રેષ્ઠાઃ શિવસાયુજ્યમાપ્નુયાત્
છિત્ત્વા પાદદ્વયં ચાપિ શિવક્ષેત્રે વસેત્તુ યઃ ॥

સ યાતિ શિવતાં ચૈવ નાત્ર કાર્યા વિચારણા
ક્ષેત્રસ્ય દર્શનં પુણ્યં પ્રવેશસ્તચ્છતાધિકઃ ॥

તસ્માચ્છતગુણં પુણ્યં સ્પર્શનં ચ પ્રદક્ષિણમ્
તસ્માચ્છતગુણં પુણ્યં જલસ્નાનમતઃ પરમ્ ॥

ક્ષીરસ્નાનં તતો વિપ્રાઃ શતાધિકમનુત્તમમ્
દધ્ના સહસ્રમાખ્યાતં મધુના તચ્છતાધિકમ્ ॥

ઘૃતસ્નાનેન ચાનન્તં શાર્કરે તચ્છતાધિકમ્
શિવક્ષેત્રસમીપસ્થાં નદીં પ્રાપ્યાવગાહ્ય ચ ॥

ત્યજેદ્દેહં વિહાયાન્નં શિવલોકે મહીયતે
શિવક્ષેત્રસમીપસ્થા નદ્યઃ સર્વાઃ સુશોભનાઃ ॥

વાપીકૂપતડાગાશ્ ચ શિવતીર્થા ઇતિ સ્મૃતાઃ
સ્નાત્વા તેષુ નરો ભક્ત્યા તીર્થેષુ દ્વિજસત્તમાઃ ॥

બ્રહ્મહત્યાદિભિઃ પાપૈર્ મુચ્યતે નાત્ર સંશયઃ
પ્રાતઃ સ્નાત્વા મુનિશ્રેષ્ઠાઃ શિવતીર્થેષુ માનવઃ ॥

અશ્વમેધફલં પ્રાપ્ય રુદ્રલોકં સ ગચ્છતિ
મધ્યાહ્ને શિવતીર્થેષુ સ્નાત્વા ભક્ત્યા સકૃન્નરઃ ॥

ગઙ્ગાસ્નાનસમં પુણ્યં લભતે નાત્ર સંશયઃ
અસ્તં ગતે તથા ચાર્કે સ્નાત્વા ગચ્છેચ્છિવં પદમ્ ॥

પાપકઞ્ચુકમુત્સૃજ્ય શિવતીર્થેષુ માનવઃ
દ્વિજાસ્ ત્રિષવણં સ્નાત્વા શિવતીર્થે સકૃન્નરઃ ॥

શિવસાયુજ્યમાપ્નોતિ નાત્ર કાર્યા વિચારણા
પુરાથ સૂકરઃ કશ્ચિત્ શ્વાનં દૃષ્ટ્વા ભયાત્પથિ ॥

પ્રસંગાદ્વારમેકં તુ શિવતીર્થે ઽવગાહ્ય ચ
મૃતઃ સ્વયં દ્વિજશ્રેષ્ઠા ગાણપત્યમવાપ્તવાન્ ॥

યઃ પ્રાતર્દેવદેવેશં શિવં લિઙ્ગસ્વરૂપિણમ્
પશ્યેત્સ યાતિ સર્વસ્માદ્ અધિકાં ગતિમેવ ચ ॥

મધ્યાહ્ને ચ મહાદેવં દૃષ્ટ્વા યજ્ઞફલં લભેત્
સાયાહ્ને સર્વયજ્ઞાનાં ફલં પ્રાપ્ય વિમુચ્યતે ॥

માનસૈર્વાચિકૈઃ પાપૈઃ કાયિકૈશ્ ચ મહત્તરૈઃ
તથોપપાતકૈશ્ચૈવ પાપૈશ્ચૈવાનુપાતકૈઃ ॥

સંક્રમે દેવમીશાનં દૃષ્ટ્વા લિઙ્ગાકૃતિં પ્રભુમ્
માસેન યત્કૃતં પાપં ત્યક્ત્વા યાતિ શિવં પદમ્ ॥

અયને ચાર્ધમાસેન દક્ષિણે ચોત્તરાયણે
વિષુવે ચૈવ સમ્પૂજ્ય પ્રયાતિ પરમાં ગતિમ્ ॥

પ્રદક્ષિણત્રયં કુર્યાદ્ યઃ પ્રાસાદં સમન્તતઃ
સવ્યાપસવ્યન્યાયેન મૃદુગત્યા શુચિર્નરઃ ॥

પદે પદે ઽશ્વમેધસ્ય યજ્ઞસ્ય ફલમાપ્નુયાત્
વાચા યસ્તુ શિવં નિત્યં સંરૌતિ પરમેશ્વરમ્ ॥

સો ઽપિ યાતિ શિવં સ્થાનં પ્રાપ્ય કિં પુનરેવ ચ
કૃત્વા મણ્ડલકં ક્ષેત્રં ગન્ધગોમયવારિણા ॥

