લિઙ્ગપુરાણ · અધ્યાય 1.56

વીથ્યાશ્રયાણિ ચરતિ નક્ષત્રાણિ નિશાકરઃ
ત્રિચક્રોભયતો ઽશ્વશ્ ચ વિજ્ઞેયસ્તસ્ય વૈ રથઃ ॥

શતારૈશ્ ચ ત્રિભિશ્ચક્રૈર્ યુક્તઃ શુક્લૈર્હયોત્તમૈઃ
દશભિસ્ત્વકૃશૈર્ દિવ્યૈર્ અસંગૈસ્ તૈર્ મનોજવૈઃ ॥

રથેનાનેન દેવૈશ્ ચ પિતૃભિશ્ચૈવ ગચ્છતિ
સોમો હ્યમ્બુમયૈર્ ગોભિઃ શુક્લૈઃ શુક્લગભસ્તિમાન્ ॥

ક્રમતે શુક્લપક્ષાદૌ ભાસ્કરાત્પરમાસ્થિતઃ
આપૂર્યતે પરસ્યાન્તઃ સતતં દિવસક્રમાત્ ॥

દેવૈઃ પીતં ક્ષયે સોમમ્ આપ્યાયયતિ નિત્યશઃ
પીતં પઞ્ચદશાહં તુ રશ્મિનૈકેન ભાસ્કરઃ ॥

આપૂરયન્ સુષુમ્નેન ભાગં ભાગમનુક્રમાત્
ઇત્યેષા સૂર્યવીર્યેણ ચન્દ્રસ્યાપ્યાયિતા તનુઃ ॥

સ પૌર્ણમાસ્યાં દૃશ્યેત શુક્લઃ સમ્પૂર્ણમણ્ડલઃ
એવમાપ્યાયિતં સોમં શુક્લપક્ષે દિનક્રમાત્ ॥

તતો દ્વિતીયાપ્રભૃતિ બહુલસ્ય ચતુર્દશીમ્
પિબન્ત્યમ્બુમયં દેવા મધુ સૌમ્યં સુધામૃતમ્ ॥

સંભૃતં ત્વર્ધમાસેન હ્ય્ અમૃતં સૂર્યતેજસા
પાનાર્થમમૃતં સોમં પૌર્ણમાસ્યામુપાસતે ॥

એકરાત્રિં સુરાઃ સર્વે પિતૃભિસ્ત્વૃષિભિઃ સહ
સોમસ્ય કૃષ્ણપક્ષાદૌ ભાસ્કરાભિમુખસ્ય ચ ॥

પ્રક્ષીયન્તે પરસ્યાન્તઃ પીયમાનાઃ કલાઃ ક્રમાત્
ત્રયસ્ત્રિંશચ્છતાશ્ચૈવ ત્રયસ્ત્રિંશત્તથૈવ ચ ॥

ત્રયસ્ત્રિંશત્સહસ્રાણિ દેવાઃ સોમં પિબન્તિ વૈ
એવં દિનક્રમાત્પીતે વિબુધૈસ્તુ નિશાકરે ॥

પીત્વાર્ધમાસં ગચ્છન્તિ અમાવાસ્યાં સુરોત્તમાઃ
પિતરશ્ચોપતિષ્ઠન્તિ અમાવાસ્યાં નિશાકરમ્ ॥

તતઃ પઞ્ચદશે ભાગે કિંચિચ્છિષ્ટે કલાત્મકે
અપરાહ્ણે પિતૃગણા જઘન્યં પર્યુપાસતે ॥

પિબન્તિ દ્વિકલં કાલં શિષ્ટા તસ્ય કલા તુ યા
નિસૃતં તદમાવાસ્યાં ગભસ્તિભ્યઃ સ્વધામૃતમ્ ॥

માસતૃપ્તિમવાપ્યાગ્ર્યાં પીત્વા ગચ્છન્તિ તે ઽમૃતમ્
પિતૃભિઃ પીયમાનસ્ય પઞ્ચદશ્યાં કલા તુ યા ॥

યાવત્તુ ક્ષીયતે તસ્ય ભાગઃ પઞ્ચદશસ્તુ સઃ
અમાવાસ્યાં તતસ્તસ્યા અન્તરા પૂર્યતે પુનઃ ॥

વૃદ્ધિક્ષયૌ વૈ પક્ષાદૌ ષોડશ્યાં શશિનઃ સ્મૃતૌ
એવં સૂર્યનિમિત્તૈષા પક્ષવૃદ્ધિર્નિશાકરે ॥