લિઙ્ગપુરાણ · અધ્યાય 1.21

બ્રહ્માણમગ્રતઃ કૃત્વા તતઃ સ ગરુડધ્વજઃ
અતીતૈશ્ ચ ભવિષ્યૈશ્ ચ વર્તમાનૈસ્તથૈવ ચ ॥

નામભિશ્છાન્દસૈશ્ચૈવ ઇદં સ્તોત્રમુદીરયત્
નમસ્તુભ્યં ભગવતે સુવ્રતાનન્તતેજસે ॥

નમઃ ક્ષેત્રાધિપતયે બીજિને શૂલિને નમઃ
સુમેઢ્રાયાર્ચ્યમેઢ્રાય દણ્ડિને રૂક્ષરેતસે ॥

નમો જ્યેષ્ઠાય શ્રેષ્ઠાય પૂર્વાય પ્રથમાય ચ
નમો માન્યાય પૂજ્યાય સદ્યોજાતાય વૈ નમઃ ॥

ગહ્વરાય ઘટેશાય વ્યોમચીરાંબરાય ચ
નમસ્તે હ્યસ્મદાદીનાં ભૂતાનાં પ્રભવે નમઃ ॥

વેદાનાં પ્રભવે ચૈવ સ્મૃતીનાં પ્રભવે નમઃ
પ્રભવે કર્મદાનાનાં દ્રવ્યાણાં પ્રભવે નમઃ ॥

નમો યોગસ્ય પ્રભવે સાંખ્યસ્ય પ્રભવે નમઃ
નમો ધ્રુવનિબદ્ધાનામ્ ઋષીણાં પ્રભવે નમઃ ॥

ઋક્ષાણાં પ્રભવે તુભ્યં ગ્રહાણાં પ્રભવે નમઃ
વૈદ્યુતાશનિમેઘાનાં ગર્જિતપ્રભવે નમઃ ॥

મહોદધીનાં પ્રભવે દ્વીપાનાં પ્રભવે નમઃ
અદ્રીણાં પ્રભવે ચૈવ વર્ષાણાં પ્રભવે નમઃ ॥

નમો નદીનાં પ્રભવે નદાનાં પ્રભવે નમઃ
મહૌષધીનાં પ્રભવે વૃક્ષાણાં પ્રભવે નમઃ ॥

ધર્મવૃક્ષાય ધર્માય સ્થિતીનાં પ્રભવે નમઃ
પ્રભવે ચ પરાર્ધસ્ય પરસ્ય પ્રભવે નમઃ ॥

નમો રસાનાં પ્રભવે રત્નાનાં પ્રભવે નમઃ
ક્ષણાનાં પ્રભવે ચૈવ લવાનાં પ્રભવે નમઃ ॥

અહોરાત્રાર્ધમાસાનાં માસાનાં પ્રભવે નમઃ
ઋતૂનાં પ્રભવે તુભ્યં સંખ્યાયાઃ પ્રભવે નમઃ ॥

