લિઙ્ગપુરાણ · અધ્યાય 1.74

લિઙ્ગાનિ કલ્પયિત્વૈવં સ્વાધિકારાનુરૂપતઃ
વિશ્વકર્મા દદૌ તેષાં નિયોગાદ્બ્રહ્મણઃ પ્રભોઃ ॥

ઇન્દ્રનીલમયં લિઙ્ગં વિષ્ણુના પૂજિતં સદા
પદ્મરાગમયં શક્રો હૈમં વિશ્રવસઃ સુતઃ ॥

વિશ્વેદેવાસ્ તથા રૌપ્યં વસવઃ કાન્તિકં શુભમ્
આરકૂટમયં વાયુર્ અશ્વિનૌ પાર્થિવં સદા ॥

સ્ફાટિકં વરુણો રાજા આદિત્યાસ્તામ્રનિર્મિતમ્
મૌક્તિકં સોમરાડ્ ધીમાંસ્ તથા લિઙ્ગમનુત્તમમ્ ॥

અનન્તાદ્યા મહાનાગાઃ પ્રવાલકમયં શુભમ્
દૈત્યા હ્યયોમયં લિઙ્ગં રાક્ષસાશ્ ચ મહાત્મનઃ ॥

ત્રૈલોહિકં ગુહ્યકાશ્ ચ સર્વલોહમયં ગણાઃ
ચામુણ્ડા સૈકતં સાક્ષાન્ માતરશ્ ચ દ્વિજોત્તમાઃ ॥

દારુજં નૈરૃતિર્ ભક્ત્યા યમો મારકતં શુભમ્
નીલાદ્યાશ્ ચ તથા રુદ્રાઃ શુદ્ધં ભસ્મમયં શુભમ્ ॥

લક્ષ્મીવૃક્ષમયં લક્ષ્મીર્ ગુહો વૈ ગોમયાત્મકમ્
મુનયો મુનિશાર્દૂલાઃ કુશાગ્રમયમ્ ઉત્તમમ્ ॥

વામાદ્યાઃ પુષ્પલિઙ્ગં તુ ગન્ધલિઙ્ગં મનોન્મની
સરસ્વતી ચ રત્નેન કૃતં રુદ્રસ્ય વાગ્ભવા ॥

દુર્ગા હૈમં મહાદેવં સવેદિકમનુત્તમમ્
ઉગ્રા પિષ્ટમયં સર્વે મન્ત્રા હ્યાજ્યમયં શુભમ્ ॥

વેદાઃ સર્વે દધિમયં પિશાચાઃ સીસનિર્મિતમ્
લેભિરે ચ યથાયોગ્યં પ્રસાદાદ્બ્રહ્મણઃ પદમ્ ॥

બહુનાત્ર કિમુક્તેન ચરાચરમિદં જગત્
શિવલિઙ્ગં સમભ્યર્ચ્ય સ્થિતમત્ર ન સંશયઃ ॥

ષડ્વિધં લિઙ્ગમિત્યાહુર્ દ્રવ્યાણાં ચ પ્રભેદતઃ
તેષાં ભેદાશ્ચતુર્યુક્ત ચત્વારિંશદિતિ સ્મૃતાઃ ॥

શૈલજં પ્રથમં પ્રોક્તં તદ્ધિ સાક્ષાચ્ચતુર્વિધમ્
દ્વિતીયં રત્નજં તચ્ચ સપ્તધા મુનિસત્તમાઃ ॥

તૃતીયં ધાતુજં લિઙ્ગમ્ અષ્ટધા પરમેષ્ઠિનઃ
તુરીયં દારુજં લિઙ્ગં તત્તુ ષોડશધોચ્યતે ॥

મૃન્મયં પઞ્ચમં લિઙ્ગં દ્વિધા ભિન્નં દ્વિજોત્તમાઃ
ષષ્ઠં તુ ક્ષણિકં લિઙ્ગં સપ્તધા પરિકીર્તિતમ્ ॥

શ્રીપ્રદં રત્નજં લિઙ્ગં શૈલજં સર્વસિદ્ધિદમ્
ધાતુજં ધનદં સાક્ષાદ્ દારુજં ભોગસિદ્ધિદમ્ ॥

મૃન્મયં ચૈવ વિપ્રેન્દ્રાઃ સર્વસિદ્ધિકરં શુભમ્
શૈલજં ચોત્તમં પ્રોક્તં મધ્યમં ચૈવ ધાતુજમ્ ॥

બહુધા લિઙ્ગભેદાશ્ ચ નવ ચૈવ સમાસતઃ
મૂલે બ્રહ્મા તથા મધ્યે વિષ્ણુસ્ત્રિભુવનેશ્વરઃ ॥

રુદ્રોપરિ મહાદેવઃ પ્રણવાખ્યઃ સદાશિવઃ
લિઙ્ગવેદી મહાદેવી ત્રિગુણા ત્રિમયાંબિકા ॥

તયા ચ પૂજયેદ્યસ્તુ દેવી દેવશ્ ચ પૂજિતૌ
શૈલજં રત્નજં વાપિ ધાતુજં વાપિ દારુજમ્ ॥

મૃન્મયં ક્ષણિકં વાપિ ભક્ત્યા સ્થાપ્ય ફલં શુભમ્
સુરેન્દ્રામ્ભોજગર્ભાગ્નિ યમામ્બુપધનેશ્વરૈઃ ॥

સિદ્ધવિદ્યાધરાહીન્દ્રૈર્ યક્ષદાનવકિન્નરૈઃ
સ્તૂયમાનઃ સુપુણ્યાત્મા દેવદુન્દુભિનિઃસ્વનૈઃ ॥

ભૂર્ભૂવઃસ્વર્મહર્લોકાન્ ક્રમાદ્ વૈ જનતઃ પરમ્
તપઃ સત્યં પરાક્રમ્ય ભાસયન્ સ્વેન તેજસા ॥

લિઙ્ગસ્થાપનસન્માર્ગ નિહિતસ્વાયતાસિના
આશુ બ્રહ્માણ્ડમુદ્ભિદ્ય નિર્ગચ્છન્નિર્વિશઙ્કયા ॥

શૈલજં રત્નજં વાપિ ધાતુજં વાપિ દારુજમ્
મૃન્મયં ક્ષણિકં ત્યક્ત્વા સ્થાપયેત્સકલં વપુઃ ॥

વિધિના ચૈવ કૃત્વા તુ સ્કન્દોમાસહિતં શુભમ્
કુન્દગોક્ષીરસંકાશં લિઙ્ગં યઃ સ્થાપયેન્નરઃ ॥

નૃણાં તનું સમાસ્થાય સ્થિતો રુદ્રો ન સંશયઃ
દર્શનાત્સ્પર્શનાત્તસ્ય લભન્તે નિર્વૃતિં નરાઃ ॥

તસ્ય પુણ્યં મયા વક્તું સમ્યગ્યુગશતૈરપિ
શક્યતે નૈવ વિપ્રેન્દ્રાસ્ તસ્માદ્ વૈ સ્થાપયેત્ તથા ॥

સર્વેષામેવ મર્ત્યાનાં વિભોર્દિવ્યં વપુઃ શુભમ્
સકલં ભાવનાયોગ્યં યોગિનામેવ નિષ્કલમ્ ॥