લિઙ્ગપુરાણ · અધ્યાય 1.16

અથાન્યો બ્રહ્મણઃ કલ્પો વર્તતે મુનિપુઙ્ગવાઃ
વિશ્વરૂપ ઇતિ ખ્યાતો નામતઃ પરમાદ્ભુતઃ ॥

વિનિવૃત્તે તુ સંહારે પુનઃ સૃષ્ટે ચરાચરે
બ્રહ્મણઃ પુત્રકામસ્ય ધ્યાયતઃ પરમેષ્ઠિનઃ ॥

પ્રાદુર્ભૂતા મહાનાદા વિશ્વરૂપા સરસ્વતી
વિશ્વમાલ્યાંબરધરા વિશ્વયજ્ઞોપવીતિની ॥

વિશ્વોષ્ણીષા વિશ્વગન્ધા વિશ્વમાતા મહોષ્ઠિકા
તથાવિધં સ ભગવાન્ ઈશાનં પરમેશ્વરમ્ ॥

શુદ્ધસ્ફટિકસંકાશં સર્વાભરણભૂષિતમ્
અથ તં મનસા ધ્યાત્વા યુક્તાત્મા વૈ પિતામહઃ ॥

વવન્દે દેવમીશાનં સર્વેશં સર્વગં પ્રભુમ્
ઓમીશાન નમસ્તે ઽસ્તુ મહાદેવ નમો ઽસ્તુ તે ॥

નમો ઽસ્તુ સર્વવિદ્યાનામ્ ઈશાન પરમેશ્વર
નમો ઽસ્તુ સર્વભૂતાનામ્ ઈશાન વૃષવાહન ॥

બ્રહ્મણો ઽધિપતે તુભ્યં બ્રહ્મણે બ્રહ્મરૂપિણે
નમો બ્રહ્માધિપતયે શિવં મે ઽસ્તુ સદાશિવ ॥

ઓઙ્કારમૂર્તે દેવેશ સદ્યોજાત નમોનમઃ
પ્રપદ્યે ત્વાં પ્રપન્નો ઽસ્મિ સદ્યોજાતાય વૈ નમઃ ॥

અભવે ચ ભવે તુભ્યં તથા નાતિભવે નમઃ
ભવોદ્ભવ ભવેશાન માં ભજસ્વ મહાદ્યુતે ॥

વામદેવ નમસ્તુભ્યં જ્યેષ્ઠાય વરદાય ચ
નમો રુદ્રાય કાલાય કલનાય નમો નમઃ ॥

નમો વિકરણાયૈવ કાલવર્ણાય વર્ણિને
બલાય બલિનાં નિત્યં સદા વિકરણાય તે ॥

બલપ્રમથનાયૈવ બલિને બ્રહ્મરૂપિણે
સર્વભૂતેશ્વરેશાય ભૂતાનાં દમનાય ચ ॥

મનોન્મનાય દેવાય નમસ્તુભ્યં મહાદ્યુતે
વામદેવાય વામાય નમસ્તુભ્યં મહાત્મને ॥

જ્યેષ્ઠાય ચૈવ શ્રેષ્ઠાય રુદ્રાય વરદાય ચ
કાલહન્ત્રે નમસ્તુભ્યં નમસ્તુભ્યં મહાત્મને ॥

ઇતિ સ્તવેન દેવેશં નનામ વૃષભધ્વજમ્
યઃ પઠેત્ સકૃદેવેહ બ્રહ્મલોકં ગમિષ્યતિ ॥

શ્રાવયેદ્વા દ્વિજાન્ શ્રાદ્ધે સ યાતિ પરમાં ગતિમ્
એવં ધ્યાનગતં તત્ર પ્રણમન્તં પિતામહમ્ ॥

ઉવાચ ભગવાનીશઃ પ્રીતો ઽહં તે કિમિચ્છસિ
તતસ્તુ પ્રણતો ભૂત્વા વાગ્વિશુદ્ધં મહેશ્વરમ્ ॥

ઉવાચ ભગવાન્ રુદ્રં પ્રીતં પ્રીતેન ચેતસા
યદિદં વિશ્વરૂપં તે વિશ્વગૌઃ શ્રેયસીશ્વરી ॥

એતદ્વેદિતુમિચ્છામિ યથેયં પરમેશ્વર
કૈષા ભગવતી દેવી ચતુષ્પાદા ચતુર્મુખી ॥

ચતુઃશૃઙ્ગી ચતુર્વક્ત્રા ચતુર્દંષ્ટ્રા ચતુઃસ્તની
ચતુર્હસ્તા ચતુર્નેત્રા વિશ્વરૂપા કથં સ્મૃતા ॥

