લિઙ્ગપુરાણ · અધ્યાય 1.73

ગતે મહેશ્વરે દેવે દગ્ધ્વા ચ ત્રિપુરં ક્ષણાત્
સદસ્યાહ સુરેન્દ્રાણાં ભગવાન્પદ્મસંભવઃ ॥

સંત્યજ્ય દેવદેવેશં લિઙ્ગમૂર્તિમહેશ્વરમ્
તારપૌત્રો મહાતેજાસ્ તારકસ્ય સુતો બલી ॥

તારકાક્ષો ઽપિ દિતિજઃ કમલાક્ષશ્ ચ વીર્યવાન્
વિદ્યુન્માલી ચ દૈત્યેશઃ અન્યે ચાપિ સબાન્ધવાઃ ॥

ત્યક્ત્વા દેવં મહાદેવં માયયા ચ હરેઃ પ્રભોઃ
સર્વે વિનષ્ટાઃ પ્રધ્વસ્તાઃ સ્વપુરૈઃ પુરસંભવૈઃ ॥

તસ્માત્સદા પૂજનીયો લિઙ્ગમૂર્તિઃ સદાશિવઃ
યાવત્પૂજા સુરેશાનાં તાવદેવ સ્થિતિર્યતઃ ॥

પૂજનીયઃ શિવો નિત્યં શ્રદ્ધયા દેવપુઙ્ગવૈઃ
સર્વલિઙ્ગમયો લોકઃ સર્વં લિઙ્ગે પ્રતિષ્ઠિતમ્ ॥

તસ્માત્ સમ્પૂજયેલ્લિઙ્ગં ય ઇચ્છેત્સિદ્ધિમાત્મનઃ
સર્વે લિઙ્ગાર્ચનાદેવ દેવા દૈત્યાશ્ ચ દાનવાઃ ॥

યક્ષા વિદ્યાધરાઃ સિદ્ધા રાક્ષસાઃ પિશિતાશનાઃ
પિતરો મુનયશ્ચાપિ પિશાચાઃ કિન્નરાદયઃ ॥

અર્ચયિત્વા લિઙ્ગમૂર્તિ સંસિદ્ધા નાત્ર સંશયઃ
તસ્માલ્લિઙ્ગં યજેન્નિત્યં યેન કેનાપિ વા સુરાઃ ॥

પશવશ્ ચ વયં તસ્ય દેવદેવસ્ય ધીમતઃ
પશુત્વં ચ પરિત્યજ્ય કૃત્વા પાશુપતં તતઃ ॥

પૂજનીયો મહાદેવો લિઙ્ગમૂર્તિઃ સનાતનઃ
વિશોધ્ય ચૈવ ભૂતાનિ પઞ્ચભિઃ પ્રણવૈઃ સમમ્ ॥

પ્રાણાયામૈઃ સમાયુક્તૈઃ પઞ્ચભિઃ સુરપુઙ્ગવાઃ
ચતુર્ભિઃ પ્રણવૈશ્ચૈવ પ્રાણાયામપરાયણૈઃ ॥

ત્રિભિશ્ ચ પ્રણવૈર્દેવાઃ પ્રાણાયામૈસ્તથાવિધૈઃ
દ્વિધા ન્યસ્ય તથૌંકારં પ્રાણાયામપરાયણઃ ॥

તતશ્ચૌંકારમ્ ઉચ્ચાર્ય પ્રાણાપાનૌ નિયમ્ય ચ
જ્ઞાનામૃતેન સર્વાઙ્ગાન્ય્ આપૂર્ય પ્રણવેન ચ ॥

ગુણત્રયં ચતુર્ધાખ્યમ્ અહઙ્કારં ચ સુવ્રતાઃ
તન્માત્રાણિ ચ ભૂતાનિ તથા બુદ્ધીન્દ્રિયાણિ ચ ॥

કર્મેન્દ્રિયાણિ સંશોધ્ય પુરુષં યુગલં તથા
ચિદાત્માનં તનું કૃત્વા ચાગ્નિર્ભસ્મેતિ સંસ્પૃશેત્ ॥

વાયુર્ભસ્મેતિ ચ વ્યોમ તથામ્ભઃ પૃથિવી તથા
ત્રિયાયુષં ત્રિસંધ્યં ચ ધૂલયેદ્ ભસિતેન યઃ ॥

સ યોગી સર્વતત્ત્વજ્ઞો વ્રતં પાશુપતં ત્વિદમ્
ભવેન પાશમોક્ષાર્થં કથિતં દેવસત્તમાઃ ॥

એવં પાશુપતં કૃત્વા સમ્પૂજ્ય પરમેશ્વરમ્
લિઙ્ગે પુરા મયા દૃષ્ટે વિષ્ણુના ચ મહાત્મના ॥

પશવો નૈવ જાયન્તે વર્ષમાત્રેણ દેવતાઃ
અસ્માભિઃ સર્વકાર્યાણાં દેવમભ્યર્ચ્ય યત્નતઃ ॥

બાહ્યે ચાભ્યન્તરે ચૈવ મન્યે કર્તવ્યમીશ્વરમ્
પ્રતિજ્ઞા મમ વિષ્ણોશ્ ચ દિવ્યૈષા સુરસત્તમાઃ ॥

મુનીનાં ચ ન સંદેહસ્ તસ્માત્ સમ્પૂજયેચ્છિવમ્
સા હાનિસ્તન્મહચ્છિદ્રં સ મોહઃ સા ચ મૂકતા ॥

યત્ક્ષણં વા મુહૂર્તં વા શિવમેકં ન ચિન્તયેત્
ભવભક્તિપરા યે ચ ભવપ્રણતચેતસઃ ॥

ભવસંસ્મરણોદ્યુક્તા ન તે દુઃખસ્ય ભાજનમ્
ભવનાનિ મનોજ્ઞાનિ દિવ્યમાભરણં સ્ત્રિયઃ ॥

ધનં વા તુષ્ટિપર્યન્તં શિવપૂજાવિધેઃ ફલમ્
યે વાઞ્છન્તિ મહાભોગાન્ રાજ્યં ચ ત્રિદશાલયે
તે ઽર્ચયન્તુ સદા કાલં લિઙ્ગમૂર્તિં મહેશ્વરમ્ ॥

હત્વા ભિત્ત્વા ચ ભૂતાનિ દગ્ધ્વા સર્વમિદં જગત્ ॥

યજેદેકં વિરૂપાક્ષં ન પાપૈઃ સ પ્રલિપ્યતે
શૈલં લિઙ્ગં મદીયં હિ સર્વદેવનમસ્કૃતમ્ ॥

ઇત્યુક્ત્વા પૂર્વમભ્યર્ચ્ય રુદ્રં ત્રિભુવનેશ્વરમ્
તુષ્ટાવ વાગ્ભિર્ ઇષ્ટાભિર્ દેવદેવં ત્રિયંબકમ્ ॥

તદાપ્રભૃતિ શક્રાદ્યાઃ પૂજયામાસુરીશ્વરમ્
સાક્ષાત્પાશુપતં કૃત્વા ભસ્મોદ્ધૂલિતવિગ્રહાઃ ॥