લિઙ્ગપુરાણ · અધ્યાય 1.50

શિતાન્તશિખરે શક્રઃ પારિજાતવને શુભે
તસ્ય પ્રાચ્યાં કુમુદાદ્રિ કૂટો ઽસૌ બહુવિસ્તરઃ ॥

અષ્ટૌ પુરાણ્યુદીર્ણાનિ દાનવાનાં દ્વિજોત્તમાઃ
સુવર્ણકોટરે પુણ્યે રાક્ષસાનાં મહાત્મનામ્ ॥

નીલકાનાં પુરાણ્યાહુર્ અષ્ટષષ્ટિર્દ્વિજોત્તમાઃ
મહાનીલે ઽપિ શૈલેન્દ્રે પુરાણિ દશ પઞ્ચ ચ ॥

હયાનનાનાં મુખ્યાનાં કિન્નરાણાં ચ સુવ્રતાઃ
વેણુસૌધે મહાશૈલે વિદ્યાધરપુરત્રયમ્ ॥

વૈકુણ્ઠે ગરુડઃ શ્રીમાન્ કરઞ્જે નીલલોહિતઃ
વસુધારે વસૂનાં તુ નિવાસઃ પરિકીર્તિતઃ ॥

રત્નધારે ગિરિવરે સપ્તર્ષીણાં મહાત્મનામ્
સપ્તસ્થાનાનિ પુણ્યાનિ સિદ્ધાવાસયુતાનિ ચ ॥

મહત્પ્રજાપતેઃ સ્થાનમ્ એકશૃઙ્ગે નગોત્તમે
ગજશૈલે તુ દુર્ગાદ્યાઃ સુમેધે વસવસ્ તથા ॥

આદિત્યાશ્ ચ તથા રુદ્રાઃ કૃતાવાસાસ્તથાશ્વિનૌ
અશીતિર્દેવપુર્યસ્તુ હેમકક્ષે નગોત્તમે ॥

સુનીલે રક્ષસાં વાસાઃ પઞ્ચકોટિશતાનિ ચ
પઞ્ચકૂટે પુરાણ્યાસન્ પઞ્ચકોટિપ્રમાણતઃ ॥

શતશૃઙ્ગે પુરશતં યક્ષાણામમિતૌજસામ્
તામ્રાભે કાદ્રવેયાણાં વિશાખે તુ ગુહસ્ય વૈ ॥

શ્વેતોદરે મુનિશ્રેષ્ઠાઃ સુપર્ણસ્ય મહાત્મનઃ
પિશાચકે કુબેરસ્ય હરિકૂટે હરેર્ગૃહમ્ ॥

કુમુદે કિંનરાવાસસ્ ત્વ્ અઞ્જને ચારણાલયઃ
કૃષ્ણે ગન્ધર્વનિલયઃ પાણ્ડુરે પુરસપ્તકમ્ ॥

વિદ્યાધરાણાં વિપ્રેન્દ્રા વિશ્વભોગસમન્વિતમ્
સહસ્રશિખરે શૈલે દૈત્યાનામુગ્રકર્મણામ્ ॥

પુરાણાં તુ સહસ્રાણિ સપ્ત શક્રારિણાં દ્વિજાઃ
મુકુટે પન્નગાવાસઃ પુષ્પકેતૌ મુનીશ્વરાઃ ॥

વૈવસ્વતસ્ય સોમસ્ય વાયોર્નાગાધિપસ્ય ચ
તક્ષકે ચૈવ શૈલેન્દ્રે ચત્વાર્યાયતનાનિ ચ ॥

બ્રહ્મેન્દ્રવિષ્ણુરુદ્રાણાં ગુહસ્ય ચ મહાત્મનઃ
કુબેરસ્ય ચ સોમસ્ય તથાન્યેષાં મહાત્મનામ્ ॥

સન્ત્યાયતનમુખ્યાનિ મર્યાદાપર્વતેષ્વપિ
શ્રીકણ્ઠાદ્રિગુહાવાસી સર્વાવાસઃ સહોમયા ॥

શ્રીકણ્ઠસ્યાધિપત્યં વૈ સર્વદેવેશ્વરસ્ય ચ
અણ્ડસ્યાસ્ય પ્રવૃત્તિસ્તુ શ્રીકણ્ઠેન ન સંશયઃ ॥

અનન્તેશાદયસ્ત્વેવં પ્રત્યેકં ચાણ્ડપાલકાઃ
ચક્રવર્તિન ઇત્યુક્તાસ્ તતો વિદ્યેશ્વરાસ્ત્વિહ ॥

શ્રીકણ્ઠાધિષ્ઠિતાન્યત્ર સ્થાનાનિ ચ સમાસતઃ
મર્યાદાપર્વતેષ્વદ્ય શૃણ્વન્તુ પ્રવદામ્ય્ અહમ્ ॥

શ્રીકણ્ઠાધિષ્ઠિતં વિશ્વં ચરાચરમિદં જગત્
કાલાગ્નિશિવપર્યન્તં કથં વક્ષ્યે સવિસ્તરમ્ ॥