લિઙ્ગપુરાણ · અધ્યાય 1.76

અતઃ પરં પ્રવક્ષ્યામિ સ્વેચ્છાવિગ્રહસંભવમ્
પ્રતિષ્ઠાયાઃ ફલં સર્વં સર્વલોકહિતાય વૈ ॥

સ્કન્દોમાસહિતં દેવમ્ આસીનં પરમાસને
કૃત્વા ભક્ત્યા પ્રતિષ્ઠાપ્ય સર્વાન્કામાનવાપ્નુયાત્ ॥

સ્કન્દોમાસહિતં દેવં સમ્પૂજ્ય વિધિના સકૃત્
યત્ફલં લભતે મર્ત્યસ્ તદ્વદામિ યથાશ્રુતમ્ ॥

સૂર્યકોટિપ્રતિકાશૈર્ વિમાનૈઃ સાર્વકામિકૈઃ
રુદ્રકન્યાસમાકીર્ણૈર્ ગેયનાટ્યસમન્વિતૈઃ ॥

શિવવત્ક્રીડતે યોગી યાવદાભૂતસંપ્લવમ્
તત્ર ભુક્ત્વા મહાભોગાન્ વિમાનૈઃ સાર્વકામિકૈઃ ॥

ઔમં કૌમારમૈશાનં વૈષ્ણવં બ્રાહ્મમેવ ચ
પ્રાજાપત્યં મહાતેજા જનલોકં મહસ્ તથા ॥

ઐન્દ્રમ્ આસાદ્ય ચૈન્દ્રત્વં કૃત્વા વર્ષાયુતં પુનઃ
ભુક્ત્વા ચૈવ ભુવર્લોકે ભોગાન્ દિવ્યાન્ સુશોભનાન્ ॥

મેરુમાસાદ્ય દેવાનાં ભવનેષુ પ્રમોદતે
એકપાદં ચતુર્બાહું ત્રિનેત્રં શૂલસંયુતમ્ ॥

સૃષ્ટ્વા સ્થિતં હરિં વામે દક્ષિણે ચતુરાનનમ્
અષ્ટાવિંશતિરુદ્રાણાં કોટિઃ સર્વાઙ્ગસુપ્રભમ્ ॥

પઞ્ચવિંશતિકં સાક્ષાત્ પુરુષં હૃદયાત્તથા
પ્રકૃતિં વામતશ્ચૈવ બુદ્ધિં વૈ બુદ્ધિદેશતઃ ॥

અહઙ્કારમહઙ્કારાત્ તન્માત્રાણિ તુ તત્ર વૈ
ઇન્દ્રિયાણીન્દ્રિયાદેવ લીલયા પરમેશ્વરમ્ ॥

પૃથિવીં પાદમૂલાત્તુ ગુહ્યદેશાજ્જલં તથા
નાભિદેશાત્ તથા વહ્નિં હૃદયાદ્ભાસ્કરં તથા ॥

કણ્ઠાત્સોમં તથાત્માનં ભ્રૂમધ્યાન્મસ્તકાદ્દિવમ્
સૃષ્ટૈવં સંસ્થિતં સાક્ષાજ્ જગત્સર્વં ચરાચરમ્ ॥

સર્વજ્ઞં સર્વગં દેવં કૃત્વા વિદ્યાવિધાનતઃ
પ્રતિષ્ઠાપ્ય યથાન્યાયં શિવસાયુજ્યમાપ્નુયાત્ ॥

ત્રિપાદં સપ્તહસ્તં ચ ચતુઃશૃઙ્ગં દ્વિશીર્ષકમ્
કૃત્વા યજ્ઞેશમીશાનં વિષ્ણુલોકે મહીયતે ॥

તત્ર ભુક્ત્વા મહાભોગાન્ કલ્પલક્ષં સુખી નરઃ
ક્રમાદાગત્ય લોકે ઽસ્મિન્ સર્વયજ્ઞાન્તગો ભવેત્ ॥

વૃષારૂઢં તુ યઃ કુર્યાત્ સોમં સોમાર્ધભૂષણમ્
હયમેધાયુતં કૃત્વા યત્પુણ્યં તદ્ અવાપ્ય સઃ ॥

કાઞ્ચનેન વિમાનેન કિઙ્કિણીજાલમાલિના
ગત્વા શિવપુરં દિવ્યં તત્રૈવ સ વિમુચ્યતે ॥

નન્દિના સહિતં દેવં સામ્બં સર્વગણૈર્વૃતમ્
કૃત્વા યત્ફલમાપ્નોતિ વક્ષ્યે તદ્વૈ યથાશ્રુતમ્ ॥

સૂર્યમણ્ડલસંકાશૈર્ વિમાનૈર્ વૃષસંયુતૈઃ
અપ્સરોગણસંકીર્ણૈર્ દેવદાનવદુર્લભૈઃ ॥

નૃત્યદ્ભિર્ અપ્સરઃસંઘૈઃ સર્વતઃ સર્વશોભિતૈઃ
ગત્વા શિવપુરં દિવ્યં ગાણપત્યમવાપ્નુયાત્ ॥

