લિઙ્ગપુરાણ · અધ્યાય 1.22

અત્યન્તાવનતૌ દૃષ્ટ્વા મધુપિઙ્ગાયતેક્ષણઃ
પ્રહૃષ્ટવદનો ઽત્યર્થમ્ અભવત્સત્યકીર્તનાત્ ॥

ઉમાપતિર્વિરૂપાક્ષો દક્ષયજ્ઞવિનાશનઃ
પિનાકી ખણ્ડપરશુઃ સુપ્રીતસ્તુ ત્રિલોચનઃ ॥

તતઃ સ ભગવાન્દેવઃ શ્રુત્વા વાગમૃતં તયોઃ
જાનન્નપિ મહાદેવઃ ક્રીડાપૂર્વમથાબ્રવીત્ ॥

કૌ ભવન્તૌ મહાત્માનૌ પરસ્પરહિતૈષિણૌ
સમેતાવંબુજાભક્ષાવ્ અસ્મિન્ ઘોરે મહાપ્લવે ॥

તાવૂચતુર્મહાત્માનૌ સંનિરીક્ષ્ય પરસ્પરમ્
ભગવાન્ કિં તુ યત્તે ઽદ્ય ન વિજ્ઞાનં ત્વયા વિભો ॥

વિભો રુદ્ર મહામાય ઇચ્છયા વાં કૃતૌ ત્વયા
તયોસ્તદ્વચનં શ્રુત્વા અભિનન્દ્યાભિમાન્ય ચ ॥

ઉવાચ ભગવાન્દેવો મધુરં શ્લક્ષ્ણયા ગિરા
ભો ભો હિરણ્યગર્ભ ત્વાં ત્વાં ચ કૃષ્ણ બ્રવીમ્યહમ્ ॥

પ્રીતો ઽહમનયા ભક્ત્યા શાશ્વતાક્ષરયુક્તયા
ભવન્તૌ હૃદયસ્યાસ્ય મમ હૃદ્યતરાવુભૌ ॥

યુવાભ્યાં કિં દદામ્યદ્ય વરાણાં વરમીપ્સિતમ્
અથોવાચ મહાભાગો વિષ્ણુર્ભવમિદં વચઃ ॥

સર્વં મમ કૃતં દેવ પરિતુષ્ટો ઽસિ મે યદિ
ત્વયિ મે સુપ્રતિષ્ઠા તુ ભક્તિર્ભવતુ શઙ્કરઃ ॥

એવમુક્તસ્તુ વિજ્ઞાય સંભાવયત કેશવમ્
પ્રદદૌ ચ મહાદેવો ભક્તિં નિજપદાંબુજે ॥

ભવાન્સર્વસ્ય લોકસ્ય કર્તા ત્વમધિદૈવતમ્
તદેવં સ્વસ્તિ તે વત્સ ગમિષ્યામ્યંબુજેક્ષણ ॥

એવમુક્ત્વા તુ ભગવાન્ બ્રહ્માણં ચાપિ શઙ્કરઃ
અનુગૃહ્યાસ્પૃશદ્દેવો બ્રહ્માણં પરમેશ્વરઃ ॥

કરાભ્યાં સુશુભાભ્યાં ચ પ્રાહ હૃષ્ટતરઃ સ્વયમ્
મત્સમસ્ત્વં ન સંદેહો વત્સ ભક્તશ્ ચ મે ભવાન્ ॥

સ્વસ્ત્યસ્તુ તે ગમિષ્યામિ સંજ્ઞા ભવતુ સુવ્રત
એવમુક્ત્વા તુ ભગવાંસ્ તતો ઽન્તર્ધાનમીશ્વરઃ ॥

ગતવાન્ ગણપો દેવઃ સર્વદેવનમસ્કૃતઃ
અવાપ્ય સંજ્ઞાં ગોવિન્દાત્ પદ્મયોનિઃ પિતામહઃ ॥

પ્રજાઃ સ્રષ્ટુમનાશ્ચક્રે તપ ઉગ્રં પિતામહઃ
તસ્યૈવં તપ્યમાનસ્ય ન કિંચિત્ સમવર્તત ॥

તતો દીર્ઘેણ કાલેન દુઃખાત્ક્રોધો હ્યજાયત
ક્રોધાવિષ્ટસ્ય નેત્રાભ્યાં પ્રાપતન્નશ્રુબિન્દવઃ ॥

તતસ્તેભ્યો ઽશ્રુબિન્દુભ્યો વાતપિત્તકફાત્મકાઃ
મહાભાગા મહાસત્ત્વાઃ સ્વસ્તિકૈરપ્યલંકૃતાઃ ॥

પ્રકીર્ણકેશાઃ સર્પાસ્તે પ્રાદુર્ભૂતા મહાવિષાઃ
સર્પાંસ્તાનગ્રજાન્દૃષ્ટ્વા બ્રહ્માત્માનમ્ અનિન્દયત્ ॥

અહો ધિક્ તપસો મહ્યં ફલમીદૃશકં યદિ
લોકવૈનાશિકી જજ્ઞે આદાવેવ પ્રજા મમ ॥

તસ્ય તીવ્રાભવન્મૂર્ચ્છા ક્રોધામર્ષસમુદ્ભવા
મૂર્ચ્છાભિપરિતાપેન જહૌ પ્રાણાન્પ્રજાપતિઃ ॥

તસ્યાપ્રતિમવીર્યસ્ય દેહાત્કારુણ્યપૂર્વકમ્
અથૈકાદશ તે રુદ્રા રુદન્તો ઽભ્યક્રમંસ્ તથા ॥

રોદનાત્ખલુ રુદ્રત્વં તેષુ વૈ સમજાયત
યે રુદ્રાસ્તે ખલુ પ્રાણા યે પ્રાણાસ્તે તદાત્મકાઃ ॥

પ્રાણાઃ પ્રાણવતાં જ્ઞેયાઃ સર્વભૂતેષ્વવસ્થિતાઃ
અત્યુગ્રસ્ય મહત્ત્વસ્ય સાધુરાચરિતસ્ય ચ ॥

પ્રાણાંસ્તસ્ય દદૌ ભૂયસ્ ત્રિશૂલી નીલલોહિતઃ
લબ્ધ્વાસૂન્ ભગવાન્બ્રહ્મ દેવદેવમુમાપતિમ્ ॥

પ્રણમ્ય સંસ્થિતો ઽપશ્યદ્ ગાયત્ર્યા વિશ્વમીશ્વરમ્
સર્વલોકમયં દેવં દૃષ્ટ્વા સ્તુત્વા પિતામહઃ ॥

તતો વિસ્મયમાપન્નઃ પ્રણિપત્ય મુહુર્મુહુઃ
ઉવાચ વચનં શર્વં સદ્યાદિત્વં કથં વિભો ॥