લિઙ્ગપુરાણ · અધ્યાય 1.38

ગતે મહેશ્વરે દેવે તમુદ્દિશ્ય જનાર્દનઃ
પ્રણમ્ય ભગવાન્પ્રાહ પદ્મયોનિમજોદ્ભવઃ ॥

પરમેશો જગન્નાથઃ શઙ્કરસ્ત્વેષ સર્વગઃ
આવયોરખિલસ્યેશઃ શરણં ચ મહેશ્વરઃ ॥

અહં વામાઙ્ગજો બ્રહ્મન્ શઙ્કરસ્ય મહાત્મનઃ
ભવાન્ ભવસ્ય દેવસ્ય દક્ષિણાઙ્ગભવઃ સ્વયમ્ ॥

મામાહુર્ ઋષયઃ પ્રેક્ષ્ય પ્રધાનં પ્રકૃતિં તથા
અવ્યક્તમજમિત્યેવં ભવન્તં પુરુષસ્ત્વિતિ ॥

એવમાહુર્મહાદેવમ્ આવયોરપિ કારણમ્
ઈશં સર્વસ્ય જગતઃ પ્રભુમવ્યયમીશ્વરમ્ ॥

સો ઽપિ તસ્યામરેશસ્ય વચનાદ્વારિજોદ્ભવઃ
વરેણ્યં વરદં રુદ્રમ્ અસ્તુવત્પ્રણનામ ચ ॥

અથામ્ભસા પ્લુતાં ભૂમીં સમાધાય જનાર્દનઃ
પૂર્વવત્સ્થાપયામાસ વારાહં રૂપમાસ્થિતઃ ॥

નદીનદસમુદ્રાંશ્ ચ પૂર્વવચ્ચાકરોત્પ્રભુઃ
કૃત્વા ચોર્વીં પ્રયત્નેન નિમ્નોન્નતવિવર્જિતામ્ ॥

ધરાયાં સો ઽચિનોત્સર્વાન્ ભૂધરાન્ ભૂધરાકૃતિઃ
ભૂરાદ્યાંશ્ચતુરો લોકાન્ કલ્પયામાસ પૂર્વવત્ ॥

સ્રષ્ટું ચ ભગવાંશ્ચક્રે મતિં મતિમતાં વરઃ
મુખ્યં ચ તૈર્યગ્યોન્યં ચ દૈવિકં માનુષં તથા ॥

વિભુશ્ચાનુગ્રહં તત્ર કૌમારકમ્ અદીનધીઃ
પુરસ્તાદસૃજદ્દેવઃ સનન્દં સનકં તથા ॥

સનાતનં સતાં શ્રેષ્ઠં નૈષ્કર્મ્યેણ ગતાઃ પરમ્
મરીચિભૃગ્વઙ્ગિરસં પુલસ્ત્યં પુલહં ક્રતુમ્ ॥

દક્ષમત્રિં વસિષ્ઠં ચ સો ઽસૃજદ્ યોગવિદ્યયા
સંકલ્પં ચૈવ ધર્મં ચ હ્ય્ અધર્મં ભગવાન્પ્રભુઃ ॥

દ્વાદશૈવ પ્રજાસ્ત્વેતા બ્રહ્મણો ઽવ્યક્તજન્મનઃ
ઋભું સનત્કુમારં ચ સસર્જાદૌ સનાતનઃ ॥

તૌ ચોર્ધ્વરેતસૌ દિવ્યૌ ચાગ્રજૌ બ્રહ્મવાદિનૌ
કુમારૌ બ્રહ્મણસ્તુલ્યૌ સર્વજ્ઞૌ સર્વભાવિનૌ ॥

એવં મુખ્યાદિકાન્ સૃષ્ટ્વા પદ્મયોનિઃ શિલાશન
યુગધર્માનશેષાંશ્ ચ કલ્પયામાસ વિશ્વસૃક્ ॥