લિઙ્ગપુરાણ · અધ્યાય 1.42

ગતે પુણ્યે ચ વરદે સહસ્રાક્ષે શિલાશનઃ
આરાધયન્મહાદેવં તપસાતોષયદ્ભવમ્ ॥

અથ તસ્યૈવમનિશં તત્પરસ્ય દ્વિજસ્ય તુ
દિવ્યં વર્ષસહસ્રં તુ ગતં ક્ષણમિવાદ્ભુતમ્ ॥

વલ્મીકેનાવૃતાઙ્ગશ્ ચ લક્ષ્યઃ કીટગણૈર્મુનિઃ
વજ્રસૂચીમુખૈશ્ચાન્યૈ રક્તકીટૈશ્ ચ સર્વતઃ ॥

નિર્માંસરુધિરત્વગ્ વૈ નિર્લેપઃ કુડ્યવત્ સ્થિતઃ
અસ્થિશેષો ઽભવત્પશ્ચાત્ તમમન્યત શઙ્કરઃ ॥

યદા સ્પૃષ્ટો મુનિસ્તેન કરેણ ચ સ્મરારિણા
તદૈવ મુનિશાર્દૂલશ્ ચોત્સસર્જ ક્લમં દ્વિજઃ ॥

તપતસ્તસ્ય તપસા પ્રભુસ્તુષ્ટાથ શઙ્કરઃ
તુષ્ટસ્તવેત્યથોવાચ સગણશ્ચોમયા સહ ॥

તપસાનેન કિં કાર્યં ભવતસ્તે મહામતે
દદામિ પુત્રં સર્વજ્ઞં સર્વશાસ્ત્રાર્થપારગમ્ ॥

તતઃ પ્રણમ્ય દેવેશં સ્તુત્વોવાચ શિલાશનઃ
હર્ષગદ્ગદયા વાચા સોમં સોમવિભૂષણમ્ ॥

ભગવન્દેવદેવેશ ત્રિપુરાર્દન શઙ્કર
અયોનિજં મૃત્યુહીનં પુત્રમિચ્છામિ સત્તમ ॥

પૂર્વમારાધિતઃ પ્રાહ તપસા પરમેશ્વરઃ
શિલાદં બ્રહ્મણા રુદ્રઃ પ્રીત્યા પરમયા પુનઃ ॥

પૂર્વમારાધિતો વિપ્ર બ્રહ્મણાહં તપોધન
તપસા ચાવતારાર્થં મુનિભિશ્ ચ સુરોત્તમૈઃ ॥

તવ પુત્રો ભવિષ્યામિ નન્દિનામ્ના ત્વયોનિજઃ
પિતા ભવિષ્યસિ મમ પિતુર્વૈ જગતાં મુને ॥

એવમુક્ત્વા મુનિં પ્રેક્ષ્ય પ્રણિપત્ય સ્થિતં ઘૃણી
સોમઃ સોમોપમઃ પ્રીતસ્ તત્રૈવાન્તરધીયત ॥

લબ્ધપુત્રઃ પિતા રુદ્રાત્ પ્રીતો મમ મહામુને
યજ્ઞાઙ્ગણં મહત્પ્રાપ્ય યજ્ઞાર્થં યજ્ઞવિત્તમઃ ॥

તદઙ્ગણાદહં શંભોસ્ તનુજસ્તસ્ય ચાજ્ઞયા
સંજાતઃ પૂર્વમેવાહં યુગાન્તાગ્નિસમપ્રભઃ ॥

વવર્ષુસ્તદા પુષ્કરાવર્તકાદ્યા જગુઃ ખેચરાઃ કિન્નરાઃ સિદ્ધસાધ્યાઃ
શિલાદાત્મજત્વં ગતે મય્યુપેન્દ્રઃ સસર્જાથ વૃષ્ટિં સુપુષ્પૌઘમિશ્રામ્ ॥

માં દૃષ્ટ્વા કાલસૂર્યાભં જટામુકુટધારિણમ્
ત્ર્યક્ષં ચતુર્ભુજં બાલં શૂલટઙ્કગદાધરમ્ ॥

વજ્રિણં વજ્રદંષ્ટ્રં ચ વજ્રિણારાધિતં શિશુમ્
વજ્રકુણ્ડલિનં ઘોરં નીરદોપમનિઃસ્વનમ્ ॥

બ્રહ્માદ્યાસ્તુષ્ટુવુઃ સર્વે સુરેન્દ્રશ્ ચ મુનીશ્વરાઃ
નેદુઃ સમન્તતઃ સર્વે નનૃતુશ્ચાપ્સરોગણાઃ ॥

