લિઙ્ગપુરાણ · અધ્યાય 1.68

યદોર્વંશં પ્રવક્ષ્યામિ જ્યેષ્ઠસ્યોત્તમતેજસઃ
સંક્ષેપેણાનુપૂર્વ્યાચ્ચ ગદતો મે નિબોધત ॥

યદોઃ પુત્રા બભૂવુર્ હિ પઞ્ચ દેવસુતોપમાઃ
સહસ્રજિત્સુતો જ્યેષ્ઠઃ ક્રોષ્ટુર્ નીલો ઽજકો લઘુઃ ॥

સહસ્રજિત્સુતસ્તદ્વચ્ છતજિન્નામ પાર્થિવઃ
સુતાઃ શતજિતઃ ખ્યાતાસ્ ત્રયઃ પરમકીર્તયઃ ॥

હૈહયશ્ ચ હયશ્ચૈવ રાજા વેણુહયશ્ ચ યઃ
હૈહયસ્ય તુ દાયાદો ધર્મ ઇત્યભિવિશ્રુતઃ ॥

તસ્ય પુત્રો ઽભવદ્વિપ્રા ધર્મનેત્ર ઇતિ શ્રુતઃ
ધર્મનેત્રસ્ય કીર્તિસ્ તુ સંજયસ્ તસ્ય ચાત્મજઃ ॥

સંજયસ્ય તુ દાયાદો મહિષ્માન્નામ ધાર્મિકઃ
આસીન્ મહિષ્મતઃ પુત્રો ભદ્રશ્રેણ્યઃ પ્રતાપવાન્ ॥

ભદ્રશ્રેણ્યસ્ય દાયાદો દુર્દમો નામ પાર્થિવઃ
દુર્દમસ્ય સુતો ધીમાન્ ધનકો નામ વિશ્રુતઃ ॥

ધનકસ્ય તુ દાયાદાશ્ ચત્વારો લોકસંમતાઃ
કૃતવીર્યઃ કૃતાગ્નિશ્ ચ કૃતવર્મા તથૈવ ચ ॥

કૃતૌજાશ્ ચ ચતુર્થો ઽભૂત્ કાર્તવીર્યસ્તતો ઽર્જુનઃ
જજ્ઞે બાહુસહસ્રેણ સપ્તદ્વીપેશ્વરોત્તમઃ ॥

તસ્ય રામસ્ તદા ત્વાસીન્ મૃત્યુર્નારાયણાત્મકઃ
તસ્ય પુત્રશતાન્યાસન્ પઞ્ચ તત્ર મહારથાઃ ॥

કૃતાસ્ત્રા બલિનઃ શૂરા ધર્માત્માનો મનસ્વિનઃ
શૂરશ્ ચ શૂરસેનશ્ ચ ધૃષ્ટઃ કૃષ્ણસ્તથૈવ ચ ॥

જયધ્વજશ્ ચ રાજાસીદ્ આવન્તીનાં વિશાં પતિઃ
જયધ્વજસ્ય પુત્રો ઽભૂત્ તાલજઙ્ઘો મહાબલઃ ॥

શતં પુત્રાસ્તુ તસ્યેહ તાલજઙ્ઘાઃ પ્રકીર્તિતાઃ
તેષાં જ્યેષ્ઠો મહાવીર્યો વીતિહોત્રો ઽભવન્નૃપઃ ॥

વૃષપ્રભૃતયશ્ચાન્યે તત્સુતાઃ પુણ્યકર્મણઃ
વૃષો વંશકરસ્તેષાં તસ્ય પુત્રો ઽભવન્મધુઃ ॥

મધોઃ પુત્રશતં ચાસીદ્ વૃષ્ણિસ્તસ્ય તુ વંશભાક્
વૃષ્ણેસ્તુ વૃષ્ણયઃ સર્વે મધોર્વૈ માધવાઃ સ્મૃતાઃ
યાદવા યદુવંશેન નિરુચ્યન્તે તુ હૈહયાઃ ॥

