લિઙ્ગપુરાણ · અધ્યાય 1.19

અથોવાચ મહાદેવઃ પ્રીતો ઽહં સુરસત્તમૌ
પશ્યતાં માં મહાદેવં ભયં સર્વં વિમુચ્યતામ્ ॥

યુવાં પ્રસૂતૌ ગાત્રાભ્યાં મમ પૂર્વં મહાબલૌ
અયં મે દક્ષિણે પાર્શ્વે બ્રહ્મા લોકપિતામહઃ ॥

વામે પાર્શ્વે ચ મે વિષ્ણુર્ વિશ્વાત્મા હૃદયોદ્ભવઃ
પ્રીતો ઽહં યુવયોઃ સમ્યગ્ વરં દદ્મિ યથેપ્સિતમ્ ॥

એવમુક્ત્વા તુ તં વિષ્ણું કરાભ્યાં પરમેશ્વરઃ
પસ્પર્શ સુભગાભ્યાં તુ કૃપયા તુ કૃપાનિધિઃ ॥

તતઃ પ્રહૃષ્ટમનસા પ્રણિપત્ય મહેશ્વરમ્
પ્રાહ નારાયણો નાથં લિઙ્ગસ્થં લિઙ્ગવર્જિતમ્ ॥

યદિ પ્રીતિઃ સમુત્પન્ના યદિ દેયો વરશ્ ચ નૌ
ભક્તિર્ભવતુ નૌ નિત્યં ત્વયિ ચાવ્યભિચારિણી ॥

દેવઃ પ્રદત્તવાન્ દેવાઃ સ્વાત્મન્યવ્યભિચારિણીમ્
બ્રહ્મણે વિષ્ણવે ચૈવ શ્રદ્ધાં શીતાંશુભૂષણઃ ॥

જાનુભ્યામવનીં ગત્વા પુનર્નારાયણઃ સ્વયમ્
પ્રણિપત્ય ચ વિશ્વેશં પ્રાહ મન્દતરં વશી ॥

આવયોર્દેવદેવેશ વિવાદમતિશોભનમ્
ઇહાગતો ભવાન્ યસ્માદ્ વિવાદશમનાય નૌ ॥

તસ્ય તદ્વચનં શ્રુત્વા પુનઃ પ્રાહ હરો હરિમ્
પ્રણિપત્ય સ્થિતં મૂર્ધ્ના કૃતાઞ્જલિપુટં સ્મયન્ ॥

પ્રલયસ્થિતિસર્ગાણાં કર્તા ત્વં ધરણીપતે
વત્સ વત્સ હરે વિષ્ણો પાલયૈતચ્ચરાચરમ્ ॥

ત્રિધા ભિન્નો હ્યહં વિષ્ણો બ્રહ્મવિષ્ણુભવાખ્યયા
સર્ગરક્ષાલયગુણૈર્ નિષ્કલઃ પરમેશ્વરઃ ॥

સંમોહં ત્યજ ભો વિષ્ણો પાલયૈનં પિતામહમ્
પાદ્મે ભવિષ્યતિ સુતઃ કલ્પે તવ પિતામહઃ ॥

તદા દ્રક્ષ્યસિ માં ચૈવં સો ઽપિ દ્રક્ષ્યતિ પદ્મજઃ
એવમુક્ત્વા સ ભગવાંસ્ તત્રૈવાન્તરધીયત ॥

તદાપ્રભૃતિ લોકેષુ લિઙ્ગાર્ચા સુપ્રતિષ્ઠિતા
લિઙ્ગવેદી મહાદેવી લિઙ્ગં સાક્ષાન્મહેશ્વરઃ ॥

લયનાલ્લિઙ્ગમિત્યુક્તં તત્રૈવ નિખિલં સુરાઃ
યસ્તુ લૈઙ્ગં પઠેન્નિત્યમ્ આખ્યાનં લિઙ્ગસન્નિધૌ ॥

સ યાતિ શિવતાં વિપ્રો નાત્ર કાર્યા વિચારણા ॥