નૃત્યન્તં દેવદેવેશં શૈલજાસહિતં પ્રભુમ્
સહસ્રબાહું સર્વજ્ઞં ચતુર્બાહુમ્ અથાપિ વા ॥

ભૃગ્વાદ્યૈર્ભૂતસંઘૈશ્ ચ સંવૃતં પરમેશ્વરમ્
શૈલજાસહિતં સાક્ષાદ્ વૃષભધ્વજમીશ્વરમ્ ॥

બ્રહ્મેન્દ્રવિષ્ણુસોમાદ્યૈઃ સદા સર્વૈર્નમસ્કૃતમ્
માતૃભિર્ મુનિભિશ્ચૈવ સંવૃતં પરમેશ્વરમ્ ॥

કૃત્વા ભક્ત્યા પ્રતિષ્ઠાપ્ય યત્ફલં તદ્વદામ્યહમ્
સર્વયજ્ઞતપોદાન તીર્થદેવેષુ યત્ ફલમ્ ॥

તત્ફલં કોટિગુણિતં લબ્ધ્વા યાતિ શિવં પદમ્
તત્ર ભુક્ત્વા મહાભોગાન્ યાવદ્ આભૂતસંપ્લવમ્ ॥

સૃષ્ટ્યન્તરે પુનઃ પ્રાપ્તે માનવં પદમાપ્નુયાત્
નગ્નં ચતુર્ભુજં શ્વેતં ત્રિનેત્રં સર્પમેખલમ્ ॥

કપાલહસ્તં દેવેશં કૃષ્ણકુઞ્ચિતમૂર્ધજમ્
કૃત્વા ભક્ત્યા પ્રતિષ્ઠાપ્ય શિવસાયુજ્યમાપ્નુયાત્ ॥

ઇભેન્દ્રદારકં દેવં સાંબં સિદ્ધાર્થદં પ્રભુમ્
સુધૂમ્રવર્ણં રક્તાક્ષં ત્રિનેત્રં ચન્દ્રભૂષણમ્ ॥

કાકપક્ષધરં મૂર્ધ્ના નાગટઙ્કધરં હરમ્
સિંહાજિનોત્તરીયં ચ મૃગચર્માંબરં પ્રભુમ્ ॥

તીક્ષ્ણદંષ્ટ્રં ગદાહસ્તં કપાલોદ્યતપાણિનમ્
હુંફટ્કારે મહાશબ્દ શબ્દિતાખિલદિઙ્મુખમ્ ॥

પુણ્ડરીકાજિનં દોર્ભ્યાં બિભ્રન્તં કમ્બુકં તથા
હસન્તં ચ નદન્તં ચ પિબન્તં કૃષ્ણસાગરમ્ ॥

નૃત્યન્તં ભૂતસંઘૈશ્ ચ ગણસંઘૈસ્ ત્વલંકૃતમ્
કૃત્વા ભક્ત્યા પ્રતિષ્ઠાપ્ય યથાવિભવવિસ્તરમ્ ॥

સર્વવિઘ્નાન્ અતિક્રમ્ય શિવલોકે મહીયતે
તત્ર ભુક્ત્વા મહાભોગાન્ યાવદાભૂતસંપ્લવમ્ ॥

જ્ઞાનં વિચારતો લબ્ધ્વા રુદ્રેભ્યસ્તત્ર મુચ્યતે
અર્ધનારીશ્વરં દેવં ચતુર્ભુજમનુત્તમમ્ ॥

વરદાભયહસ્તં ચ શૂલપદ્મધરં પ્રભુમ્
સ્ત્રીપુંભાવેન સંસ્થાનં સર્વાભરણભૂષિતમ્ ॥

કૃત્વા ભક્ત્યા પ્રતિષ્ઠાપ્ય શિવલોકે મહીયતે
તત્ર ભુક્ત્વા મહાભોગાન્ અણિમાદિગુણૈર્યુતઃ ॥

આચન્દ્રતારકં જ્ઞાનં તતો લબ્ધ્વા વિમુચ્યતે
યઃ કુર્યાદ્દેવદેવેશં સર્વજ્ઞં લકુલીશ્વરમ્ ॥

વૃતં શિષ્યપ્રશિષ્યૈશ્ ચ વ્યાખ્યાનોદ્યતપાણિનમ્
કૃત્વા ભક્ત્યા પ્રતિષ્ઠાપ્ય શિવલોકં સ ગચ્છતિ ॥

ભુક્ત્વા તુ વિપુલાંસ્તત્ર ભોગાન્ યુગશતં નરઃ
જ્ઞાનયોગં સમાસાદ્ય તત્રૈવ ચ વિમુચ્યતે ॥