તેષાં પઞ્ચ ગણા હ્યેતે હૈહયાનાં મહાત્મનામ્ ॥

વીતિહોત્રાશ્ ચ હર્યાતા ભોજાશ્ચાવન્તયસ્ તથા
શૂરસેનાસ્તુ વિખ્યાતાસ્ તાલજઙ્ઘાસ્તથૈવ ચ ॥

શૂરશ્ ચ શૂરસેનશ્ ચ વૃષઃ કૃષ્ણસ્તથૈવ ચ
જયધ્વજઃ પઞ્ચમસ્તુ વિખ્યાતા હૈહયોત્તમાઃ ॥

શૂરશ્ ચ શૂરવીરશ્ ચ શૂરસેનસ્ય ચાનઘાઃ
શૂરસેના ઇતિ ખ્યાતા દેશાસ્તેષાં મહાત્મનામ્ ॥

વીતિહોત્રસુતશ્ચાપિ વિશ્રુતો નર્ત ઇત્યુત
દુર્જયઃ કૃષ્ણપુત્રસ્તુ બભૂવામિત્રકર્શનઃ ॥

ક્રોષ્ટુશ્ ચ શૃણુ રાજર્ષેર્ વંશમુત્તમપૌરુષમ્
યસ્યાન્વયે તુ સમ્ભૂતો વિષ્ણુર્ વૃષ્ણિકુલોદ્વહઃ ॥

ક્રોષ્ટોરેકો ઽભવત્પુત્રો વૃજિનીવાન્મહાયશાઃ
તસ્ય પુત્રો ઽભવત્ સ્વાતી કુશઙ્કુસ્ તત્સુતો ઽભવત્ ॥

અથ પ્રસૂતિમિચ્છન્વૈ કુશઙ્કુઃ સુમહાબલઃ
મહાક્રતુભિર્ ઈજે ઽસૌ વિવિધૈરાપ્તદક્ષિણૈઃ ॥

જજ્ઞે ચિત્રરથસ્તસ્ય પુત્રઃ કર્મભિર્ અન્વિતઃ
અથ ચૈત્રરથો વીરો યજ્વા વિપુલદક્ષિણઃ ॥

શશબિન્દુસ્ તુ વૈ રાજા અન્વયાદ્ વ્રતમ્ ઉત્તમમ્
ચક્રવર્તી મહાસત્ત્વો મહાવીર્યો બહુપ્રજાઃ ॥

શશબિન્દોસ્તુ પુત્રાણાં સહસ્રાણામભૂચ્છતમ્
શંસન્તિ તસ્ય પુત્રાણામ્ અનન્તકમ્ અનુત્તમમ્ ॥

અનન્તકાત્ સુતો યજ્ઞો યજ્ઞસ્ય તનયો ધૃતિઃ
ઉશનાસ્તસ્ય તનયઃ સમ્પ્રાપ્ય તુ મહીમિમામ્ ॥

આજહારાશ્વમેધાનાં શતમુત્તમધાર્મિકઃ
સ્મૃતશ્ચોશનસઃ પુત્રઃ સિતેષુર્ નામ પાર્થિવઃ ॥

મરુતસ્તસ્ય તનયો રાજર્ષિર્વંશવર્ધનઃ
વીરઃ કમ્બલબર્હિસ્તુ મરુસ્તસ્યાત્મજઃ સ્મૃતઃ ॥

પુત્રસ્તુ રુક્મકવચો વિદ્વાન્ કમ્બલબર્હિષઃ
નિહત્ય રુક્મકવચો વીરાન્ કવચિનો રણે ॥

ધન્વિનો નિશિતૈર્ બાણૈર્ અવાપ શ્રિયમુત્તમામ્
અશ્વમેધે તુ ધર્માત્મા ઋત્વિગ્ભ્યઃ પૃથિવીં દદૌ ॥

જજ્ઞે તુ રુક્મકવચાત્ પરાવૃત્પરવીરહા
જજ્ઞિરે પઞ્ચ પુત્રાસ્તુ મહાસત્ત્વાઃ પરાવૃતઃ ॥

રુક્મેષુઃ પૃથુરુક્મશ્ ચ જ્યામઘઃ પરિઘો હરિઃ
પરિઘં ચ હરિં ચૈવ વિદેહેષુ પિતા ન્યસત્ ॥

