લિઙ્ગપુરાણ · અધ્યાય 1.35

કથં જઘાન રાજાનં ક્ષુપં પાદેન સુવ્રત
દધીચઃ સમરે જિત્વા દેવદેવં જનાર્દનમ્ ॥

વજ્રાસ્થિત્વં કથં લેભે મહાદેવાન્મહાતપાઃ
વક્તુમર્હસિ શૈલાદે જિતો મૃત્યુસ્ત્વયા યથા ॥

બ્રહ્મપુત્રો મહાતેજા રાજા ક્ષુપ ઇતિ સ્મૃતઃ
અભૂન્મિત્રો દધીચસ્ય મુનીન્દ્રસ્ય જનેશ્વરઃ ॥

ચિરાત્તયોઃ પ્રસંગાદ્વૈ વાદઃ ક્ષુપદધીચયોઃ
અભવત્ ક્ષત્રિયશ્રેષ્ઠો વિપ્ર એવેતિ વિશ્રુતઃ ॥

અષ્ટાનાં લોકપાલાનાં વપુર્ધારયતે નૃપઃ
તસ્માદિન્દ્રો હ્યયં વહ્નિર્ યમશ્ ચ નિરૃતિસ્ તથા ॥

વરુણશ્ચૈવ વાયુશ્ ચ સોમો ધનદ એવ ચ
ઈશ્વરો ઽહં ન સંદેહો નાવમન્તવ્ય એવ ચ ॥

મહતી દેવતા યા સા મહતશ્ચાપિ સુવ્રત
તસ્માત્ત્વયા મહાભાગ ચ્યાવનેય સદા હ્યહમ્ ॥

નાવમન્તવ્ય એવેહ પૂજનીયશ્ ચ સર્વથા
શ્રુત્વા તથા મતં તસ્ય ક્ષુપસ્ય મુનિસત્તમઃ ॥

દધીચશ્ ચ્યાવનિશ્ ચોગ્રો ગૌરવાદાત્મનો દ્વિજઃ
અતાડયત્ક્ષુપં મૂર્ધ્નિ દધીચો વામમુષ્ટિના
ચિછેદ વજ્રેણ ચ તં દધીચં બલવાન્ ક્ષુપઃ ॥

બ્રહ્મલોકે પુરાસૌ હિ બ્રહ્મણઃ ક્ષુતસંભવઃ
લબ્ધં વજ્રં ચ કાર્યાર્થં વજ્રિણા ચોદિતઃ પ્રભુઃ ॥

સ્વેચ્છયૈવ નરો ભૂત્વા નરપાલો બભૂવ સઃ
તસ્માદ્રાજા સ વિપ્રેન્દ્રમ્ અજયદ્વૈ મહાબલઃ ॥

યથા વજ્રધરઃ શ્રીમાન્ બલવાંસ્તમસાન્વિતઃ
પપાત ભૂમૌ નિહતો વજ્રેણ દ્વિજપુઙ્ગવઃ ॥

સસ્માર ચ તદા તત્ર દુઃખાદ્વૈ ભાર્ગવં મુનિમ્
શુક્રો ઽપિ સંધયામાસ તાડિતં કુલિશેન તમ્ ॥

યોગાદેત્ય દધીચસ્ય દેહં દેહભૃતાંવરઃ
સંધાય પૂર્વવદ્દેહં દધીચસ્યાહ ભાર્ગવઃ ॥

ભો દધીચ મહાભાગ દેવદેવમુમાપતિમ્
સમ્પૂજ્ય પૂજ્યં બ્રહ્માદ્યૈર્ દેવદેવં નિરઞ્જનમ્ ॥

અવધ્યો ભવ વિપ્રર્ષે પ્રસાદાત્ત્ર્યમ્બકસ્ય તુ
મૃતસંજીવનં તસ્માલ્ લબ્ધમેતન્મયા દ્વિજ ॥

નાસ્તિ મૃત્યુભયં શંભોર્ ભક્તાનામિહ સર્વતઃ
મૃતસંજીવનં ચાપિ શૈવમદ્ય વદામિ તે ॥

ત્રિયંબકં યજામહે ત્રૈલોક્યપિતરં પ્રભુમ્
ત્રિમણ્ડલસ્ય પિતરં ત્રિગુણસ્ય મહેશ્વરમ્ ॥

ત્રિતત્ત્વસ્ય ત્રિવહ્નેશ્ ચ ત્રિધાભૂતસ્ય સર્વતઃ
ત્રિવેદસ્ય મહાદેવં સુગન્ધિં પુષ્ટિવર્ધનમ્ ॥

સર્વભૂતેષુ સર્વત્ર ત્રિગુણે પ્રકૃતૌ તથા
ઇન્દ્રિયેષુ તથાન્યેષુ દેવેષુ ચ ગણેષુ ચ ॥

પુષ્પેષુ ગન્ધવત્સૂક્ષ્મઃ સુગન્ધિઃ પરમેશ્વરઃ
પુષ્ટિશ્ ચ પ્રકૃતિર્યસ્માત્ પુરુષસ્ય દ્વિજોત્તમ ॥

મહદાદિવિશેષાન્ત વિકલ્પસ્યાપિ સુવ્રત
વિષ્ણોઃ પિતામહસ્યાપિ મુનીનાં ચ મહામુને ॥

ઇન્દ્રસ્યાપિ ચ દેવાનાં તસ્માદ્વૈ પુષ્ટિવર્ધનઃ
તં દેવમમૃતં રુદ્રં કર્મણા તપસા તથા ॥

સ્વાધ્યાયેન ચ યોગેન ધ્યાનેન ચ યજામહે
સત્યેનાનેન મુક્ષીયાન્ મૃત્યુપાશાદ્ ભવઃ સ્વયમ્ ॥

બન્ધમોક્ષકરો યસ્માદ્ ઉર્વારુકમિવ પ્રભુઃ
મૃતસંજીવનો મન્ત્રો મયા લબ્ધસ્તુ શઙ્કરાત્ ॥

જપ્ત્વા હુત્વાભિમન્ત્ર્યૈવં જલં પીત્વા દિવાનિશમ્
લિઙ્ગસ્ય સંનિધૌ ધ્યાત્વા નાસ્તિ મૃત્યુભયં દ્વિજ ॥

તસ્ય તદ્વચનં શ્રુત્વા તપસારાધ્ય શઙ્કરમ્
વજ્રાસ્થિત્વમ્ અવધ્યત્વમ્ અદીનત્વં ચ લબ્ધવાન્ ॥

એવમારાધ્ય દેવેશં દધીચો મુનિસત્તમઃ
પ્રાપ્યાવધ્યત્વમન્યૈશ્ ચ વજ્રાસ્થિત્વં પ્રયત્નતઃ ॥

અતાડયચ્ચ રાજેન્દ્રં પાદમૂલેન મૂર્ધનિ
ક્ષુપો દધીચં વજ્રેણ જઘાનોરસિ ચ પ્રભુઃ ॥

નાભૂન્નાશાય તદ્વજ્રં દધીચસ્ય મહાત્મનઃ
પ્રભાવાત્પરમેશસ્ય વજ્રબદ્ધશરીરિણઃ ॥

દૃષ્ટ્વાપ્યવધ્યત્વમદીનતાં ચ ક્ષુપો દધીચસ્ય તદા પ્રભાવમ્
આરાધયામાસ હરિં મુકુન્દમ્ ઇન્દ્રાનુજં પ્રેક્ષ્ય તદાંબુજાક્ષમ્ ॥