ઋષયો મુનિશાર્દૂલ ઋગ્યજુઃસામસંભવૈઃ
મન્ત્રૈર્માહેશ્વરૈઃ સ્તુત્વા સમ્પ્રણેમુર્મુદાન્વિતાઃ ॥

બ્રહ્મા હરિશ્ ચ રુદ્રશ્ ચ શક્રઃ સાક્ષાચ્છિવાંબિકા
જીવશ્ચેન્દુર્મહાતેજા ભાસ્કરઃ પવનો ઽનલઃ ॥

ઈશાનો નિરૃતિર્યક્ષો યમો વરુણ એવ ચ
વિશ્વેદેવાસ્ તથા રુદ્રા વસવશ્ ચ મહાબલાઃ ॥

લક્ષ્મીઃ સાક્ષાચ્છચી જ્યેષ્ઠા દેવી ચૈવ સરસ્વતી
અદિતિશ્ ચ દિતિશ્ચૈવ શ્રદ્ધા લજ્જા ધૃતિસ્ તથા ॥

નન્દા ભદ્રા ચ સુરભી સુશીલા સુમનાસ્ તથા
વૃષેન્દ્રશ્ ચ મહાતેજા ધર્મો ધર્માત્મજસ્ તથા ॥

આવૃત્ય માં તથાલિઙ્ગ્ય તુષ્ટુવુર્મુનિસત્તમ
શિલાદો ઽપિ મુનિર્દૃષ્ટ્વા પિતા મે તાદૃશં તદા ॥

પ્રીત્યા પ્રણમ્ય પુણ્યાત્મા તુષ્ટાવેષ્ટપ્રદં સુતમ્
ભગવન્દેવદેવેશ ત્રિયંબક મમાવ્યય ॥

પુત્રો ઽસિ જગતાં યસ્માત્ ત્રાતા દુઃખાદ્ધિ કિં પુનઃ
રક્ષકો જગતાં યસ્માત્ પિતા મે પુત્ર સર્વગ ॥

અયોનિજ નમસ્તુભ્યં જગદ્યોને પિતામહ
પિતા પુત્ર મહેશાન જગતાં ચ જગદ્ગુરો ॥

વત્સ વત્સ મહાભાગ પાહિ માં પરમેશ્વર
ત્વયાહં નન્દિતો યસ્માન્ નન્દી નામ્ના સુરેશ્વર ॥

તસ્માન્નન્દય માં નન્દિન્ નમામિ જગદીશ્વરમ્
પ્રસીદ પિતરૌ મે ઽદ્ય રુદ્રલોકં ગતૌ વિભો ॥

પિતામહશ્ ચ ભો નન્દિન્ નવતીર્ણે મહેશ્વરે
મમૈવ સફલં લોકે જન્મ વૈ જગતાં પ્રભો ॥

અવતીર્ણે સુતે નન્દિન્ રક્ષાર્થં મહ્યમીશ્વર
તુભ્યં નમઃ સુરેશાન નન્દીશ્વર નમો ઽસ્તુ તે ॥

પુત્ર પાહિ મહાબાહો દેવદેવ જગદ્ગુરો
પુત્રત્વમેવ નન્દીશ મત્વા યત્કીર્તિતં મયા ॥

ત્વયા તત્ક્ષમ્યતાં વત્સ સ્તવસ્તવ્ય સુરાસુરૈઃ
યઃ પઠેચ્છૃણુયાદ્વાપિ મમ પુત્રપ્રભાષિતમ્ ॥

શ્રાવયેદ્વા દ્વિજાન્ ભક્ત્યા મયા સાર્ધં સ મોદતે
એવં સ્તુત્વા સુતં બાલં પ્રણમ્ય બહુમાનતઃ ॥

મુનીશ્વરાંશ્ ચ સમ્પ્રેક્ષ્ય શિલાદ ઉવાચ સુવ્રતઃ
પશ્યધ્વં મુનયઃ સર્વે મહાભાગ્યં મમાવ્યયઃ ॥

નન્દી યજ્ઞાઙ્ગણે દેવશ્ ચાવતીર્ણો યતઃ પ્રભુઃ
મત્સમઃ કઃ પુમાંલ્લોકે દેવો વા દાનવો ઽપિ વા ॥

એષ નન્દી યતો જાતો યજ્ઞભૂમૌ હિતાય મે ॥