કિંનામગોત્રા કસ્યેયં કિંવીર્યા ચાપિ કર્મતઃ
તસ્ય તદ્વચનં શ્રુત્વા દેવદેવો વૃષધ્વજઃ ॥

પ્રાહ દેવવૃષં બ્રહ્મા બ્રહ્માણં ચાત્મસંભવમ્
રહસ્યં સર્વમન્ત્રાણાં પાવનં પુષ્ટિવર્ધનમ્ ॥

શૃણુષ્વૈતત્પરં ગુહ્યમ્ આદિસર્ગે યથા તથા
એવં યો વર્તતે કલ્પો વિશ્વરૂપસ્ત્વસૌ મતઃ ॥

બ્રહ્મસ્થાનમિદં ચાપિ યત્ર પ્રાપ્તં ત્વયા પ્રભો
ત્વત્તઃ પરતરં દેવ વિષ્ણુના તત્પદં શુભમ્ ॥

વૈકુણ્ઠેન વિશુદ્ધેન મમ વામાઙ્ગજેન વા
તદાપ્રભૃતિ કલ્પશ્ ચ ત્રયસ્ત્રિંશત્તમો હ્યયમ્ ॥

શતં શતસહસ્રાણામ્ અતીતા યે સ્વયંભુવઃ
પુરસ્તાત્તવ દેવેશ તચ્છૃણુષ્વ મહામતે ॥

આનન્દસ્તુ સ વિજ્ઞેય આનન્દત્વે વ્યવસ્થિતઃ
માણ્ડવ્યગોત્રસ્તપસા મમ પુત્રત્વમાગતઃ ॥

ત્વયિ યોગં ચ સાંખ્યં ચ તપોવિદ્યાવિધિક્રિયાઃ
ઋતં સત્યં દયા બ્રહ્મ અહિંસા સન્મતિઃ ક્ષમા ॥

ધ્યાનં ધ્યેયં દમઃ શાન્તિર્ વિદ્યાવિદ્યા મતિર્ધૃતિઃ
કાન્તિર્નીતિઃ પ્રથા મેધા લજ્જા દૃષ્ટિઃ સરસ્વતી ॥

તુષ્ટિઃ પુષ્ટિઃ ક્રિયા ચૈવ પ્રસાદશ્ ચ પ્રતિષ્ઠિતાઃ
દ્વાત્રિંશત્સુગુણા હ્યેષા દ્વાત્રિંશાક્ષરસંજ્ઞયા ॥

પ્રકૃતિર્વિહિતા બ્રહ્મંસ્ ત્વત્પ્રસૂતિર્મહેશ્વરી
વિષ્ણોર્ભગવતશ્ચાપિ તથાન્યેષામપિ પ્રભો ॥

સૈષા ભગવતી દેવી મત્પ્રસૂતિઃ પ્રતિષ્ઠિતા
ચતુર્મુખી જગદ્યોનિઃ પ્રકૃતિર્ ગૌઃ પ્રતિષ્ઠિતા ॥

ગૌરી માયા ચ વિદ્યા ચ કૃષ્ણા હૈમવતીતિ ચ
પ્રધાનં પ્રકૃતિશ્ચૈવ યામાહુસ્તત્ત્વચિન્તકાઃ ॥

અજામેકાં લોહિતાં શુક્લકૃષ્ણાં વિશ્વપ્રજાં સૃજમાનાં સરૂપામ્
અજો ઽહં માં વિદ્ધિ તાં વિશ્વરૂપં ગાયત્રીં ગાં વિશ્વરૂપાં હિ બુદ્ધ્યા ॥

એવમુક્ત્વા મહાદેવઃ સસર્જ પરમેશ્વરઃ
તતશ્ ચ પાર્શ્વગા દેવ્યાઃ સર્વરૂપકુમારકાઃ ॥

જટી મુણ્ડી શિખણ્ડી ચ અર્ધમુણ્ડશ્ ચ જજ્ઞિરે
તતસ્તેન યથોક્તેન યોગેન સુમહૌજસઃ ॥

દિવ્યવર્ષસહસ્રાન્તે ઉપાસિત્વા મહેશ્વરમ્
ધર્મોપદેશમખિલં કૃત્વા યોગમયં દૃઢમ્ ॥

શિષ્ટાશ્ ચ નિયતાત્માનઃ પ્રવિષ્ટા રુદ્રમીશ્વરમ્ ॥