લિઙ્ગપુરાણ · અધ્યાય 1.13

એકત્રિંશત્તમઃ કલ્પઃ પીતવાસા ઇતિ સ્મૃતઃ
બ્રહ્મા યત્ર મહાભાગઃ પીતવાસા બભૂવ હ ॥

ધ્યાયતઃ પુત્રકામસ્ય બ્રહ્મણઃ પરમેષ્ઠિનઃ
પ્રાદુર્ભૂતો મહાતેજાઃ કુમારઃ પીતવસ્ત્રધૃક્ ॥

પીતગન્ધાનુલિપ્તાઙ્ગઃ પીતમાલ્યાંબરો યુવા
હેમયજ્ઞોપવીતશ્ ચ પીતોષ્ણીષો મહાભુજઃ ॥

તં દૃષ્ટ્વા ધ્યાનસંયુક્તો બ્રહ્મા લોકમહેશ્વરમ્
મનસા લોકધાતારં પ્રપેદે શરણં વિભુમ્ ॥

તતો ધ્યાનગતસ્તત્ર બ્રહ્મા માહેશ્વરીં વરામ્
ગાં વિશ્વરૂપાં દદૃશે મહેશ્વરમુખાચ્ચ્યુતામ્ ॥

ચતુષ્પદાં ચતુર્વક્ત્રાં ચતુર્હસ્તાં ચતુઃસ્તનીમ્
ચતુર્નેત્રાં ચતુઃશૃઙ્ગીં ચતુર્દંષ્ટ્રાં ચતુર્મુખીમ્ ॥

દ્વાત્રિંશદ્ગુણસંયુક્તામ્ ઈશ્વરીં સર્વતોમુખીમ્
સ તાં દૃષ્ટ્વા મહાતેજા મહાદેવીં મહેશ્વરીમ્ ॥

પુનરાહ મહાદેવઃ સર્વદેવનમસ્કૃતઃ
મતિઃ સ્મૃતિર્બુદ્ધિરિતિ ગાયમાનઃ પુનઃ પુનઃ ॥

એહ્યેહીતિ મહાદેવિ સાતિષ્ઠત્પ્રાઞ્જલિર્વિભુમ્
વિશ્વમાવૃત્ય યોગેન જગત્સર્વં વશીકુરુ ॥

અથ તામાહ દેવેશો રુદ્રાણી ત્વં ભવિષ્યસિ
બ્રાહ્મણાનાં હિતાર્થાય પરમાર્થા ભવિષ્યસિ ॥

તથૈનાં પુત્રકામસ્ય ધ્યાયતઃ પરમેષ્ઠિનઃ
પ્રદદૌ દેવદેવેશઃ ચતુષ્પાદાં જગદ્ગુરુઃ ॥

તતસ્તાં ધ્યાનયોગેન વિદિત્વા પરમેશ્વરીમ્
બ્રહ્મા લોકગુરોઃ સો ઽથ પ્રતિપેદે મહેશ્વરીમ્ ॥

ગાયત્રીં તુ તતો રૌદ્રીં ધ્યાત્વા બ્રહ્માનુયન્ત્રિતઃ
ઇત્યેતાં વૈદિકીં વિદ્યાં રૌદ્રીં ગાયત્રીમીરિતામ્ ॥

જપિત્વા તુ મહાદેવીં બ્રહ્મા લોકનમસ્કૃતામ્
પ્રપન્નસ્તુ મહાદેવં ધ્યાનયુક્તેન ચેતસા ॥

તતસ્તસ્ય મહાદેવો દિવ્યયોગં બહુશ્રુતમ્
ઐશ્વર્યં જ્ઞાનસંપત્તિં વૈરાગ્યં ચ દદૌ પ્રભુઃ ॥

તતો ઽસ્ય પાર્શ્વતો દિવ્યાઃ પ્રાદુર્ભૂતાઃ કુમારકાઃ
પીતમાલ્યાંબરધરાઃ પીતસ્રગનુલેપનાઃ ॥

પીતાભોષ્ણીષશિરસઃ પીતાસ્યાઃ પીતમૂર્ધજાઃ
તતો વર્ષસહસ્રાન્ત ઉષિત્વા વિમલૌજસઃ ॥

યોગાત્માનસ્તપોહ્લાદાઃ બ્રાહ્મણાનાં હિતૈષિણઃ
ધર્મયોગબલોપેતા મુનીનાં દીર્ઘસત્ત્રિણામ્ ॥

ઉપદિશ્ય મહાયોગં પ્રવિષ્ટાસ્તે મહેશ્વરમ્
એવમેતેન વિધિના યે પ્રપન્ના મહેશ્વરમ્ ॥

અન્યે ઽપિ નિયતાત્માનો ધ્યાનયુક્તા જિતેન્દ્રિયાઃ
તે સર્વે પાપમુત્સૃજ્ય વિમલા બ્રહ્મવર્ચસઃ ॥

પ્રવિશન્તિ મહાદેવં રુદ્રં તે ત્વપુનર્ભવાઃ ॥