મુક્તાફલમયૈશ્ચૂર્ણૈર્ ઇન્દ્રનીલમયૈસ્ તથા
પદ્મરાગમયૈશ્ચૈવ સ્ફાટિકૈશ્ ચ સુશોભનૈઃ ॥

તથા મારકતૈશ્ચૈવ સૌવર્ણૈ રાજતૈસ્ તથા
તદ્વર્ણૈર્ લૌકિકૈશ્ચૈવ ચૂર્ણૈર્વિત્તવિવર્જિતૈઃ ॥

આલિખ્ય કમલં ભદ્રં દશહસ્તપ્રમાણતઃ
સકર્ણિકં મહાભાગા મહાદેવસમીપતઃ ॥

તત્રાવાહ્ય મહાદેવં નવશક્તિસમન્વિતમ્
પઞ્ચભિશ્ચ તથા ષડ્ભિર્ અષ્ટાભિશ્ચેષ્ટદં પરમ્ ॥

પુનરષ્ટાભિર્ ઈશાનં દશારે દશભિસ્ તથા
પુનર્બાહ્યે ચ દશભિઃ સમ્પૂજ્ય પ્રણિપત્ય ચ ॥

નિવેદ્ય દેવદેવાય ક્ષિતિદાનફલં લભેત્
શાલિપિષ્ટાદિભિર્ વાપિ પદ્મમાલિખ્ય નિર્ધનઃ ॥

પૂર્વોક્તમખિલં પુણ્યં લભતે નાત્ર સંશયઃ
દ્વાદશારં તથાલિખ્ય મણ્ડલં પદમ્ ઉત્તમમ્ ॥

રત્નચૂર્ણાદિભિશ્ચૂર્ણૈસ્ તથા દ્વાદશમૂર્તિભિઃ
મણ્ડલસ્ય ચ મધ્યે તુ ભાસ્કરં સ્થાપ્ય પૂજયેત્ ॥

ગ્રહૈશ્ ચ સંવૃતં વાપિ સૂર્યસાયુજ્યમુત્તમમ્
એવં પ્રાકૃતમ્ અપ્યાર્થ્યાં ષડસ્રં પરિકલ્પ્ય ચ ॥

મધ્યદેશે ચ દેવેશીં પ્રકૃતિં બ્રહ્મરૂપિણીમ્
દક્ષિણે સત્ત્વમૂર્તિં ચ વામતશ્ ચ રજોગુણમ્ ॥

અગ્રતસ્તુ તમોમૂર્તિં મધ્યે દેવીં તથાંબિકામ્
પઞ્ચભૂતાનિ તન્માત્રા પઞ્ચકં ચૈવ દક્ષિણે ॥

કર્મેન્દ્રિયાણિ પઞ્ચૈવ તથા બુદ્ધીન્દ્રિયાણિ ચ
ઉત્તરે વિધિવત્પૂજ્ય ષડસ્રે ચૈવ પૂજયેત્ ॥

આત્માનં ચાન્તરાત્માનં યુગલં બુદ્ધિમેવ ચ
અહઙ્કારં ચ મહતા સર્વયજ્ઞફલં લભેત્ ॥

એવં વઃ કથિતં સર્વં પ્રાકૃતં મણ્ડલં પરમ્
અતો વક્ષ્યામિ વિપ્રેન્દ્રાઃ સર્વકામાર્થસાધનમ્ ॥

ગોચર્મમાત્રમાલિખ્ય મણ્ડલં ગોમયેન તુ
ચતુરશ્રં વિધાનેન ચાદ્ભિર્ અભ્યુક્ષ્ય મન્ત્રવિત્ ॥

અલંકૃત્ય વિતાનાદ્યૈશ્ છત્રૈર્ વાપિ મનોરમૈઃ
બુદ્બુદૈરર્ધચન્દ્રૈશ્ ચ હૈમૈરશ્વત્થપત્રકૈઃ ॥

સિતૈર્વિકસિતૈઃ પદ્મૈ રક્તૈર્ નીલોત્પલૈસ્ તથા
મુક્તાદામૈર્ વિતાનાન્તે લમ્બિતસ્તુ સિતૈર્ધ્વજૈઃ ॥

સિતમૃત્પાત્રકૈશ્ચૈવ સુશ્લક્ષ્ણૈઃ પૂર્ણકુમ્ભકૈઃ
ફલપલ્લવમાલાભિર્ વૈજયન્તીભિર્ અંશુકૈઃ ॥

પઞ્ચાશદ્દીપમાલાભિર્ ધૂપૈઃ પઞ્ચવિધૈસ્ તથા
પઞ્ચાશદ્દલસંયુક્તમ્ આલિખેત્પદ્મમુત્તમમ્ ॥

તત્તદ્વર્ણૈસ્ તથા ચૂર્ણૈઃ શ્વેતચૂર્ણૈરથાપિ વા
એકહસ્તપ્રમાણેન કૃત્વા પદ્મં વિધાનતઃ ॥

