લિઙ્ગપુરાણ · અધ્યાય 1.34

એતદ્વઃ સમ્પ્રવક્ષ્યામિ કથા સર્વસ્વમદ્ય વૈ
અગ્નિર્હ્યહં સોમકર્તા સોમશ્ચાગ્નિમુપાશ્રિતઃ ॥

કૃતમેતદ્વહત્યગ્નિર્ ભૂયો લોકસમાશ્રયાત્
અસકૃત્ત્વગ્નિના દગ્ધં જગત્ સ્થાવરજઙ્ગમમ્ ॥

ભસ્મસાદ્વિહિતં સર્વં પવિત્રમિદમુત્તમમ્
ભસ્મના વીર્યમાસ્થાય ભૂતાનિ પરિષિઞ્ચતિ ॥

અગ્નિકાર્યં ચ યઃ કૃત્વા કરિષ્યતિ ત્રિયાયુષમ્
ભસ્મના મમ વીર્યેણ મુચ્યતે સર્વકિલ્બિષૈઃ ॥

ભાસત ઇત્યેવ યદ્ભસ્મ શુભં ભાવયતે ચ યત્
ભક્ષણાત્ સર્વપાપાનાં ભસ્મેતિ પરિકીર્તિતમ્ ॥

ઊષ્મપાઃ પિતરો જ્ઞેયા દેવા વૈ સોમસંભવાઃ
અગ્નીષોમાત્મકં સર્વં જગત્સ્થાવરજઙ્ગમમ્ ॥

અહમગ્નિર્મહાતેજાઃ સોમશ્ચૈષા મહાંબિકા
અહમગ્નિશ્ ચ સોમશ્ ચ પ્રકૃત્યા પુરુષઃ સ્વયમ્ ॥

તસ્માદ્ભસ્મ મહાભાગા મદ્વીર્યમિતિ ચોચ્યતે
સ્વવીર્યં વપુષા ચૈવ ધારયામીતિ વૈ સ્થિતિઃ ॥

તદાપ્રભૃતિ લોકેષુ રક્ષાર્થમશુભેષુ ચ
ભસ્મના ક્રિયતે રક્ષા સૂતિકાનાં ગૃહેષુ ચ ॥

ભસ્મસ્નાનવિશુદ્ધાત્મા જિતક્રોધો જિતેન્દ્રિયઃ
મત્સમીપં સમાગમ્ય ન ભૂયો વિનિવર્તતે ॥

વ્રતં પાશુપતં યોગં કાપિલં ચૈવ નિર્મિતમ્
પૂર્વં પાશુપતં હ્યેતન્ નિર્મિતં તદનુત્તમમ્ ॥

શેષાશ્ચાશ્રમિણઃ સર્વે પશ્ચાત્સૃષ્ટાઃ સ્વયંભુવા
સૃષ્ટિરેષા મયા સૃષ્ટા લજ્જામોહભયાત્મિકા ॥

નગ્ના એવ હિ જાયન્તે દેવતા મુનયસ્ તથા
યે ચાન્યે માનવા લોકે સર્વે જાયન્ત્યવાસસઃ ॥

ઇન્દ્રિયૈરજિતૈર્નગ્નો દુકૂલેનાપિ સંવૃતઃ
તૈરેવ સંવૃતૈર્ગુપ્તો ન વસ્ત્રં કારણં સ્મૃતમ્ ॥

ક્ષમા ધૃતિરહિંસા ચ વૈરાગ્યં ચૈવ સર્વશઃ
તુલ્યૌ માનાવમાનૌ ચ તદાવરણમુત્તમમ્ ॥

ભસ્મસ્નાનેન દિગ્ધાઙ્ગો ધ્યાયતે મનસા ભવમ્
યદ્યકાર્યસહસ્રાણિ કૃત્વા યઃ સ્નાતિ ભસ્મના ॥

તત્સર્વં દહતે ભસ્મ યથાગ્નિસ્તેજસા વનમ્
તસ્માદ્ યત્નપરો ભૂત્વા ત્રિકાલમપિ યઃ સદા ॥

ભસ્મના કુરુતે સ્નાનં ગાણપત્યં સ ગચ્છતિ
સમાહૃત્ય ક્રતૂન્ સર્વાન્ ગૃહીત્વા વ્રતમુત્તમમ્ ॥

ધ્યાયન્તિ યે મહાદેવં લીલાસદ્ભાવભાવિતાઃ
ઉત્તરેણાર્યપન્થાનં તે ઽમૃતત્વમવાપ્નુયુઃ ॥

દક્ષિણેન ચ પન્થાનં યે શ્મશાનાનિ ભેજિરે
અણિમા ગરિમા ચૈવ લઘિમા પ્રાપ્તિરેવ ચ ॥

ઇચ્છા કામાવસાયિત્વં તથા પ્રાકામ્યમેવ ચ
ઈક્ષણેન ચ પન્થાનં યે શ્મશાનાનિ ભેજિરે
અણિમા ગરિમા ચૈવ લઘિમા પ્રાપ્તિરેવ ચ ॥

ઇન્દ્રાદયસ્ તથા દેવાઃ કામિકવ્રતમાસ્થિતાઃ
ઐશ્વર્યં પરમં પ્રાપ્ય સર્વે પ્રથિતતેજસઃ ॥

વ્યપગતમદમોહમુક્તરાગસ્ તમોરજોદોષવિવર્જિતસ્વભાવઃ
પરિભવમિદમુત્તમં વિદિત્વા પશુપતિયોગપરો ભવેત્સદૈવ ॥

ઇમં પાશુપતં ધ્યાયન્ સર્વપાપપ્રણાશનમ્
યઃ પઠેચ્ચ શુચિર્ભૂત્વા શ્રદ્દધાનો જિતેન્દ્રિયઃ ॥

સર્વપાપવિશુદ્ધાત્મા રુદ્રલોકં સ ગચ્છતિ
તે સર્વે મુનયઃ શ્રુત્વા વસિષ્ઠાદ્યા દ્વિજોત્તમાઃ ॥

ભસ્મપાણ્ડુરદિગ્ધાઙ્ગા બભૂવુર્વિગતસ્પૃહાઃ
રુદ્રલોકાય કલ્પાન્તે સંસ્થિતાઃ શિવતેજસા ॥

તસ્માન્ન નિન્દ્યાઃ પૂજ્યાશ્ચ વિકૃતા મલિના અપિ
રૂપાન્વિતાશ્ ચ વિપ્રેન્દ્રાઃ સદા યોગીન્દ્રશઙ્કયા ॥

બહુના કિં પ્રલાપેન ભવભક્તા દ્વિજોત્તમાઃ
સંપૂજ્યાઃ સર્વયત્નેન શિવવન્નાત્ર સંશયઃ ॥

મલિનાશ્ચૈવ વિપ્રેન્દ્રા ભવભક્તા દૃઢવ્રતાઃ
દધીચસ્તુ યથા દેવ દેવં જિત્વા વ્યવસ્થિતઃ ॥

નારાયણં તથા લોકે રુદ્રભક્ત્યા ન સંશયઃ
તસ્માત્સર્વપ્રયત્નેન ભસ્મદિગ્ધતનૂરુહાઃ ॥

જટિનો મુણ્ડિનશ્ચૈવ નગ્ના નાનાપ્રકારિણઃ
સંપૂજ્યાઃ શિવવન્નિત્યં મનસા કર્મણા ગિરા ॥