લિઙ્ગપુરાણ · અધ્યાય 1.18
એકાક્ષરાય રુદ્રાય અકારાયાત્મરૂપિણે
ઉકારાયાદિદેવાય વિદ્યાદેહાય વૈ નમઃ ॥
તૃતીયાય મકારાય શિવાય પરમાત્મને
સૂર્યાગ્નિસોમવર્ણાય યજમાનાય વૈ નમઃ ॥
અગ્નયે રુદ્રરૂપાય રુદ્રાણાં પતયે નમઃ
શિવાય શિવમન્ત્રાય સદ્યોજાતાય વેધસે ॥
વામાય વામદેવાય વરદાયામૃતાય તે
અઘોરાયાતિઘોરાય સદ્યોજાતાય રંહસે ॥
ઈશાનાય શ્મશાનાય અતિવેગાય વેગિને
નમો ઽસ્તુ શ્રુતિપાદાય ઊર્ધ્વલિઙ્ગાય લિઙ્ગિને ॥
હેમલિઙ્ગાય હેમાય વારિલિઙ્ગાય ચાંભસે
શિવાય શિવલિઙ્ગાય વ્યાપિને વ્યોમવ્યાપિને ॥
વાયવે વાયુવેગાય નમસ્તે વાયુવ્યાપિને
તેજસે તેજસાં ભર્ત્રે નમસ્તેજો ઽધિવ્યાપિને ॥
જલાય જલભૂતાય નમસ્તે જલવ્યાપિને
પૃથિવ્યૈ ચાન્તરિક્ષાય પૃથિવીવ્યાપિને નમઃ ॥
શબ્દસ્પર્શસ્વરૂપાય રસગન્ધાય ગન્ધિને
ગણાધિપતયે તુભ્યં ગુહ્યાદ્ગુહ્યતમાય તે ॥
અનન્તાય વિરૂપાય અનન્તાનામયાય ચ
શાશ્વતાય વરિષ્ઠાય વારિગર્ભાય યોગિને ॥
સંસ્થિતાયામ્ભસાં મધ્યે આવયોર્મધ્યવર્ચસે
ગોપ્ત્રે હર્ત્રે સદા કર્ત્રે નિધનાયેશ્વરાય ચ ॥
અચેતનાય ચિન્ત્યાય ચેતનાયાસહારિણે
અરૂપાય સુરૂપાય અનઙ્ગાયાઙ્ગહારિણે ॥
ભસ્મદિગ્ધશરીરાય ભાનુસોમાગ્નિહેતવે
શ્વેતાય શ્વેતવર્ણાય તુહિનાદ્રિચરાય ચ ॥
સુશ્વેતાય સુવક્ત્રાય નમઃ શ્વેતશિખાય ચ
શ્વેતાસ્યાય મહાસ્યાય નમસ્તે શ્વેતલોહિત ॥
સુતારાય વિશિષ્ટાય નમો દુન્દુભિને હર
શતરૂપવિરૂપાય નમઃ કેતુમતે સદા ॥
ઋદ્ધિશોકવિશોકાય પિનાકાય કપર્દિને
વિપાશાય સુપાશાય નમસ્તે પાશનાશિને ॥
સુહોત્રાય હવિષ્યાય સુબ્રહ્મણ્યાય સૂરિણે
સુમુખાય સુવક્ત્રાય દુર્દમાય દમાય ચ ॥
કઙ્કાય કઙ્કરૂપાય કઙ્કણીકૃતપન્નગ
સનકાય નમસ્તુભ્યં સનાતન સનન્દન ॥
સનત્કુમારસારઙ્ગમ્ આરણાય મહાત્મને
લોકાક્ષિણે ત્રિધામાય નમો વિરજસે સદા ॥
શઙ્ખપાલાય શઙ્ખાય રજસે તમસે નમઃ
સારસ્વતાય મેઘાય મેઘવાહન તે નમઃ ॥
સુવાહાય વિવાહાય વિવાદવરદાય ચ
નમઃ શિવાય રુદ્રાય પ્રધાનાય નમોનમઃ ॥
ત્રિગુણાય નમસ્તુભ્યં ચતુર્વ્યૂહાત્મને નમઃ
સંસારાય નમસ્તુભ્યં નમઃ સંસારહેતવે ॥
