લિઙ્ગપુરાણ · અધ્યાય 1.67

બ્રાહ્મણપ્રમુખા વર્ણાઃ સર્વે શૃણ્વન્તુ મે વચઃ
જ્યેષ્ઠં પ્રતિ યથા રાજ્યં ન દેયં મે કથઞ્ચન ॥

મમ જ્યેષ્ઠેન યદુના નિયોગો નાનુપાલિતઃ
પ્રતિકૂલમતિશ્ચૈવ ન સ પુત્રઃ સતાં મતઃ ॥

માતાપિત્રોર્વચનકૃત્ સદ્ભિઃ પુત્રઃ પ્રશસ્યતે
સ પુત્રઃ પુત્રવદ્ યસ્ તુ વર્તતે માતૃપિતૃષુ ॥

યદુનાહમવજ્ઞાતસ્ તથા તુર્વસુનાપિ ચ
દ્રુહ્યેન ચાનુના ચૈવ મય્યવજ્ઞા કૃતા ભૃશમ્ ॥

પુરુણા ચ કૃતં વાક્યં માનિતશ્ ચ વિશેષતઃ
કનીયાન્મમ દાયાદો જરા યેન ધૃતા મમ ॥

શુક્રેણ મે સમાદિષ્ટા દેવયાન્યાઃ કૃતે જરા
પ્રાર્થિતેન પુનસ્તેન જરા સંચારિણી કૃતા ॥

શુક્રેણ ચ વરો દત્તઃ કાવ્યેનોશનસા સ્વયમ્
પુત્રો યસ્ત્વનુવર્તેત સ તે રાજ્યધરસ્ત્વિતિ ॥

ભવન્તો ઽપ્યનુજાનન્તુ પૂરૂ રાજ્યે ઽભિષિચ્યતે
યઃ પુત્રો ગુણસમ્પન્નો માતાપિત્રોર્હિતઃ સદા ॥

સર્વમર્હતિ કલ્યાણં કનીયાન્ અપિ સ પ્રભુઃ
અર્હઃ પૂરુરિદં રાજ્યં યઃ સુતો વાક્યકૃત્તવ ॥

વરદાનેન શુક્રસ્ય ન શક્યં કર્તુમન્યથા
એવં જાનપદૈસ્તુષ્ટૈર્ ઇત્યુક્તો નાહુષસ્તદા ॥

અભિષિચ્ય તતો રાજ્યં પૂરું સ સુતમ્ આત્મનઃ
દિશિ દક્ષિણપૂર્વસ્યાં તુર્વસું પુત્રમાદિશત્ ॥

દક્ષિણાયામથો રાજા યદું જ્યેષ્ઠં ન્યયોજયત્
પ્રતીચ્યામુત્તરસ્યાં તુ દ્રુહ્યું ચાનું ચ તાવુભૌ ॥

સપ્તદ્વીપાં યયાતિસ્તુ જિત્વા પૃથ્વીં સસાગરામ્
વ્યભજચ્ચ ત્રિધા રાજ્યં પુત્રેભ્યો નાહુષસ્તદા ॥

પુત્રસંક્રામિતશ્રીસ્તુ હર્ષનિર્ભરમાનસઃ
પ્રીતિમાનભવદ્રાજા ભારમ્ આવેશ્ય બન્ધુષુ ॥

અત્ર ગાથા મહારાજ્ઞા પુરા ગીતા યયાતિના
યાભિઃ પ્રત્યાહરેત્ કામાન્ સર્વતો ઽઙ્ગાનિ કૂર્મવત્ ॥

તાભિર્ એવ નરઃ શ્રીમાન્ નાન્યથા કર્મકોટિકૃત્
ન જાતુ કામઃ કામાનામ્ ઉપભોગેન શામ્યતિ ॥

હવિષા કૃષ્ણવર્ત્મેવ ભૂય એવાભિવર્ધતે
યત્પૃથિવ્યાં વ્રીહિયવં હિરણ્યં પશવઃ સ્ત્રિયઃ ॥

નાલમેકસ્ય તત્સર્વમ્ ઇતિ મત્વા શમં વ્રજેત્
યદા ન કુરુતે ભાવં સર્વભૂતેષુ પાપકમ્ ॥

કર્મણા મનસા વાચા બ્રહ્મ સમ્પદ્યતે તદા
યદા પરાન્ન બિભેતિ પરે ચાસ્માન્ન બિભ્યતિ ॥

યદા ન નિન્દેન્ન દ્વેષ્ટિ બ્રહ્મ સમ્પદ્યતે તદા
યા દુસ્ત્યજા દુર્મતિભિર્ યાનજીર્યતિ જીર્યતઃ ॥

યો ઽસૌ પ્રાણાન્તિકો રોગસ્ તાં તૃષ્ણાં ત્યજતઃ સુખમ્
જીર્યન્તિ જીર્યતઃ કેશા દન્તા જીર્યન્તિ જીર્યતઃ ॥

ચક્ષુઃશ્રોત્રે ચ જીર્યેતે તૃષ્ણૈકા નિરુપદ્રવા
જીર્યન્તિ દેહિનઃ સર્વે સ્વભાવાદેવ નાન્યથા ॥

જીવિતાશા ધનાશા ચ જીર્યતો ઽપિ ન જીર્યતે
યચ્ચ કામસુખં લોકે યચ્ચ દિવ્યં મહત્સુખમ્ ॥

તૃષ્ણાક્ષયસુખસ્યૈતત્ કલાં નાર્હતિ ષોડશીમ્
એવમુક્ત્વા સ રાજર્ષિઃ સદારઃ પ્રાવિશદ્વનમ્ ॥

ભૃગુતુઙ્ગે તપસ્તપ્ત્વા તત્રૈવ ચ મહાયશાઃ
સાધયિત્વા ત્વનશનં સદારઃ સ્વર્ગમાપ્તવાન્ ॥

તસ્ય વંશાસ્તુ પઞ્ચૈતે પુણ્યા દેવર્ષિસત્કૃતાઃ
યૈર્વ્યાપ્તા પૃથિવી કૃત્સ્ના સૂર્યસ્યેવ મરીચિભિઃ ॥

ધની પ્રજાવાન્ આયુષ્માન્ કીર્તિમાંશ્ ચ ભવેન્નરઃ
યયાતિચરિતં પુણ્યં પઠઞ્છૃણ્વંશ્ ચ બુદ્ધિમાન્ ॥

સર્વપાપવિનિર્મુક્તઃ શિવલોકે મહીયતે ॥