પ્રભવે ચાપરાર્ધસ્ય પરાર્ધપ્રભવે નમઃ
નમઃ પુરાણપ્રભવે સર્ગાણાં પ્રભવે નમઃ ॥

મન્વન્તરાણાં પ્રભવે યોગસ્ય પ્રભવે નમઃ
ચતુર્વિધસ્ય સર્ગસ્ય પ્રભવે ઽનન્તચક્ષુષે ॥

કલ્પોદયનિબન્ધાનાં વાતાનાં પ્રભવે નમઃ
નમો વિશ્વસ્ય પ્રભવે બ્રહ્માધિપતયે નમઃ ॥

વિદ્યાનાં પ્રભવે ચૈવ વિદ્યાધિપતયે નમઃ
નમો વ્રતાધિપતયે વ્રતાનાં પ્રભવે નમઃ ॥

મન્ત્રાણાં પ્રભવે તુભ્યં મન્ત્રાધિપતયે નમઃ
પિતૄણાં પતયે ચૈવ પશૂનાં પતયે નમઃ ॥

વાગ્વૃષાય નમસ્તુભ્યં પુરાણવૃષભાય ચ
નમઃ પશૂનાં પતયે ગોવૃષેન્દ્રધ્વજાય ચ ॥

પ્રજાપતીનાં પતયે સિદ્ધીનાં પતયે નમઃ
દૈત્યદાનવસંઘાનાં રક્ષસાં પતયે નમઃ ॥

ગન્ધર્વાણાં ચ પતયે યક્ષાણાં પતયે નમઃ
ગરુડોરગસર્પાણાં પક્ષિણાં પતયે નમઃ ॥

સર્વગુહ્યપિશાચાનાં ગુહ્યાધિપતયે નમઃ
ગોકર્ણાય ચ ગોપ્ત્રે ચ શઙ્કુકર્ણાય વૈ નમઃ ॥

વરાહાયાપ્રમેયાય ઋક્ષાય વિરજાય ચ
નમઃ સુરાણાં પતયે ગણાનાં પતયે નમઃ ॥

અંભસાં પતયે ચૈવ ઓજસાં પતયે નમઃ
નમો ઽસ્તુ લક્ષ્મીપતયે શ્રીપાય ક્ષિતિપાય ચ ॥

બલાબલસમૂહાય અક્ષોભ્યક્ષોભણાય ચ
દીપ્તશૃઙ્ગૈકશૃઙ્ગાય વૃષભાય કકુદ્મિને ॥

નમઃ સ્થૈર્યાય વપુષે તેજસાનુવ્રતાય ચ
અતીતાય ભવિષ્યાય વર્તમાનાય વૈ નમઃ ॥

સુવર્ચસે ચ વીર્યાય શૂરાય હ્યજિતાય ચ
વરદાય વરેણ્યાય પુરુષાય મહાત્મને ॥

નમો ભૂતાય ભવ્યાય મહતે પ્રભવાય ચ
જનાય ચ નમસ્તુભ્યં તપસે વરદાય ચ ॥

અણવે મહતે ચૈવ નમઃ સર્વગતાય ચ
નમો બન્ધાય મોક્ષાય સ્વર્ગાય નરકાય ચ ॥

નમો ભવાય દેવાય ઇજ્યાય યાજકાય ચ
પ્રત્યુદીર્ણાય દીપ્તાય તત્ત્વાયાતિગુણાય ચ ॥

નમઃ પાશાય શસ્ત્રાય નમસ્ત્વાભરણાય ચ
હુતાય ઉપહૂતાય પ્રહુતપ્રાશિતાય ચ ॥

નમો ઽસ્ત્વિષ્ટાય પૂર્તાય અગ્નિષ્ટોમદ્વિજાય ચ
સદસ્યાય નમશ્ચૈવ દક્ષિણાવભૃથાય ચ ॥

અહિંસાયાપ્રલોભાય પશુમન્ત્રૌષધાય ચ
નમઃ પુષ્ટિપ્રદાનાય સુશીલાય સુશીલિને ॥

અતીતાય ભવિષ્યાય વર્તમાનાય તે નમઃ
સુવર્ચસે ચ વીર્યાય શૂરાય હ્યજિતાય ચ ॥

વરદાય વરેણ્યાય પુરુષાય મહાત્મને