મોક્ષાય મોક્ષરૂપાય મોક્ષકર્ત્રે નમોનમઃ
આત્મને ઋષયે તુભ્યં સ્વામિને વિષ્ણવે નમઃ ॥
નમો ભગવતે તુભ્યં નાગાનાં પતયે નમઃ
ઓઙ્કારાય નમસ્તુભ્યં સર્વજ્ઞાય નમો નમઃ ॥
સર્વાય ચ નમસ્તુભ્યં નમો નારાયણાય ચ
નમો હિરણ્યગર્ભાય આદિદેવાય તે નમઃ ॥
નમો ઽસ્ત્વજાય પતયે પ્રજાનાં વ્યૂહહેતવે
મહાદેવાય દેવાનામ્ ઈશ્વરાય નમો નમઃ ॥
શર્વાય ચ નમસ્તુભ્યં સત્યાય શમનાય ચ
બ્રહ્મણે ચૈવ ભૂતાનાં સર્વજ્ઞાય નમો નમઃ ॥
મહાત્મને નમસ્તુભ્યં પ્રજ્ઞારૂપાય વૈ નમઃ
ચિતયે ચિતિરૂપાય સ્મૃતિરૂપાય વૈ નમઃ ॥
જ્ઞાનાય જ્ઞાનગમ્યાય નમસ્તે સંવિદે સદા
શિખરાય નમસ્તુભ્યં નીલકણ્ઠાય વૈ નમઃ ॥
અર્ધનારીશરીરાય અવ્યક્તાય નમોનમઃ
એકાદશવિભેદાય સ્થાણવે તે નમઃ સદા ॥
નમઃ સોમાય સૂર્યાય ભવાય ભવહારિણે
યશસ્કરાય દેવાય શઙ્કરાયેશ્વરાય ચ ॥
નમો ઽંબિકાધિપતયે ઉમાયાઃ પતયે નમઃ
હિરણ્યબાહવે તુભ્યં નમસ્તે હેમરેતસે ॥
નીલકેશાય વિત્તાય શિતિકણ્ઠાય વૈ નમઃ
કપર્દિને નમસ્તુભ્યં નાગાઙ્ગાભરણાય ચ ॥
વૃષારૂઢાય સર્વસ્ય હર્ત્રે કર્ત્રે નમોનમઃ
વીરરામાતિરામાય રામનાથાય તે વિભો ॥
નમો રાજાધિરાજાય રાજ્ઞામધિગતાય તે
નમઃ પાલાધિપતયે પાલાશાકૃન્તતે નમઃ ॥
નમઃ કેયૂરભૂષાય ગોપતે તે નમોનમઃ
નમઃ શ્રીકણ્ઠનાથાય નમો લિકુચપાણયે ॥
ભુવનેશાય દેવાય વેદશાસ્ત્ર નમો ઽસ્તુ તે
સારઙ્ગાય નમસ્તુભ્યં રાજહંસાય તે નમઃ ॥
કનકાઙ્ગદહારાય નમઃ સર્પોપવીતિને
સર્પકુણ્ડલમાલાય કટિસૂત્રીકૃતાહિને ॥
વેદગર્ભાય ગર્ભાય વિશ્વગર્ભાય તે શિવ
વિરરામેતિ સંસ્તુત્વા બ્રહ્મણા સહિતો હરિઃ ॥
એતત્સ્તોત્રવરં પુણ્યં સર્વપાપપ્રણાશનમ્
યઃ પઠેચ્છ્રાવયેદ્વાપિ બ્રાહ્મણાન્ વેદપારગાન્ ॥
સ યાતિ બ્રહ્મણો લોકે પાપકર્મરતો ઽપિ વૈ
તસ્માજ્જપેત્પઠેન્નિત્યં શ્રાવયેદ્બ્રાહ્મણાઞ્છુભાન્ ॥
સર્વપાપવિશુદ્ધ્યર્થં વિષ્ણુના પરિભાષિતમ્ ॥
મૂળ પાઠ: Liṅgapurāṇa, 1-108 · Edition: Bombay : Venkatesvara Steam Press 1906 · Data entry members of the Sansknet Project · GRETIL (Göttingen) · CC BY-NC-SA 4.0