પૂર્વદેવામરાણાં ચ યત્સ્થાનં સકલેપ્સિતમ્
કૃતમુદ્રસ્ય દેવસ્ય ચિતાભસ્માનુલેપિનઃ ॥

ત્રિપુણ્ડ્રધારિણસ્તેષાં શિરોમાલાધરસ્ય ચ
બ્રહ્મણઃ કેશકેનૈકમ્ ઉપવીતં ચ બિભ્રતઃ ॥

બિભ્રતો વામહસ્તેન કપાલં બ્રહ્મણો વરમ્
વિષ્ણોઃ કલેવરં ચૈવ બિભ્રતઃ પરમેષ્ઠિનઃ ॥

કૃત્વા ભક્ત્યા પ્રતિષ્ઠાપ્ય મુચ્યતે ભવસાગરાત્
ઓંનમો નીલકણ્ઠાય ઇતિ પુણ્યાક્ષરાષ્ટકમ્ ॥

મન્ત્રમાહ સકૃદ્વા યઃ પાતકૈઃ સ વિમુચ્યતે
મન્ત્રેણાનેન ગન્ધાદ્યૈર્ ભક્ત્યા વિત્તાનુસારતઃ ॥

સમ્પૂજ્ય દેવદેવેશં શિવલોકે મહીયતે
જાલન્ધરાન્તકં દેવં સુદર્શનધરં પ્રભુમ્ ॥

કૃત્વા ભક્ત્યા પ્રતિષ્ઠાપ્ય દ્વિધાભૂતં જલંધરમ્
પ્રયાતિ શિવસાયુજ્યં નાત્ર કાર્યા વિચારણા ॥

સુદર્શનપ્રદં દેવં સાક્ષાત્પૂર્વોક્તલક્ષણમ્
અર્ચમાનેન દેવેન ચાર્ચિતં નેત્રપૂજયા ॥

કૃત્વા ભક્ત્યા પ્રતિષ્ઠાપ્ય શિવલોકે મહીયતે
તિષ્ઠતો ઽથ નિકુમ્ભસ્ય પૃષ્ઠતશ્ચરણાંબુજમ્ ॥

વામેતરં સુવિન્યસ્ય વામે ચાલિઙ્ગ્ય ચાદ્રિજામ્
શૂલાગ્રે કૂર્પરં સ્થાપ્ય કિઙ્કિણીકૃતપન્નગમ્ ॥

સમ્પ્રેક્ષ્ય ચાન્ધકં પાર્શ્વે કૃતાઞ્જલિપુટં સ્થિતમ્
રૂપં કૃત્વા યથાન્યાયં શિવસાયુજ્યમાપ્નુયાત્ ॥

યઃ કુર્યાદ્દેવદેવેશં ત્રિપુરાન્તકમીશ્વરમ્
ધનુર્બાણસમાયુક્તં સોમં સોમાર્ધભૂષણમ્ ॥

રથે સુસંસ્થિતં દેવં ચતુરાનનસારથિમ્
તદાકારતયા સો ઽપિ ગત્વા શિવપુરં સુખી ॥

ક્રીડતે નાત્ર સંદેહો દ્વિતીય ઇવ શઙ્કરઃ
તત્ર ભુક્ત્વા મહાભોગાન્ યાવદ્ ઇચ્છા દ્વિજોત્તમાઃ ॥

જ્ઞાનં વિચારિતં લબ્ધ્વા તત્રૈવ સ વિમુચ્યતે ॥

ગઙ્ગાધરં સુખાસીનં ચન્દ્રશેખરમેવ ચ ॥

ગઙ્ગયા સહિતં ચૈવ વામોત્સઙ્ગે ઽંબિકાન્વિતમ્
વિનાયકં તથા સ્કન્દં જ્યેષ્ઠં દુર્ગાં સુશોભનામ્ ॥

ભાસ્કરં ચ તથા સોમં બ્રહ્માણીં ચ મહેશ્વરીમ્
કૌમારીં વૈષ્ણવીં દેવીં વારાહીં વરદાં તથા ॥

ઇન્દ્રાણીં ચૈવ ચામુણ્ડાં વીરભદ્રસમન્વિતામ્
વિઘ્નેશેન ચ યો ધીમાન્ શિવસાયુજ્યમાપ્નુયાત્ ॥

લિઙ્ગમૂર્તિં મહાજ્વાલામ્ આલાસંવૃતમ્ અવ્યયમ્
લિઙ્ગસ્ય મધ્યે વૈ કૃત્વા ચન્દ્રશેખરમીશ્વરમ્ ॥

વ્યોમ્નિ કુર્યાત્ તથા લિઙ્ગં બ્રહ્માણં હંસરૂપિણમ્
વિષ્ણું વરાહરૂપેણ લિઙ્ગસ્યાધસ્ત્વધોમુખમ્ ॥

બ્રહ્માણં દક્ષિણે તસ્ય કૃતાઞ્જલિપુટં સ્થિતમ્
મધ્યે લિઙ્ગં મહાઘોરં મહામ્ભસિ ચ સંસ્થિતમ્ ॥

કૃત્વા ભક્ત્યા પ્રતિષ્ઠાપ્ય શિવસાયુજ્યમાપ્નુયાત્
ક્ષેત્રસંરક્ષકં દેવં તથા પાશુપતં પ્રભુમ્ ॥

કૃત્વા ભક્ત્યા યથાન્યાયં શિવલોકે મહીયતે ॥