લિઙ્ગપુરાણ · અધ્યાય 1.47

આગ્નીધ્રં જ્યેષ્ઠદાયાદં કામ્યપુત્રં મહાબલમ્
પ્રિયવ્રતો ઽભ્યષિઞ્ચદ્વૈ જંબૂદ્વીપેશ્વરં નૃપઃ ॥

સો ઽતીવ ભવભક્તશ્ ચ તપસ્વી તરુણઃ સદા
ભવાર્ચનરતઃ શ્રીમાન્ ગોમાન્ધીમાન્દ્વિજર્ષભાઃ ॥

તસ્ય પુત્રા બભૂવુસ્તે પ્રજાપતિસમા નવ
સર્વે માહેશ્વરાશ્ચૈવ મહાદેવપરાયણાઃ ॥

જ્યેષ્ઠો નાભિર્ ઇતિ ખ્યાતસ્ તસ્ય કિંપુરુષો ઽનુજઃ
હરિવર્ષસ્તૃતીયસ્તુ ચતુર્થો વૈ ત્વિલાવૃતઃ ॥

રમ્યસ્તુ પઞ્ચમસ્ તત્ર હિરણ્માન્ ષષ્ઠ ઉચ્યતે
કુરુસ્તુ સપ્તમસ્તેષાં ભદ્રાશ્વસ્ત્વષ્ટમઃ સ્મૃતઃ ॥

નવમઃ કેતુમાલસ્તુ તેષાં દેશાન્નિબોધત
નાભેસ્તુ દક્ષિણં વર્ષં હેમાખ્યં તુ પિતા દદૌ ॥

હેમકૂટં તુ યદ્વર્ષં દદૌ કિંપુરુષાય સઃ
નૈષધં યત્સ્મૃતં વર્ષં હરયે તત્પિતા દદૌ ॥

ઇલાવૃતાય પ્રદદૌ મેરુર્યત્ર તુ મધ્યમઃ
નીલાચલાશ્રિતં વર્ષં રમ્યાય પ્રદદૌ પિતા ॥

શ્વેતં યદુત્તરં તસ્માત્ પિત્રા દત્તં હિરણ્મતે
યદુત્તરં શૃઙ્ગવર્ષં પિતા તત્કુરવે દદૌ ॥

વર્ષં માલ્યવતં ચાપિ ભદ્રાશ્વસ્ય ન્યવેદયત્
ગન્ધમાદનવર્ષં તુ કેતુમાલાય દત્તવાન્ ॥

ઇત્યેતાનિ મહાન્તીહ નવ વર્ષાણિ ભાગશઃ
આગ્નીધ્રસ્તેષુ વર્ષેષુ પુત્રાંસ્તાનભિષિચ્ય વૈ ॥

યથાક્રમં સ ધર્માત્મા તતસ્તુ તપસિ સ્થિતઃ
તપસા ભાવિતશ્ચૈવ સ્વાધ્યાયનિરતસ્ત્વભૂત્ ॥

સ્વાધ્યાયનિરતઃ પશ્ચાચ્ છિવધ્યાનરતસ્ ત્વભૂત્
યાનિ કિંપુરુષાદ્યાનિ વર્ષાણ્યષ્ટૌ શુભાનિ ચ ॥

તેષાં સ્વભાવતઃ સિદ્ધિઃ સુખપ્રાયા હ્યયત્નતઃ
વિપર્યયો ન તેષ્વસ્તિ જરામૃત્યુભયં ન ચ ॥

ધર્માધર્મૌ ન તેષ્વાસ્તાં નોત્તમાધમમધ્યમાઃ
ન તેષ્વસ્તિ યુગાવસ્થા ક્ષેત્રેષ્વષ્ટસુ સર્વતઃ ॥

રુદ્રક્ષેત્રે મૃતાશ્ચૈવ જઙ્ગમાઃ સ્થાવરાસ્ તથા
ભક્તાઃ પ્રાસંગિકાશ્ચાપિ તેષુ ક્ષેત્રેષુ યાન્તિ તે ॥

તેષાં હિતાય રુદ્રેણ ચાષ્ટક્ષેત્રં વિનિર્મિતમ્
તત્ર તેષાં મહાદેવઃ સાન્નિધ્યં કુરુતે સદા ॥

દૃષ્ટ્વા હૃદિ મહાદેવમ્ અષ્ટક્ષેત્રનિવાસિનઃ
સુખિનઃ સર્વદા તેષાં સ એવેહ પરા ગતિઃ ॥

નાભેર્નિસર્ગં વક્ષ્યામિ હિમાઙ્કે ઽસ્મિન્નિબોધત
નાભિસ્ત્વજનયત્પુત્રં મેરુદેવ્યાં મહામતિઃ ॥

ઋષભં પાર્થિવશ્રેષ્ઠં સર્વક્ષત્રસ્ય પૂજિતમ્
ઋષભાદ્ભરતો જજ્ઞે વીરઃ પુત્રશતાગ્રજઃ ॥

સો ઽભિષિચ્યાથ ઋષભો ભરતં પુત્રવત્સલઃ
જ્ઞાનવૈરાગ્યમાશ્રિત્ય જિત્વેન્દ્રિયમહોરગાન્ ॥

સર્વાત્મનાત્મનિ સ્થાપ્ય પરમાત્માનમીશ્વરમ્
નગ્નો જટી નિરાહારશ્ ચીરી ધ્વાન્તગતો હિ સઃ ॥

નિરાશસ્ત્યક્તસંદેહઃ શૈવમાપ પરં પદમ્
હિમાદ્રેર્દક્ષિણં વર્ષં ભરતાય ન્યવેદયત્ ॥

તસ્માત્તુ ભારતં વર્ષં તસ્ય નામ્ના વિદુર્બુધાઃ
ભરતસ્યાત્મજો વિદ્વાન્ સુમતિર્નામ ધાર્મિકઃ ॥

બભૂવ તસ્મિંસ્તદ્રાજ્યં ભરતઃ સંન્યવેશયત્
પુત્રસંક્રામિતશ્રીકો વનં રાજા વિવેશ સઃ ॥