લિઙ્ગપુરાણ · અધ્યાય 1.45

સૂત સુવ્યક્તમખિલં કથિતં શઙ્કરસ્ય તુ
સર્વાત્મભાવં રુદ્રસ્ય સ્વરૂપં વક્તુમર્હસિ ॥

ભૂર્ભુવઃ સ્વર્મહશ્ચૈવ જનઃ સાક્ષાત્તપસ્ તથા
સત્યલોકશ્ ચ પાતાલં નરકાર્ણવકોટયઃ ॥

તારકાગ્રહસોમાર્કા ધ્રુવઃ સપ્તર્ષયસ્ તથા
વૈમાનિકાસ્તથાન્યે ચ તિષ્ઠન્ત્યસ્ય પ્રસાદતઃ ॥

અનેન નિર્મિતાસ્ત્વેવં તદાત્માનો દ્વિજર્ષભાઃ
સમષ્ટિરૂપઃ સર્વાત્મા સંસ્થિતઃ સર્વદા શિવઃ ॥

સર્વાત્માનં મહાત્માનં મહાદેવં મહેશ્વરમ્
ન વિજાનન્તિ સંમૂઢા માયયા તસ્ય મોહિતાઃ ॥

તસ્ય દેવસ્ય રુદ્રસ્ય શરીરં વૈ જગત્ત્રયમ્
તસ્માત્પ્રણમ્ય તં વક્ષ્યે જગતાં નિર્ણયં શુભમ્ ॥

પુરા વઃ કથિતં સર્વં મયાણ્ડસ્ય યથા કૃતિઃ
ભુવનાનાં સ્વરૂપં ચ બ્રહ્માણ્ડે કથયામ્યહમ્ ॥

પૃથિવી ચાન્તરિક્ષં ચ સ્વર્મહર્જન એવ ચ
તપઃ સત્યં ચ સપ્તૈતે લોકાસ્ત્વણ્ડોદ્ભવાઃ શુભાઃ ॥

અધસ્તાદત્ર ચૈતેષાં દ્વિજાઃ સપ્ત તલાનિ તુ
મહાતલાદયસ્તેષાં અધસ્તાન્નરકાઃ ક્રમાત્ ॥

મહાતલં હેમતલં સર્વરત્નોપશોભિતમ્
પ્રાસાદૈશ્ ચ વિચિત્રૈશ્ ચ ભવસ્યાયતનૈસ્ તથા ॥

અનન્તેન ચ સંયુક્તં મુચુકુન્દેન ધીમતા
નૃપેણ બલિના ચૈવ પાતાલસ્વર્ગવાસિના ॥

શૈલં રસાતલં વિપ્રાઃ શાર્કરં હિ તલાતલમ્
પીતં સુતલમિત્યુક્તં વિતલં વિદ્રુમપ્રભમ્ ॥

સિતં હિ અતલં તચ્ચ તલં યચ્ચ સિતેતરમ્
ક્ષ્માયાસ્તુ યાવદ્વિસ્તારો હ્ય્ અધસ્તેષાં ચ સુવ્રતાઃ ॥

તલાનાં ચૈવ સર્વેષાં તાવત્સંખ્યા સમાહિતા
સહસ્રયોજનં વ્યોમ દશસાહસ્રમેવ ચ ॥

લક્ષં સપ્તસહસ્રં હિ તલાનાં સઘનસ્ય તુ
વ્યોમ્નઃ પ્રમાણં મૂલં તુ ત્રિંશત્સાહસ્રકેણ તુ ॥

સુવર્ણેન મુનિશ્રેષ્ઠાસ્ તથા વાસુકિના શુભમ્
રસાતલમિતિ ખ્યાતં તથાન્યૈશ્ ચ નિષેવિતમ્ ॥

વિરોચનહિરણ્યાક્ષ નરકાદ્યૈશ્ ચ સેવિતમ્
તલાતલમિતિ ખ્યાતં સર્વશોભાસમન્વિતમ્ ॥

વૈનાયકાદિભિશ્ચૈવ કાલનેમિપુરોગમૈઃ
પૂર્વદેવૈઃ સમાકીર્ણં સુતલં ચ તથાપરૈઃ ॥

વિતલં દાનવાદ્યૈશ્ ચ તારકાગ્નિમુખૈસ્ તથા
મહાન્તકાદ્યૈર્ નાગૈશ્ ચ પ્રહ્લાદેનાસુરેણ ચ ॥

વિતલં ચાત્ર વિખ્યાતં કમ્બલાશ્વનિષેવિતમ્
મહાકુમ્ભેન વીરેણ હયગ્રીવેણ ધીમતા ॥

શઙ્કુકર્ણેન સંભિન્નં તથા નમુચિપૂર્વકૈઃ
તથાન્યૈર્ વિવિધૈર્ વીરૈસ્ તલં ચૈવ સુશોભિતમ્ ॥

તલેષુ તેષુ સર્વેષુ ચામ્બયા પરમેશ્વરઃ
સ્કન્દેન નન્દિના સાર્ધં ગણપૈઃ સર્વતો વૃતઃ ॥

તલાનાં ચૈવ સર્વેષામ્ ઊર્ધ્વતઃ સપ્તસપ્તમાઃ
ક્ષ્માતલાનિ ધરા ચાપિ સપ્તધા કથયામિ વઃ ॥