નમો ભૂતાય ભવ્યાય મહતે ચાભયાય ચ ॥

જરાસિદ્ધ નમસ્તુભ્યમ્ અયસે વરદાય ચ
અધરે મહતે ચૈવ નમઃ સસ્તુપતાય ચ ॥

નમશ્ચેન્દ્રિયપત્રાણાં લેલિહાનાય સ્રગ્વિણે
વિશ્વાય વિશ્વરૂપાય વિશ્વતઃ શિરસે નમઃ ॥

સર્વતઃ પાણિપાદાય રુદ્રાયાપ્રતિમાય ચ
નમો હવ્યાય કવ્યાય હવ્યવાહાય વૈ નમઃ ॥

નમઃ સિદ્ધાય મેધ્યાય ઇષ્ટાયેજ્યાપરાય ચ
સુવીરાય સુઘોરાય અક્ષોભ્યક્ષોભણાય ચ ॥

સુપ્રજાય સુમેધાય દીપ્તાય ભાસ્કરાય ચ
નમો બુદ્ધાય શુદ્ધાય વિસ્તૃતાય મતાય ચ ॥

નમઃ સ્થૂલાય સૂક્ષ્માય દૃશ્યાદૃશ્યાય સર્વશઃ
વર્ષતે જ્વલતે ચૈવ વાયવે શિશિરાય ચ ॥

નમસ્તે વક્રકેશાય ઊરુવક્ષઃશિખાય ચ
નમો નમઃ સુવર્ણાય તપનીયનિભાય ચ ॥

વિરૂપાક્ષાય લિઙ્ગાય પિઙ્ગલાય મહૌજસે
વૃષ્ટિઘ્નાય નમશ્ચૈવ નમઃ સૌમ્યેક્ષણાય ચ ॥

નમો ધૂમ્રાય શ્વેતાય કૃષ્ણાય લોહિતાય ચ
પિશિતાય પિશઙ્ગાય પીતાય ચ નિષઙ્ગિણે ॥

નમસ્તે સવિશેષાય નિર્વિશેષાય વૈ નમઃ
નમ ઈજ્યાય પૂજ્યાય ઉપજીવ્યાય વૈ નમઃ ॥

નમઃ ક્ષેમ્યાય વૃદ્ધાય વત્સલાય નમોનમઃ
નમો ભૂતાય સત્યાય સત્યાસત્યાય વૈ નમઃ ॥

નમો વૈ પદ્મવર્ણાય મૃત્યુઘ્નાય ચ મૃત્યવે
નમો ગૌરાય શ્યામાય કદ્રવે લોહિતાય ચ ॥

મહાસંધ્યાભ્રવર્ણાય ચારુદીપ્તાય દીક્ષિણે
નમઃ કમલહસ્તાય દિગ્વાસાય કપર્દિને ॥

અપ્રમાણાય સર્વાય અવ્યયાયામરાય ચ
નમો રૂપાય ગન્ધાય શાશ્વતાયાક્ષતાય ચ ॥

પુરસ્તાદ્બૃંહતે ચૈવ વિભ્રાન્તાય કૃતાય ચ
દુર્ગમાય મહેશાય ક્રોધાય કપિલાય ચ ॥

તર્ક્યાતર્ક્યશરીરાય બલિને રંહસાય ચ
સિકત્યાય પ્રવાહ્યાય સ્થિતાય પ્રસૃતાય ચ ॥

સુમેધસે કુલાલાય નમસ્તે શશિખણ્ડિને
ચિત્રાય ચિત્રવેષાય ચિત્રવર્ણાય મેધસે ॥

ચેકિતાનાય તુષ્ટાય નમસ્તે નિહિતાય ચ
નમઃ ક્ષાન્તાય દાન્તાય વજ્રસંહનનાય ચ ॥

રક્ષોઘ્નાય વિષઘ્નાય શિતિકણ્ઠોર્ધ્વમન્યવે ॥

લેલિહાય કૃતાન્તાય તિગ્માયુધધરાય ચ ॥

પ્રમોદાય સંમોદાય યતિવેદ્યાય તે નમઃ
અનામયાય સર્વાય મહાકાલાય વૈ નમઃ ॥

પ્રણવપ્રણવેશાય ભગનેત્રાન્તકાય ચ
