લિઙ્ગપુરાણ · અધ્યાય 1.33

તતસ્તુતોષ ભગવાન્ અનુગૃહ્ય મહેશ્વરઃ
સ્તુતિં શ્રુત્વા સ્તુતસ્તેષામ્ ઇદં વચનમબ્રવીત્ ॥

યઃ પઠેચ્છૃણુયાદ્વાપિ યુષ્માભિઃ કીર્તિતં સ્તવમ્
શ્રાવયેદ્વા દ્વિજાન્વિપ્રો ગાણપત્યમવાપ્નુયાત્ ॥

વક્ષ્યામિ વો હિતં પુણ્યં ભક્તાનાં મુનિપુઙ્ગવાઃ
સ્ત્રીલિઙ્ગમખિલં દેવી પ્રકૃતિર્મમ દેહજા ॥

પુંલ્લિઙ્ગં પુરુષો વિપ્રા મમ દેહસમુદ્ભવઃ
ઉભાભ્યામેવ વૈ સૃષ્ટિર્ મમ વિપ્રા ન સંશયઃ ॥

ન નિન્દેદ્યતિનં તસ્માદ્ દિગ્વાસસમનુત્તમમ્
બાલોન્મત્તવિચેષ્ટં તુ મત્પરં બ્રહ્મવાદિનમ્ ॥

યે હિ માં ભસ્મનિરતા ભસ્મના દગ્ધકિલ્બિષાઃ
યથોક્તકારિણો દાન્તા વિપ્રા ધ્યાનપરાયણાઃ ॥

મહાદેવપરા નિત્યં ચરન્તો હ્યૂર્ધ્વરેતસઃ
અર્ચયન્તિ મહાદેવં વાઙ્મનઃકાયસંયતાઃ ॥

રુદ્રલોકમનુપ્રાપ્ય ન નિવર્તન્તિ તે પુનઃ
તસ્માદેતદ્વ્રતં દિવ્યમ્ અવ્યક્તં વ્યક્તલિઙ્ગિનઃ ॥

ભસ્મવ્રતાશ્ ચ મુણ્ડાશ્ ચ વ્રતિનો વિશ્વરૂપિણઃ
ન તાન્પરિવદેદ્વિદ્વાન્ ન ચૈતાન્નાભિલઙ્ઘયેત્ ॥

ન હસેન્નાપ્રિયં બ્રૂયાદ્ અમુત્રેહ હિતાર્થવાન્
યસ્તાન્નિન્દતિ મૂઢાત્મા મહાદેવં સ નિન્દતિ ॥

યસ્ ત્વેતાન્ પૂજયેન્ નિત્યં સ પૂજયતિ શઙ્કરમ્
એવમેષ મહાદેવો લોકાનાં હિતકામ્યયા ॥

યુગે યુગે મહાયોગી ક્રીડતે ભસ્મગુણ્ઠિતઃ
એવં ચરત ભદ્રં વસ્ તતઃ સિદ્ધિમવાપ્સ્યથ ॥

અતુલમિહ મહાભયપ્રણાશહેતું શિવકથિતં પરમં પદં વિદિત્વા
વ્યપગતભવલોભમોહચિત્તાઃ પ્રણિપતિતાઃ સહસા શિરોભિર્ ઉગ્રમ્ ॥

તતઃ પ્રમુદિતા વિપ્રાઃ શ્રુત્વૈવં કથિતં તદા
ગન્ધોદકૈઃ સુશુદ્ધૈશ્ ચ કુશપુષ્પવિમિશ્રિતૈઃ ॥

સ્નાપયન્તિ મહાકુમ્ભૈર્ અદ્ભિર્ એવ મહેશ્વરમ્
ગાયન્તિ વિવિધૈર્ગુહ્યૈર્ હુંકારૈશ્ચાપિ સુસ્વરૈઃ ॥

નમો દેવાધિદેવાય મહાદેવાય વૈ નમઃ
અર્ધનારીશરીરાય સાંખ્યયોગપ્રવર્તિને ॥

મેઘવાહનકૃષ્ણાય ગજચર્મનિવાસિને
કૃષ્ણાજિનોત્તરીયાય વ્યાલયજ્ઞોપવીતિને ॥

સુરચિતસુવિચિત્રકુણ્ડલાય સુરચિતમાલ્યવિભૂષણાય તુભ્યમ્
મૃગપતિવરચર્મવાસસે ચ પ્રથિતયશસે નમો ઽસ્તુ શઙ્કરાય ॥

તતસ્ તાન્ સ મુનીન્ પ્રીતઃ પ્રત્યુવાચ મહેશ્વરઃ
પ્રીતો ઽસ્મિ તપસા યુષ્માન્ વરં વૃણુત સુવ્રતાઃ ॥

તતસ્તે મુનયઃ સર્વે પ્રણિપત્ય મહેશ્વરમ્
ભૃગ્વઙ્ગિરા વસિષ્ઠશ્ ચ વિશ્વામિત્રસ્તથૈવ ચ ॥

ગૌતમો ઽત્રિઃ સુકેશશ્ ચ પુલસ્ત્યઃ પુલહઃ ક્રતુઃ
મરીચિઃ કશ્યપઃ કણ્વઃ સંવર્તશ્ ચ મહાતપાઃ ॥

તે પ્રણમ્ય મહાદેવમ્ ઇદં વચનમબ્રુવન્
ભસ્મસ્નાનં ચ નગ્નત્વં વામત્વં પ્રતિલોમતા ॥

સેવ્યાસેવ્યત્વમેવં ચ હ્ય્ એતદિચ્છામ વેદિતુમ્
તતસ્તેષાં વચઃ શ્રુત્વા ભગવાન્પરમેશ્વરઃ ॥

સસ્મિતં પ્રાહ સમ્પ્રેક્ષ્ય સર્વાન્મુનિવરાંસ્તદા ॥