લિઙ્ગપુરાણ · અધ્યાય 1.44

સ્મરણાદેવ રુદ્રસ્ય સમ્પ્રાપ્તાશ્ ચ ગણેશ્વરાઃ
સર્વે સહસ્રહસ્તાશ્ ચ સહસ્રાયુધપાણયઃ ॥

ત્રિનેત્રાશ્ ચ મહાત્માનસ્ ત્રિદશૈરપિ વન્દિતાઃ
કોટિકાલાગ્નિસંકાશા જટામુકુટધારિણઃ ॥

દંષ્ટ્રાકરાલવદના નિત્યા બુદ્ધાશ્ ચ નિર્મલાઃ
કોટિકોટિગણૈસ્તુલ્યૈર્ આત્મના ચ ગણેશ્વરાઃ
અસંખ્યાતા મહાત્માનસ્ તત્રાજગ્મુર્મુદા યુતાઃ ॥

ગાયન્તશ્ ચ દ્રવન્તશ્ ચ નૃત્યન્તશ્ ચ મહાબલાઃ
મુખાડમ્બરવાદ્યાનિ વાદયન્તસ્તથૈવ ચ ॥

રથૈર્નાગૈર્હયૈશ્ચૈવ સિંહમર્કટવાહનાઃ
વિમાનેષુ તથારૂઢા હેમચિત્રેષુ વૈ ગણાઃ ॥

ભેરીમૃદઙ્ગકાદ્યૈશ્ ચ પણવાનકગોમુખૈઃ
વાદિત્રૈર્વિવિધૈશ્ચાન્યૈઃ પટહૈરેકપુષ્કરૈઃ ॥

ભેરીમુરજસંનાદૈર્ આડમ્બરકડિણ્ડિમૈઃ
મર્દલૈર્વેણુવીણાભિર્ વિવિધૈસ્તાલનિઃસ્વનૈઃ ॥

દર્દુરૈસ્તલઘાતૈશ્ ચ કચ્છપૈઃ પણવૈરપિ
વાદ્યમાનૈર્મહાયોગા આજગ્મુર્દેવસંસદમ્ ॥

તે ગણેશા મહાસત્ત્વાઃ સર્વદેવેશ્વરેશ્વરાઃ
પ્રણમ્ય દેવં દેવીં ચ ઇદં વચનમ્ અબ્રુવન્ ॥

ભગવન્દેવદેવેશ ત્રિયંબક વૃષધ્વજ
કિમર્થં ચ સ્મૃતા દેવ આજ્ઞાપય મહાદ્યુતે ॥

કિં સાગરાઞ્શોષયામો યમં વા સહ કિઙ્કરૈઃ
હન્મો મૃત્યુસુતાં મૃત્યું પશુવદ્ધન્મ પદ્મજમ્ ॥

બદ્ધ્વેન્દ્રં સહ દેવૈશ્ ચ સહ વિષ્ણું ચ વાયુના
આનયામઃ સુસંક્રુદ્ધા દૈત્યાન્વા સહ દાનવૈઃ ॥

કસ્યાદ્ય વ્યસનં ઘોરં કરિષ્યામસ્તવાજ્ઞયા
કસ્ય વાદ્યોત્સવો દેવ સર્વકામસમૃદ્ધયે ॥

તાંસ્તથાવાદિનઃ સર્વાન્ ગણેશાન્ સર્વસંમતાન્
ઉવાચ દેવઃ સમ્પૂજ્ય કોટિકોટિશતાન્પ્રભુઃ ॥

શૃણુધ્વં યત્કૃતે યૂયમ્ ઇહાહૂતા જગદ્ધિતાઃ
શ્રુત્વા ચ પ્રયતાત્માનઃ કુરુધ્વં તદશઙ્કિતાઃ ॥

નન્દીશ્વરો ઽયં પુત્રો નઃ સર્વેષામીશ્વરેશ્વરઃ
વિપ્રો ઽયં નાયકશ્ચૈવ સેનાનીર્ વઃ સમૃદ્ધિમાન્ ॥

તમિમં મમ સંદેશાદ્ યૂયં સર્વે ઽપિ સંમતાઃ
સેનાન્યમ્ અભિષિઞ્ચધ્વં મહાયોગપતિં પતિમ્ ॥

એવમુક્તા ભગવતા ગણપાઃ સર્વ એવ તે
એવમસ્ત્વિતિ સંમન્ત્ર્ય સંભારાનાહરંસ્તતઃ ॥

તસ્ય સર્વાશ્રયં દિવ્યં જાંબૂનદમયં શુભમ્
આસનં મેરુસંકાશં મનોહરમ્ ઉપાહરન્ ॥

નૈકસ્તંભમયં ચાપિ ચામીકરવરપ્રભમ્
મુક્તાદામાવલમ્બં ચ મણિરત્નાવભાસિતમ્ ॥

સ્તંભૈશ્ ચ વૈડૂર્યમયૈઃ કિઙ્કિણીજાલસંવૃતમ્
ચારુરત્નકસંયુક્તં મણ્ડપં વિશ્વતોમુખમ્ ॥

કૃત્વા વિન્યસ્ય તન્મધ્યે તદાસનવરં શુભમ્
તસ્યાગ્રતઃ પાદપીઠં નીલવજ્રાવભાસિતમ્ ॥

ચક્રુઃ પાદપ્રતિષ્ઠાર્થં કલશૌ ચાસ્ય પાર્શ્વગૌ
સમ્પૂર્ણૌ પરમામ્ભોભિર્ અરવિન્દાવૃતાનનૌ ॥