મૃગવ્યાધાય દક્ષાય દક્ષયજ્ઞાન્તકાય ચ ॥

સર્વભૂતાત્મભૂતાય સર્વેશાતિશયાય ચ
પુરઘ્નાય સુશસ્ત્રાય ધન્વિને ઽથ પરશ્વધે ॥

પૂષદન્તવિનાશાય ભગનેત્રાન્તકાય ચ
કામદાય વરિષ્ઠાય કામાઙ્ગદહનાય ચ ॥

રઙ્ગે કરાલવક્ત્રાય નાગેન્દ્રવદનાય ચ
દૈત્યાનામન્તકેશાય દૈત્યાક્રન્દકરાય ચ ॥

હિમઘ્નાય ચ તીક્ષ્ણાય આર્દ્રચર્મધરાય ચ
શ્મશાનરતિનિત્યાય નમો ઽસ્તૂલ્મુકધારિણે ॥

નમસ્તે પ્રાણપાલાય મુણ્ડમાલાધરાય ચ
પ્રહીણશોકૈર્વિવિધૈર્ ભૂતૈઃ પરિવૃતાય ચ ॥

નરનારીશરીરાય દેવ્યાઃ પ્રિયકરાય ચ
જટિને મુણ્ડિને ચૈવ વ્યાલયજ્ઞોપવીતિને ॥

નમો ઽસ્તુ નૃત્યશીલાય ઉપનૃત્યપ્રિયાય ચ
મન્યવે ગીતશીલાય મુનિભિર્ ગાયતે નમઃ ॥

કટકટાય તિગ્માય અપ્રિયાય પ્રિયાય ચ
વિભીષણાય ભીષ્માય ભગપ્રમથનાય ચ ॥

સિદ્ધસંઘાનુગીતાય મહાભાગાય વૈ નમઃ
નમો મુક્તાટ્ટહાસાય ક્ષ્વેડિતાસ્ફોટિતાય ચ ॥

નર્દતે કૂર્દતે ચૈવ નમઃ પ્રમુદિતાત્મને
નમો મૃડાય શ્વસતે ધાવતે ઽધિષ્ઠિતે નમઃ ॥

ધ્યાયતે જૃમ્ભતે ચૈવ રુદતે દ્રવતે નમઃ
વલ્ગતે ક્રીડતે ચૈવ લમ્બોદરશરીરિણે ॥

નમો ઽકૃત્યાય કૃત્યાય મુણ્ડાય કીકટાય ચ
નમ ઉન્મત્તદેહાય કિઙ્કિણીકાય વૈ નમઃ ॥

નમો વિકૃતવેષાય ક્રૂરાયામર્ષણાય ચ
અપ્રમેયાય ગોપ્ત્રે ચ દીપ્તાયાનિર્ગુણાય ચ ॥

વામપ્રિયાય વામાય ચૂડામણિધરાય ચ
નમસ્તોકાય તનવે ગુણૈરપ્રમિતાય ચ ॥

નમો ગુણ્યાય ગુહ્યાય અગમ્યગમનાય ચ
લોકધાત્રી ત્વિયં ભૂમિઃ પાદૌ સજ્જનસેવિતૌ ॥

સર્વેષાં સિદ્ધિયોગાનામ્ અધિષ્ઠાનં તવોદરમ્
મધ્યે ઽન્તરિક્ષં વિસ્તીર્ણં તારાગણવિભૂષિતમ્ ॥

સ્વાતેઃ પથ ઇવાભાતિ શ્રીમાન્ હારસ્તવોરસિ
દિશો દશભુજાસ્તુભ્યં કેયૂરાઙ્ગદભૂષિતાઃ ॥

વિસ્તીર્ણપરિણાહશ્ ચ નીલાઞ્જનચયોપમઃ
કણ્ઠસ્તે શોભતે શ્રીમાન્ હેમસૂત્રવિભૂષિતઃ ॥

દંષ્ટ્રાકરાલં દુર્ધર્ષમ્ અનૌપમ્યં મુખં તથા
પદ્મમાલાકૃતોષ્ણીષં શિરો દ્યૌઃ શોભતે ઽધિકમ્ ॥

દીપ્તિઃ સૂર્યે વપુશ્ચન્દ્રે સ્થૈર્યં શૈલે ઽનિલે બલમ્
ઔષ્ણ્યમગ્નૌ તથા શૈત્યમ્ અપ્સુ શબ્દો ઽમ્બરે તથા ॥

