લિઙ્ગપુરાણ · અધ્યાય 1.15

તતસ્તસ્મિન્ ગતે કલ્પે કૃષ્ણવર્ણે ભયાનકે
તુષ્ટાવ દેવદેવેશં બ્રહ્મા તં બ્રહ્મરૂપિણમ્ ॥

અનુગૃહ્ય તતસ્તુષ્ટો બ્રહ્માણમવદદ્ધરઃ
અનેનૈવ તુ રૂપેણ સંહરામિ ન સંશયઃ ॥

બ્રહ્મહત્યાદિકાન્ ઘોરાંસ્ તથાન્યાનપિ પાતકાન્
હીનાંશ્ચૈવ મહાભાગ તથૈવ વિવિધાન્યપિ ॥

ઉપપાતકમપ્યેવં તથા પાપાનિ સુવ્રત
માનસાનિ સુતીક્ષ્ણાનિ વાચિકાનિ પિતામહ ॥

કાયિકાનિ સુમિશ્રાણિ તથા પ્રાસંગિકાનિ ચ
બુદ્ધિપૂર્વં કૃતાન્યેવ સહજાગન્તુકાનિ ચ ॥

માતૃદેહોત્થિતાન્યેવં પિતૃદેહે ચ પાતકમ્
સંહરામિ ન સંદેહઃ સર્વં પાતકજં વિભો ॥

લક્ષં જપ્ત્વા હ્યઘોરેભ્યો બ્રહ્મહા મુચ્યતે પ્રભો
તદર્ધં વાચિકે વત્સ તદર્ધં માનસે પુનઃ ॥

ચતુર્ગુણં બુદ્ધિપૂર્વે ક્રોધાદષ્ટગુણં સ્મૃતમ્
વીરહા લક્ષમાત્રેણ ભ્રૂણહા કોટિમભ્યસેત્ ॥

માતૃહા નિયુતં જપ્ત્વા શુધ્યતે નાત્ર સંશયઃ
ગોઘ્નશ્ચૈવ કૃતઘ્નશ્ ચ સ્ત્રીઘ્નઃ પાપયુતો નરઃ ॥

અયુતાઘોરમભ્યસ્ય મુચ્યતે નાત્ર સંશયઃ
સુરાપો લક્ષમાત્રેણ બુદ્ધ્યાબુદ્ધ્યાપિ વૈ પ્રભો ॥

મુચ્યતે નાત્ર સંદેહસ્ તદર્ધેન ચ વારુણીમ્
અસ્નાતાશી સહસ્રેણ અજપી ચ તથા દ્વિજઃ ॥

અહુતાશી સહસ્રેણ અદાતા ચ વિશુધ્યતિ
બ્રાહ્મણસ્વાપહર્તા ચ સ્વર્ણસ્તેયી નરાધમઃ ॥

નિયુતં માનસં જપ્ત્વા મુચ્યતે નાત્ર સંશયઃ
ગુરુતલ્પરતો વાપિ માતૃઘ્નો વા નરાધમઃ ॥

બ્રહ્મઘ્નશ્ ચ જપેદેવં માનસં વૈ પિતામહ
સંપર્કાત્પાપિનાં પાપં તત્સમં પરિભાષિતમ્ ॥

તથાપ્યયુતમાત્રેણ પાતકાદ્વૈ પ્રમુચ્યતે
સંસર્ગાત્પાતકી લક્ષં જપેદ્વૈ માનસં ધિયા ॥

ઉપાંશુ યચ્ચતુર્ધા વૈ વાચિકં ચાષ્ટધા જપેત્
પાતકાદર્ધમેવ સ્યાદ્ ઉપપાતકિનાં સ્મૃતમ્ ॥

તદર્ધં કેવલે પાપે નાત્ર કાર્યા વિચારણા
બ્રહ્મહત્યા સુરાપાનં સુવર્ણસ્તેયમેવ ચ ॥

કૃત્વા ચ ગુરુતલ્પં ચ પાપકૃદ્બ્રાહ્મણો યદિ
રુદ્રગાયત્રિયા ગ્રાહ્યં ગોમૂત્રં કાપિલં દ્વિજાઃ ॥

ગન્ધદ્વારેતિ તસ્યા વૈ ગોમયં સ્વસ્થમ્ આહરેત્
તેજો ઽસિ શુક્તમ્ ઇત્યાજ્યં કાપિલં સંહરેદ્બુધઃ ॥

આપ્યાયસ્વેતિ ચ ક્ષીરં દધિક્રાવ્ણેતિ ચાહરેત્
ગવ્યં દધિ નવં સાક્ષાત્ કાપિલં વૈ પિતામહ ॥

દેવસ્ય ત્વેતિ મન્ત્રેણ સંગ્રહેદ્વૈ કુશોદકમ્
એકસ્થં હેમપાત્રે વા કૃત્વાઘોરેણ રાજતે ॥

તામ્રે વા પદ્મપાત્રે વા પાલાશે વા દલે શુભે
સકૂર્ચં સર્વરત્નાઢ્યં ક્ષિપ્ત્વા તત્રૈવ કાઞ્ચનમ્ ॥

જપેલ્લક્ષમઘોરાખ્યં હુત્વા ચૈવ ઘૃતાદિભિઃ
ઘૃતેન ચરુણા ચૈવ સમિદ્ભિશ્ ચ તિલૈસ્ તથા ॥

યવૈશ્ ચ વ્રીહિભિશ્ચૈવ જુહુયાદ્વૈ પૃથક્પૃથક્
પ્રત્યેકં સપ્તવારં તુ દ્રવ્યાલાભે ઘૃતેન તુ ॥

હુત્વાઘોરેણ દેવેશં સ્નાત્વાઘોરેણ વૈ દ્વિજાઃ
અષ્ટદ્રોણઘૃતેનૈવ સ્નાપ્ય પશ્ચાદ્વિશોધ્ય ચ ॥

અહોરાત્રોષિતઃ સ્નાતઃ પિબેત્કૂર્ચં શિવાગ્રતઃ
બ્રાહ્મં બ્રહ્મજપં કુર્યાદ્ આચમ્ય ચ યથાવિધિ ॥

એવં કૃત્વા કૃતઘ્નો ઽપિ બ્રહ્મહા ભ્રૂણહા તથા
વીરહા ગુરુઘાતી ચ મિત્રવિશ્વાસઘાતકઃ ॥

સ્તેયી સુવર્ણસ્તેયી ચ ગુરુતલ્પરતઃ સદા
મદ્યપો વૃષલીસક્તઃ પરદારવિધર્ષકઃ ॥

બ્રહ્મસ્વહા તથા ગોઘ્નો માતૃહા પિતૃહા તથા
દેવપ્રચ્યાવકશ્ચૈવ લિઙ્ગપ્રધ્વંસકસ્ તથા ॥

તથાન્યાનિ ચ પાપાનિ માનસાનિ દ્વિજો યદિ
વાચિકાનિ તથાન્યાનિ કાયિકાનિ સહસ્રશઃ ॥

કૃત્વા વિમુચ્યતે સદ્યો જન્માન્તરશતૈરપિ
એતદ્રહસ્યં કથિતમ્ અઘોરેશપ્રસંગતઃ ॥

તસ્માજ્જપેદ્દ્વિજો નિત્યં સર્વપાપવિશુદ્ધયે ॥