કલશાનાં સહસ્રં તુ સૌવર્ણં રાજતં તથા
તામ્રજં મૃન્મયં ચૈવ સર્વતીર્થામ્બુપૂરિતમ્ ॥

વાસોયુગં તથા દિવ્યં ગન્ધં દિવ્યં તથૈવ ચ
કેયૂરે કુણ્ડલે ચૈવ મુકુટં હારમેવ ચ ॥

છત્રં શતશલાકં ચ વાલવ્યજનમેવ ચ
દત્તં મહાત્મના તેન બ્રહ્મણા પરમેષ્ઠિના ॥

શઙ્ખહારાઙ્ગગૌરેણ પૃષ્ઠેનાપિ વિરાજિતમ્
વ્યજનં ચન્દ્રશુભ્રં ચ હેમદણ્ડં સુચામરમ્ ॥

ઐરાવતઃ સુપ્રતીકો ગજાવેતૌ સુપૂજિતૌ
મુકુટં કાઞ્ચનં ચૈવ નિર્મિતં વિશ્વકર્મણા ॥

કુણ્ડલે ચામલે દિવ્યે વજ્રં ચૈવ વરાયુધમ્
જાંબૂનદમયં સૂત્રં કેયૂરદ્વયમેવ ચ ॥

સમ્ભારાણિ તથાન્યાનિ વિવિધાનિ બહૂન્યપિ
સમન્તાન્ નિન્યુર્ અવ્યગ્રા ગણપા દેવસંમતાઃ ॥

તતો દેવાશ્ ચ સેન્દ્રાશ્ ચ નારાયણમુખાસ્ તથા
મુનયો ભગવાન્બ્રહ્મા નવબ્રહ્માણ એવ ચ ॥

દેવૈશ્ ચ લોકાઃ સર્વે તે તતો જગ્મુર્મુદા યુતાઃ
તેષ્વાગતેષુ સર્વેષુ ભગવાન્પરમેશ્વરઃ ॥

સર્વકાર્યવિધિં કર્તુમ્ આદિદેશ પિતામહમ્
પિતામહો ઽપિ ભગવાન્ નિયોગાદેવ તસ્ય તુ ॥

ચકાર સર્વં ભગવાન્ અભિષેકં સમાહિતઃ
અર્ચયિત્વા તતો બ્રહ્મા સ્વયમેવાભ્યષેચયત્ ॥

તતો વિષ્ણુસ્તતઃ શક્રો લોકપાલાસ્તથૈવ ચ
અભ્યષિઞ્ચન્ત વિધિવદ્ ગણેન્દ્રં શિવશાસનાત્ ॥

ઋષયસ્તુષ્ટુવુશ્ચૈવ પિતા મહપુરોગમાઃ
સ્તુતવત્સુ તતસ્તેષુ વિષ્ણુઃ સર્વજગત્પતિઃ ॥

શિરસ્યઞ્જલિમાદાય તુષ્ટાવ ચ સમાહિતઃ
પ્રાઞ્જલિઃ પ્રણતો ભૂત્વા જયશબ્દં ચકાર ચ ॥

તતો ગણાધિપાઃ સર્વે તતો દેવાસ્તતો ઽસુરાઃ
એવં સ્તુતશ્ચાભિષિક્તો દેવૈઃ સબ્રહ્મકૈસ્તદા ॥

ઉદ્વાહશ્ ચ કૃતસ્તત્ર નિયોગાત્પરમેષ્ઠિનઃ
મરુતાં ચ સુતા દેવી સુયશાખ્યા બભૂવ યા ॥

લબ્ધં શશિપ્રભં છત્રં તયા તત્ર વિભૂષિતમ્
ચામરે ચામરાસક્ત હસ્તાગ્રૈઃ સ્ત્રીગણૈર્યુતા ॥

સિંહાસનં ચ પરમં તયા ચાધિષ્ઠિતં મયા
અલંકૃતા મહાલક્ષ્મ્યા મુકુટાદ્યૈઃ સુભૂષણૈઃ ॥

લબ્ધો હારશ્ ચ પરમો દેવ્યાઃ કણ્ઠગતસ્ તથા
વૃષેન્દ્રશ્ ચ સિતો નાગઃ સિંહઃ સિંહધ્વજસ્ તથા ॥

રથશ્ ચ હેમચ્છત્રં ચ ચન્દ્રબિંબસમપ્રભમ્
અદ્યાપિ સદૃશઃ કશ્ચિન્ મયા નાસ્તિ વિભુઃ ક્વચિત્ ॥

સાન્વયં ચ ગૃહીત્વેશસ્ તથા સંબન્ધિબાન્ધવૈઃ
આરુહ્ય વૃષમીશાનો મયા દેવ્યા ગતઃ શિવઃ ॥

તદા દેવીં ભવં દૃષ્ટ્વા મયા ચ પ્રાર્થયન્ ગણૈઃ
મુનિદેવર્ષયઃ સિદ્ધા આજ્ઞાં પાશુપતીં દ્વિજાઃ ॥

અથાજ્ઞાં પ્રદદૌ તેષામ્ અર્હાણામ્ આજ્ઞયા વિભોઃ
નન્દિકો નગજાભર્તુસ્ તેષાં પાશુપતીં શુભામ્ ॥

તસ્માદ્ધિ મુનયો લબ્ધ્વા તદાજ્ઞાં મુનિપુઙ્ગવાત્
ભવભક્તાસ્તદા ચાસંસ્ તસ્માદેવં સમર્ચયેત્ ॥

નમસ્કારવિહીનસ્તુ નામ ઉદ્ગિરયેદ્ભવે
બ્રહ્મઘ્નદશસંતુલ્યં તસ્ય પાપં ગરીયસમ્ ॥

તસ્માત્સર્વપ્રકારેણ નમસ્કારાદિમુચ્ચરેત્
આદૌ કુર્યાન્નમસ્કારં તદન્તે શિવતાં વ્રજેત્ ॥