લિઙ્ગપુરાણ · અધ્યાય 1.12

તતસ્ત્રિંશત્તમઃ કલ્પો રક્તો નામ પ્રકીર્તિતઃ
બ્રહ્મા યત્ર મહાતેજા રક્તવર્ણમધારયત્ ॥

ધ્યાયતઃ પુત્રકામસ્ય બ્રહ્મણઃ પરમેષ્ઠિનઃ
પ્રાદુર્ભૂતો મહાતેજાઃ કુમારો રક્તભૂષણઃ ॥

રક્તમાલ્યામ્બરધરો રક્તનેત્રઃ પ્રતાપવાન્
સ તં દૃષ્ટ્વા મહાત્માનં કુમારં રક્તવાસસમ્ ॥

પરં ધ્યાનં સમાશ્રિત્ય બુબુધે દેવમીશ્વરમ્
સ તં પ્રણમ્ય ભગવાન્ બ્રહ્મા પરમયન્ત્રિતઃ ॥

વામદેવં તતો બ્રહ્મા બ્રહ્મ વૈ સમચિન્તયત્
તથા સ્તુતો મહાદેવો બ્રહ્મણા પરમેશ્વરઃ ॥

પ્રતીતહૃદયઃ સર્વ ઇદમાહ પિતામહમ્
ધ્યાયતા પુત્રકામેન યસ્માત્તે ઽહં પિતામહ ॥

દૃષ્ટઃ પરમયા ભક્ત્યા સ્તુતશ્ ચ બ્રહ્મપૂર્વકમ્
તસ્માદ્ધ્યાનબલં પ્રાપ્ય કલ્પે કલ્પે પ્રયત્નતઃ ॥

વેત્સ્યસે માં પ્રસંખ્યાતં લોકધાતારમીશ્વરમ્
તતસ્તસ્ય મહાત્માનશ્ ચત્વારસ્તે કુમારકાઃ ॥

સંબભૂવુર્મહાત્માનો વિશુદ્ધા બ્રહ્મવર્ચસઃ
વિરજાશ્ ચ વિબાહુશ્ ચ વિશોકો વિશ્વભાવનઃ ॥

બ્રહ્મણ્યા બ્રહ્મણસ્તુલ્યા વીરા અધ્યવસાયિનઃ
રક્તાંબરધરાઃ સર્વે રક્તમાલ્યાનુલેપનાઃ ॥

રક્તકુઙ્કુમલિપ્તાઙ્ગા રક્તભસ્માનુલેપનાઃ
તતો વર્ષસહસ્રાન્તે બ્રહ્મત્વે ઽધ્યવસાયિનઃ ॥

ગૃણન્તશ્ ચ મહાત્માનો બ્રહ્મ તદ્વામદૈવિકમ્
અનુગ્રહાર્થં લોકાનાં શિષ્યાણાં હિતકામ્યયા ॥

ધર્મોપદેશમખિલં કૃત્વા તે બ્રહ્મણઃ પ્રિયાઃ
પુનરેવ મહાદેવં પ્રવિષ્ટા રુદ્રમવ્યયમ્ ॥

યે ઽપિ ચાન્યે દ્વિજશ્રેષ્ઠા યુઞ્જાના વામમીશ્વરમ્
પ્રપશ્યન્તિ મહાદેવં તદ્ભક્તાસ્ તત્પરાયણાઃ ॥

તે સર્વે પાપનિર્મુક્તા વિમલા બ્રહ્મચારિણઃ
રુદ્રલોકં ગમિષ્યન્તિ પુનરાવૃત્તિદુર્લભમ્ ॥