ગ્રંથ પાઠ

લિઙ્ગપુરાણ · અધ્યાય 1.32

1.32.1

નમો દિગ્વાસસે નિત્યં કૃતાન્તાય ત્રિશૂલિને
વિકટાય કરાલાય કરાલવદનાય ચ ॥

1.32.2

અરૂપાય સુરૂપાય વિશ્વરૂપાય તે નમઃ
કટઙ્કટાય રુદ્રાય સ્વાહાકારાય વૈ નમઃ ॥

1.32.3

સર્વપ્રણતદેહાય સ્વયં ચ પ્રણતાત્મને
નિત્યં નીલશિખણ્ડાય શ્રીકણ્ઠાય નમોનમઃ ॥

1.32.4

નીલકણ્ઠાય દેવાય ચિતાભસ્માઙ્ગધારિણે
ત્વં બ્રહ્મા સર્વદેવાનાં રુદ્રાણાં નીલલોહિતઃ ॥

1.32.5

આત્મા ચ સર્વભૂતાનાં સાંખ્યૈઃ પુરુષ ઉચ્યતે
પર્વતાનાં મહામેરુર્ નક્ષત્રાણાં ચ ચન્દ્રમાઃ ॥

1.32.6

ઋષીણાં ચ વસિષ્ઠસ્ ત્વં દેવાનાં વાસવસ્ તથા
ઓઙ્કારઃ સર્વવેદાનાં શ્રેષ્ઠં સામ ચ સામસુ ॥

1.32.7

આરણ્યાનાં પશૂનાં ચ સિંહસ્ત્વં પરમેશ્વરઃ
ગ્રામ્યાણામૃષભશ્ચાસિ ભગવાંલ્લોકપૂજિતઃ ॥

1.32.8

સર્વથા વર્તમાનો ઽપિ યો યો ભાવો ભવિષ્યતિ
ત્વામેવ તત્ર પશ્યામો બ્રહ્મણા કથિતં તથા ॥

1.32.9

કામઃ ક્રોધશ્ ચ લોભશ્ ચ વિષાદો મદ એવ ચ
એતદ્ ઇચ્છામહે બોદ્ધું પ્રસીદ પરમેશ્વર ॥

1.32.10

મહાસંહરણે પ્રાપ્તે ત્વયા દેવ કૃતાત્મના
કરં લલાટે સંવિધ્ય વહ્નિરુત્પાદિતસ્ત્વયા ॥

1.32.11

તેનાગ્નિના તદા લોકા અર્ચિર્ભિઃ સર્વતો વૃતાઃ
તસ્માદગ્નિસમા હ્યેતે બહવો વિકૃતાગ્નયઃ ॥

1.32.12

કામઃ ક્રોધશ્ ચ લોભશ્ ચ મોહો દમ્ભ ઉપદ્રવઃ
યાનિ ચાન્યાનિ ભૂતાનિ સ્થાવરાણિ ચરાણિ ચ ॥

1.32.13

દહ્યન્તે પ્રાણિનસ્તે તુ ત્વત્સમુત્થેન વહ્નિના
અસ્માકં દહ્યમાનાનાં ત્રાતા ભવ સુરેશ્વર ॥

1.32.14

ત્વં ચ લોકહિતાર્થાય ભૂતાનિ પરિષિઞ્ચસિ
મહેશ્વર મહાભાગ પ્રભો શુભનિરીક્ષક ॥

1.32.15

આજ્ઞાપય વયં નાથ કર્તારો વચનં તવ
ભૂતકોટિસહસ્રેષુ રૂપકોટિશતેષુ ચ ॥

1.32.16

અન્તં ગન્તું ન શક્તાઃ સ્મ દેવદેવ નમો ઽસ્તુ તે ॥

મૂળ પાઠ: Liṅgapurāṇa, 1-108 · Edition: Bombay : Venkatesvara Steam Press 1906 · Data entry members of the Sansknet Project · GRETIL (Göttingen) · CC BY-NC-SA 4.0