લિઙ્ગપુરાણ · અધ્યાય 1.25

કથં પૂજ્યો મહાદેવો લિઙ્ગમૂર્તિર્મહેશ્વરઃ
વક્તુમર્હસિ ચાસ્માકં રોમહર્ષણ સાંપ્રતમ્ ॥

દેવ્યા પૃષ્ટો મહાદેવઃ કૈલાસે તાં નગાત્મજામ્
અઙ્કસ્થામાહ દેવેશો લિઙ્ગાર્ચનવિધિં ક્રમાત્ ॥

તદા પાર્શ્વે સ્થિતો નન્દી શાલઙ્કાયનકાત્મજઃ
શ્રુત્વાખિલં પુરા પ્રાહ બ્રહ્મપુત્રાય સુવ્રતાઃ ॥

સનત્કુમારાય શુભં લિઙ્ગાર્ચનવિધિં પરમ્
તસ્માદ્વ્યાસો મહાતેજાઃ શ્રુતવાઞ્છ્રુતિસંમિતમ્ ॥

સ્નાનયોગોપચારં ચ યથા શૈલાદિનો મુખાત્
શ્રુતવાન્ તત્પ્રવક્ષ્યામિ સ્નાનાદ્યં ચાર્ચનાવિધિમ્ ॥

અથ સ્નાનવિધિં વક્ષ્યે બ્રાહ્મણાનાં હિતાય ચ
સર્વપાપહરં સાક્ષાચ્ છિવેન કથિતં પુરા ॥

અનેન વિધિના સ્નાત્વા સકૃત્પૂજ્ય ચ શઙ્કરમ્
બ્રહ્મકૂર્ચં ચ પીત્વા તુ સર્વપાપૈઃ પ્રમુચ્યતે ॥

ત્રિવિધં સ્નાનમાખ્યાતં દેવદેવેન શંભુના
હિતાય બ્રાહ્મણાદ્યાનાં ચતુર્મુખસુતોત્તમ ॥

વારુણં પુરતઃ કૃત્વા તતશ્ચાગ્નેયમુત્તમમ્
મન્ત્રસ્નાનં તતઃ કૃત્વા પૂજયેત્પરમેશ્વરમ્ ॥

ભાવદુષ્ટો ઽમ્ભસિ સ્નાત્વા ભસ્મના ચ ન શુધ્યતિ
ભાવશુદ્ધશ્ચરેચ્છૌચમ્ અન્યથા ન સમાચરેત્ ॥

સરિત્સરસ્તડાગેષુ સર્વેષ્વ્ આ પ્રલયં નરઃ
સ્નાત્વાપિ ભાવદુષ્ટશ્ચેન્ ન શુધ્યતિ ન સંશયઃ ॥

નૃણાં હિ ચિત્તકમલં પ્રબુદ્ધમભવદ્યદા
પ્રસુપ્તં તમસા જ્ઞાન ભાનોર્ભાસા તદા શુચિઃ ॥

મૃચ્છકૃત્તિલપુષ્પં ચ સ્નાનાર્થં ભસિતં તથા
આદાય તીરે નિઃક્ષિપ્ય સ્નાનતીર્થે કુશાનિ ચ ॥

પ્રક્ષાલ્યાચમ્ય પાદૌ ચ મલં દેહાદ્વિશોધ્ય ચ
દ્રવ્યૈસ્તુ તીરદેશસ્થૈસ્ તતઃ સ્નાનં સમાચરેત્ ॥

ઉદ્ધૃતાસીતિમન્ત્રેણ પુનર્દેહં વિશોધયેત્
મૃદાદાય તતશ્ચાન્યદ્ વસ્ત્રં સ્નાત્વા હ્યનુલ્બણમ્ ॥

ગન્ધદ્વારાં દુરાધર્ષામ્ ઇતિ મન્ત્રેણ મન્ત્રવિત્
કપિલાગોમયેનૈવ ખસ્થેનૈવ તુ લેપયેત્ ॥

પુનઃ સ્નાત્વા પરિત્યજ્ય તદ્વસ્ત્રં મલિનં તતઃ
શુક્લવસ્ત્રપરીધાનો ભૂત્વા સ્નાનં સમાચરેત્ ॥

સર્વપાપવિશુદ્ધ્યર્થમ્ આવાહ્ય વરુણં તથા
સમ્પૂજ્ય મનસા દેવં ધ્યાનયજ્ઞેન વૈ ભવમ્ ॥

આચમ્ય ત્રિસ્તદા તીર્થે હ્ય્ અવગાહ્ય ભવં સ્મરન્
પુનરાચમ્ય વિધિવદ્ અભિમન્ત્ર્ય મહાજલમ્ ॥

અવગાહ્ય પુનસ્તસ્મિન્ જપેદ્વૈ ચાઘમર્ષણમ્
તત્તોયે ભાનુસોમાગ્નિ મણ્ડલં ચ સ્મરેદ્વશી ॥

આચમ્ય ચ પુનસ્તસ્માજ્ જલાદુત્તીર્ય મન્ત્રવિત્
પ્રવિશ્ય તીર્થમધ્યે તુ પુનઃ પુણ્યવિવૃદ્ધયે ॥

શૃઙ્ગેણ પર્ણપુટકૈઃ પાલાશૈઃ ક્ષાલિતૈસ્ તથા
સકુશેન સપુષ્પેણ જલેનૈવાભિષેચયેત્ ॥

રુદ્રેણ પવમાનેન ત્વરિતાખ્યેન મન્ત્રવિત્
તરત્સમન્દીવર્ગાદ્યૈસ્ તથા શાન્તિદ્વયેન ચ ॥

શાન્તિધર્મેણ ચૈકેન પઞ્ચબ્રહ્મપવિત્રકૈઃ
તત્તન્મન્ત્રાધિદેવાનાં સ્વરૂપં ચ ઋષીન્ સ્મરન્ ॥

એવં હિ ચાભિષિચ્યાથ સ્વમૂર્ધ્નિ પયસા દ્વિજાઃ
ધ્યાયેચ્ચ ત્ર્યમ્બકં દેવં હૃદિ પઞ્ચાસ્યમ્ ઈશ્વરમ્ ॥

આચમ્યાચમનં કુર્યાત્ સ્વસૂત્રોક્તં સમીક્ષ્ય ચ
પવિત્રહસ્તઃ સ્વાસીનઃ શુચૌ દેશે યથાવિધિ ॥

અભ્યુક્ષ્ય સકુશં ચાપિ દક્ષિણેન કરેણ તુ
પિબેત્પ્રક્ષિપ્ય ત્રિસ્તોયં ચક્રી ભૂત્વા હ્યતન્દ્રિતઃ ॥

પ્રદક્ષિણં તતઃ કુર્યાદ્ ધિંસાપાપપ્રશાન્તયે
એવં સંક્ષેપતઃ પ્રોક્તં સ્નાનાચમનમુત્તમમ્ ॥

સર્વેષાં બ્રાહ્મણાનાં તુ હિતાર્થે દ્વિજસત્તમાઃ ॥