લિઙ્ગપુરાણ · અધ્યાય 1.58

અભ્યષિઞ્ચત્કથં બ્રહ્મા ચાધિપત્યે પ્રજાપતિઃ
દેવદૈત્યમુખાન્ સર્વાન્ સર્વાત્મા વદ સાંપ્રતમ્ ॥

ગ્રહાધિપત્યે ભગવાન્ અભ્યષિઞ્ચદ્દિવાકરમ્
ઋક્ષાણામોષધીનાં ચ સોમં બ્રહ્મા પ્રજાપતિઃ ॥

અપાં ચ વરુણં દેવં ધનાનાં યક્ષપુઙ્ગવમ્
આદિત્યાનાં તથા વિષ્ણું વસૂનાં પાવકં તથા ॥

પ્રજાપતીનાં દક્ષં ચ મરુતાં શક્રમેવ ચ
દૈત્યાનાં દાનવાનાં ચ પ્રહ્લાદં દૈત્યપુઙ્ગવમ્ ॥

ધર્મં પિતૄણામ્ અધિપં નિરૃતિં પિશિતાશિનામ્
રુદ્રં પશૂનાં ભૂતાનાં નન્દિનં ગણનાયકમ્ ॥

વીરાણાં વીરભદ્રં ચ પિશાચાનાં ભયંકરમ્
માતૄણાં ચૈવ ચામુણ્ડાં સર્વદેવનમસ્કૃતામ્ ॥

રુદ્રાણાં દેવદેવેશં નીલલોહિતમીશ્વરમ્
વિઘ્નાનાં વ્યોમજં દેવં ગજાસ્યં તુ વિનાયકમ્ ॥

સ્ત્રીણાં દેવીમુમાં દેવીં વચસાં ચ સરસ્વતીમ્
વિષ્ણું માયાવિનાં ચૈવ સ્વાત્માનં જગતાં તથા ॥

હિમવન્તં ગિરીણાં તુ નદીનાં ચૈવ જાહ્નવીમ્
સમુદ્રાણાં ચ સર્વેષામ્ અધિપં પયસાં નિધિમ્ ॥

વૃક્ષાણાં ચૈવ ચાશ્વત્થં પ્લક્ષં ચ પ્રપિતામહઃ ॥

ગન્ધર્વવિદ્યાધરકિન્નરાણામ્ ઈશં પુનશ્ ચિત્રરથં ચકાર
નાગાધિપં વાસુકિમુગ્રવીર્યં સર્પાધિપં તક્ષકમુગ્રવીર્યમ્ ॥

સુપર્ણમીશં પતતામથાશ્વરાજાનમુચ્ચૈઃશ્રવસં ચકાર ॥

સિંહં મૃગાણાં વૃષભં ગવાં ચ મૃગાધિપાનાં શરભં ચકાર
સેનાધિપાનાં ગુહમપ્રમેયં શ્રુતિસ્મૃતીનાં લકુલીશમીશમ્ ॥

અભ્યષિઞ્ચત્સુધર્માણં તથા શઙ્ખપદં દિશામ્
કેતુમન્તં ક્રમેણૈવ હેમરોમાણમેવ ચ ॥

પૃથિવ્યાં પૃથુમીશાનં સર્વેષાં તુ મહેશ્વરમ્
ચતુર્મૂર્તિષુ સર્વજ્ઞં શઙ્કરં વૃષભધ્વજમ્ ॥

પ્રસાદાદ્ભગવાઞ્છમ્ભોશ્ ચાભ્યષિઞ્ચદ્યથાક્રમમ્
પુરાભિષિચ્ય પુણ્યાત્મા રરાજ ભુવનેશ્વરઃ ॥

એતદ્વો વિસ્તરેણૈવ કથિતં મુનિપુઙ્ગવાઃ
અભિષિક્તાસ્તતસ્ત્વેતે વિશિષ્ટા વિશ્વયોનિના ॥