કર્ણિકાયાં ન્યસેદ્ દેવં દેવ્યા દેવેશ્વરં ભવમ્
વર્ણાનિ ચ ન્યસેત્પત્રે રુદ્રૈઃ પ્રાગાદ્યનુક્રમાત્ ॥

પ્રણવાદિનમો ઽન્તાનિ સર્વવર્ણાનિ સુવ્રતાઃ
સમ્પૂજ્યૈવં મુનિશ્રેષ્ઠા ગન્ધપુષ્પાદિભિઃ ક્રમાત્ ॥

બ્રાહ્મણાન્ ભોજયેત્તત્ર પઞ્ચાશદ્વિધિપૂર્વકમ્
અક્ષમાલોપવીતં ચ કુણ્ડલં ચ કમણ્ડલુમ્ ॥

આસનં ચ તથા દણ્ડમ્ ઉષ્ણીષં વસ્ત્રમેવ ચ
દત્ત્વા તેષાં મુનીન્દ્રાણાં દેવદેવાય શંભવે ॥

મહાચરું નિવેદ્યૈવં કૃષ્ણં ગોમિથુનં તથા
અન્તે ચ દેવદેવાય દાપયેચ્ચૂર્ણમણ્ડલમ્ ॥

યાગોપયોગદ્રવ્યાણિ શિવાય વિનિવેદયેત્
ઓઙ્કારાદ્યં જપેદ્ધીમાન્ પ્રતિવર્ણમ્ અનુક્રમાત્ ॥

એવમાલિખ્ય યો ભક્ત્યા સર્વમણ્ડલમુત્તમમ્
યત્ફલં લભતે મર્ત્યસ્ તદ્વદામિ સમાસતઃ ॥

સાઙ્ગાન્ વેદાન્ યથાન્યાયમ્ અધીત્ય વિધિપૂર્વકમ્
ઇષ્ટ્વા યજ્ઞૈર્યથાન્યાયં જ્યોતિષ્ટોમાદિભિઃ ક્રમાત્ ॥

તતો વિશ્વજિદન્તૈશ્ ચ પુત્રાનુત્પાદ્ય તાદૃશાન્
વાનપ્રસ્થાશ્રમં ગત્વા સદારઃ સાગ્નિરેવ ચ ॥

ચાન્દ્રાયણાદિકાઃ સર્વાઃ કૃત્વા ન્યસ્ય ક્રિયા દ્વિજાઃ
બ્રહ્મવિદ્યામધીત્યૈવ જ્ઞાનમાસાદ્ય યત્નતઃ ॥

જ્ઞાનેન જ્ઞેયમ્ આલોક્ય યોગી યત્કામમાપ્નુયાત્
તત્ફલં લભતે સર્વં વર્ણમણ્ડલદર્શનાત્ ॥

યેન કેનાપિ વા મર્ત્યઃ પ્રલિપ્યાયતનાગ્રતઃ
ઉત્તરે દક્ષિણે વાપિ પૃષ્ઠતો વા દ્વિજોત્તમાઃ ॥

ચતુષ્કોણં તુ વા ચૂર્ણૈર્ અલંકૃત્ય સમન્તતઃ
પુષ્પાક્ષતાદિભિઃ પૂજ્ય સર્વપાપૈઃ પ્રમુચ્યતે ॥

યસ્તુ ગર્ભગૃહં ભક્ત્યા સકૃદાલિપ્ય સર્વતઃ
ચન્દનાદ્યૈઃ સકર્પૂરૈર્ ગન્ધદ્રવ્યૈઃ સમન્તતઃ ॥

વિકીર્ય ગન્ધકુસુમૈર્ ધૂપૈર્ધૂપ્ય ચતુર્વિધૈઃ
પ્રાર્થયેદ્દેવમીશાનં શિવલોકં સ ગચ્છતિ ॥

તત્ર ભુક્ત્વા મહાભોગાન્ કલ્પકોટિશતં નરઃ
સ્વદેહગન્ધકુસુમૈઃ પૂરયઞ્છિવમન્દિરમ્ ॥

ક્રમાદ્ગાન્ધર્વમાસાદ્ય ગન્ધર્વૈશ્ ચ સુપૂજિતઃ
ક્રમાદાગત્ય લોકે ઽસ્મિન્ રાજા ભવતિ વીર્યવાન્ ॥

આદિદેવો મહાદેવઃ પ્રલયસ્થિતિકારકઃ
સર્ગશ્ ચ ભુવનાધીશઃ શર્વવ્યાપી સદાશિવઃ
શિવબ્રહ્મામૃતં ગ્રાહ્યં મોક્ષસાધનમ્ ઉત્તમમ્ ॥

વ્યક્તાવ્યક્તં સદા નિત્યમ્ અચિન્ત્યમ્ અર્ચયેત્ પ્રભુમ્ ॥