અક્ષરાન્તરનિષ્પન્દાદ્ ગુણાનેતાન્વિદુર્બુધાઃ
જપો જપ્યો મહાદેવો મહાયોગોમહેશ્વરઃ ॥

પુરેશયો ગુહાવાસી ખેચરો રજનીચરઃ
તપોનિધિર્ગુહગુરુર્ નન્દનો નન્દવર્ધનઃ ॥

હયશીર્ષા પયોધાતા વિધાતા ભૂતભાવનઃ
બોદ્ધવ્યો બોધિતા નેતા દુર્ધર્ષો દુષ્પ્રકમ્પનઃ ॥

બૃહદ્રથો ભીમકર્મા બૃહત્કીર્તિર્ ધનઞ્જયઃ
ઘણ્ટાપ્રિયો ધ્વજી છત્ત્રી પિનાકી ધ્વજિનીપતિઃ ॥

કવચી પટ્ટિશી ખડ્ગી ધનુર્હસ્તઃ પરશ્વધી
અઘસ્મરો ઽનઘઃ શૂરો દેવરાજો ઽરિમર્દનઃ ॥

ત્વાં પ્રસાદ્ય પુરાસ્માભિર્ દ્વિષન્તો નિહતા યુધિ
અગ્નિઃ સદાર્ણવાંભસ્ત્વં પિબન્નપિ ન તૃપ્યસે ॥

ક્રોધાકારઃ પ્રસન્નાત્મા કામદઃ કામગઃ પ્રિયઃ
બ્રહ્મચારિ ચાગાધશ્ ચ બ્રહ્મણ્યઃ શિષ્ટપૂજિતઃ ॥

દેવાનામ્ અક્ષયઃ કોશસ્ ત્વયા યજ્ઞઃ પ્રકલ્પિતઃ
હવ્યં તવેદં વહતિ વેદોક્તં હવ્યવાહનઃ
પ્રીતે ત્વયિ મહાદેવ વયં પ્રીતા ભવામહે ॥

ભવાનીશો ઽનાદિમાંસ્ત્વં ચ સર્વલોકાનાં ત્વં બ્રહ્મકર્તાદિસર્ગઃ
સાંખ્યાઃ પ્રકૃતેઃ પરમં ત્વાં વિદિત્વા ક્ષીણધ્યાનાસ્ત્વામમૃત્યું વિશન્તિ ॥

યોગાશ્ ચ ત્વાં ધ્યાયિનો નિત્યસિદ્ધં જ્ઞાત્વા યોગાન્ સંત્યજન્તે પુનસ્તાન્
યે ચાપ્યન્યે ત્વાં પ્રસન્ના વિશુદ્ધાઃ સ્વકર્મભિસ્તે દિવ્યભોગા ભવન્તિ ॥

અપ્રસંખ્યેયતત્ત્વસ્ય યથા વિદ્મઃ સ્વશક્તિતઃ
કીર્તિતં તવ માહાત્મ્યમ્ અપારસ્ય મહાત્મનઃ ॥

શિવો નો ભવ સર્વત્ર યો ઽસિ સો ઽસિ નમો ઽસ્તુ તે
ય ઇદં કીર્તયેદ્ભક્ત્યા બ્રહ્મનારાયણસ્તવમ્ ॥

શ્રાવયેદ્વા દ્વિજાન્ વિદ્વાન્ શૃણુયાદ્વા સમાહિતઃ
અશ્વમેધાયુતં કૃત્વા યત્ફલં તદવાપ્નુયાત્ ॥

પાપાચારો ઽપિ યો મર્ત્યઃ શૃણુયાચ્છિવસન્નિધૌ
જપેદ્વાપિ વિનિર્મુક્તો બ્રહ્મલોકં સ ગચ્છતિ ॥

શ્રાદ્ધે વા દૈવિકે કાર્યે યજ્ઞે વાવભૃથાન્તિકે
કીર્તયેદ્વા સતાં મધ્યે સ યાતિ બ્રહ્મણો ઽન્તિકમ્ ॥