રુક્મેષુરભવદ્રાજા પૃથુરુક્મસ્તદાશ્રયાત્
તૈસ્તુ પ્રવ્રાજિતો રાજા જ્યામઘો ઽવસદાશ્રમે ॥

પ્રશાન્તઃ સ વનસ્થો ઽપિ બ્રાહ્મણૈરેવ બોધિતઃ
જગામ ધનુરાદાય દેશમન્યં ધ્વજી રથી ॥

નર્મદાતીરમેકાકી કેવલં ભાર્યયા યુતઃ
ઋક્ષવન્તં ગિરિં ગત્વા ત્યક્તમન્યૈરુવાસ સઃ ॥

જ્યામઘસ્યાભવદ્ભાર્યા શૈબ્યા શીલવતી સતી
સા ચૈવ તપસોગ્રેણ શૈબ્યા વૈ સમ્પ્રસૂયત ॥

સુતં વિદર્ભં સુભગા વયઃપરિણતા સતી
રાજા પુત્રસુતાયાં તુ વિદ્વાંસૌ ક્રથકૈશિકૌ ॥

પુત્રૌ વિદર્ભરાજસ્ય શૂરૌ રણવિશારદૌ
રોમપાદસ્તૃતીયશ્ ચ બભ્રુસ્તસ્યાત્મજઃ સ્મૃતઃ ॥

સુધૃતિસ્તનયસ્તસ્ય વિદ્વાન્પરમધાર્મિકઃ
કૌશિકસ્તનયસ્તસ્માત્ તસ્માચ્ચૈદ્યાન્વયઃ સ્મૃતઃ ॥

ક્રથો વિદર્ભસ્ય સુતઃ કુન્તિસ્તસ્યાત્મજો ઽભવત્
કુન્તેર્ વૃતસ્તતો જજ્ઞે રણધૃષ્ટઃ પ્રતાપવાન્ ॥

રણધૃષ્ટસ્ય ચ સુતો નિધૃતિઃ પરવીરહા
દશાર્હો નૈધૃતો નામ્ના મહારિગણસૂદનઃ ॥

દશાર્હસ્ય સુતો વ્યાપ્તો જીમૂત ઇતિ તત્સુતઃ
જીમૂતપુત્રો વિકૃતિસ્ તસ્ય ભીમરથઃ સુતઃ ॥

અથ ભીમરથસ્યાસીત્ પુત્રો નવરથઃ કિલ
દાનધર્મરતો નિત્યં સત્યશીલપરાયણઃ ॥

તસ્ય ચાસીદ્દૃઢરથઃ શકુનિસ્તસ્ય ચાત્મજઃ
તસ્માત્ કરમ્ભઃ સમ્ભૂતો દેવરાતો ઽભવત્તતઃ ॥

દેવરાતાદભૂદ્રાજા દેવરાતિર્ મહાયશાઃ
દેવગર્ભોપમો જજ્ઞે યો દેવક્ષત્રનામકઃ ॥

દેવક્ષત્રસુતઃ શ્રીમાન્ મધુર્નામ મહાયશાઃ
મધૂનાં વંશકૃદ્રાજા મધોસ્તુ કુરુવંશકઃ ॥

કુરુવંશાદ્ અનુસ્ તસ્માત્ પુરુત્વાન્ પુરુષોત્તમઃ
અંશુર્જજ્ઞે ચ વૈદર્ભ્યાં ભદ્રવત્યાં પુરુત્વતઃ ॥

ઐક્ષ્વાકીમ્ અવહચ્ચાંશુઃ સત્ત્વસ્તસ્માદજાયત
સત્ત્વાત્ સર્વગુણોપેતઃ સાત્વતઃ કુલવર્ધનઃ ॥

જ્યામઘસ્ય મયા પ્રોક્તા સૃષ્ટિર્વૈ વિસ્તરેણ વઃ
યઃ પઠેચ્છૃણુયાદ્વાપિ નિસૃષ્ટિં જ્યામઘસ્ય તુ ॥

પ્રજીવત્યેતિ વૈ સ્વર્ગં રાજ્યં સૌખ્યં ચ વિન્દતિ ॥