લિઙ્ગપુરાણ · અધ્યાય 1.105

યદા સ્થિતાઃ સુરેશ્વરાઃ પ્રણમ્ય ચૈવમીશ્વરમ્
તદાંબિકાપતિર્ ભવઃ પિનાકધૃઙ્ મહેશ્વરઃ ॥

દદૌ નિરીક્ષણં ક્ષણાદ્ ભવઃ સ તાન્સુરોત્તમાન્
પ્રણેમુરાદરાદ્ધરં સુરા મુદાર્દ્રલોચનાઃ ॥

ભવઃ સુધામૃતોપમૈર્ નિરીક્ષણૈર્નિરીક્ષણાત્
તદાહ ભદ્રમસ્તુ વઃ સુરેશ્વરાન્ મહેશ્વરઃ ॥

વરાર્થમીશ વીક્ષ્યતે સુરા ગૃહં ગતાસ્ત્વિમે
પ્રણમ્ય ચાહ વાક્પતિઃ પતિં નિરીક્ષ્ય નિર્ભયઃ ॥

સુરેતરાદિભિઃ સદા હ્ય્ અવિઘ્નમર્થિતો ભવાન્
સમસ્તકર્મસિદ્ધયે સુરાપકારકારિભિઃ ॥

તતઃ પ્રસીદતાદ્ ભવાન્ સુવિઘ્નકર્મકારણમ્
સુરાપકારકારિણામ્ ઇહૈષ એવ નો વરઃ ॥

તતસ્તદા નિશમ્ય વૈ પિનાકધૃક્ સુરેશ્વરઃ
ગણેશ્વરં સુરેશ્વરં વપુર્દધાર સઃ શિવઃ ॥

ગણેશ્વરાશ્ ચ તુષ્ટુવુઃ સુરેશ્વરા મહેશ્વરમ્
સમસ્તલોકસંભવં ભવાર્ત્તિહારિણં શુભમ્ ॥

ઇભાનનાશ્રિતં વરં ત્રિશૂલપાશધારિણમ્
સમસ્તલોકસંભવં ગજાનનં તદાંબિકા ॥

દદુઃ પુષ્પવર્ષં હિ સિદ્ધા મુનીન્દ્રાસ્ તથા ખેચરા દેવસંઘાસ્તદાનીમ્
તદા તુષ્ટુવુશ્ચૈકદન્તં સુરેશાઃ પ્રણેમુર્ગણેશં મહેશં વિતન્દ્રાઃ ॥

તદા તયોર્વિનિર્ગતઃ સુભૈરવઃ સ મૂર્તિમાન્
સ્થિતો નનર્ત બાલકઃ સમસ્તમઙ્ગલાલયઃ ॥

વિચિત્રવસ્ત્રભૂષણૈર્ અલંકૃતો ગજાનનઃ
મહેશ્વરસ્ય પુત્રકો ઽભિવન્દ્ય તાતમ્ અમ્બિકામ્ ॥

જાતમાત્રં સુતં દૃષ્ટ્વા ચકાર ભગવાન્ભવઃ
ગજાનનાય કૃત્યાંસ્તુ સર્વાન્સર્વેશ્વરઃ સ્વયમ્ ॥

આદાય ચ કરાભ્યાં ચ સુસુખાભ્યાં ભવઃ સ્વયમ્
આલિઙ્ગ્યાઘ્રાય મૂર્ધાનં મહાદેવો જગદ્ગુરુઃ ॥

તવાવતારો દૈત્યાનાં વિનાશાય મમાત્મજ
દેવાનામુપકારાર્થં દ્વિજાનાં બ્રહ્મવાદિનામ્ ॥

યજ્ઞશ્ ચ દક્ષિણાહીનઃ કૃતો યેન મહીતલે
તસ્ય ધર્મસ્ય વિઘ્નં ચ કુરુ સ્વર્ગપથે સ્થિતઃ ॥

અધ્યાપનં ચાધ્યયનં વ્યાખ્યાનં કર્મ એવ ચ
યો ઽન્યાયતઃ કરોત્યસ્મિન્ તસ્ય પ્રાણાન્સદા હર ॥

વર્ણાચ્ચ્યુતાનાં નારીણાં નરાણાં નરપુઙ્ગવ
સ્વધર્મરહિતાનાં ચ પ્રાણાનપહર પ્રભો ॥

યાઃ સ્ત્રિયસ્ત્વાં સદા કાલં પુરુષાશ્ ચ વિનાયક
યજન્તિ તાસાં તેષાં ચ ત્વત્સામ્યં દાતુમર્હસિ ॥

ત્વં ભક્તાન્ સર્વયત્નેન રક્ષ બાલગણેશ્વર
યૌવનસ્થાંશ્ ચ વૃદ્ધાંશ્ ચ ઇહામુત્ર ચ પૂજિતઃ ॥

જગત્ત્રયે ઽત્ર સર્વત્ર ત્વં હિ વિઘ્નગણેશ્વરઃ
સંપૂજ્યો વન્દનીયશ્ ચ ભવિષ્યસિ ન સંશયઃ ॥

માં ચ નારાયણં વાપિ બ્રહ્માણમ્ અપિ પુત્રક
યજન્તિ યજ્ઞૈર્વા વિપ્રૈર્ અગ્રે પૂજ્યો ભવિષ્યસિ ॥

ત્વામ્ અનભ્યર્ચ્ય કલ્યાણં શ્રૌતં સ્માર્તં ચ લૌકિકમ્
કુરુતે તસ્ય કલ્યાણમ્ અકલ્યાણં ભવિષ્યતિ ॥

બ્રાહ્મણૈઃ ક્ષત્રિયૈર્વૈશ્યૈઃ શૂદ્રૈશ્ચૈવ ગજાનન
સમ્પૂજ્ય સર્વસિદ્ધ્યર્થં ભક્ષ્યભોજ્યાદિભિઃ શુભૈઃ ॥

ત્વાં ગન્ધપુષ્પધૂપાદ્યૈર્ અનભ્યર્ચ્ય જગત્ત્રયે
દેવૈરપિ તથાન્યૈશ્ ચ લબ્ધવ્યં નાસ્તિ કુત્રચિત્ ॥

અભ્યર્ચયન્તિ યે લોકા માનવાસ્તુ વિનાયકમ્
તે ચાર્ચનીયાઃ શક્રાદ્યૈર્ ભવિષ્યન્તિ ન સંશયઃ ॥

અજં હરિં ચ માં વાપિ શક્રમન્યાન્સુરાનપિ
વિઘ્નૈર્ બાધયસિ ત્વાં ચેન્ નાર્ચયન્તિ ફલાર્થિનઃ ॥

સસર્જ ચ તદા વિઘ્ન ગણં ગણપતિઃ પ્રભુઃ
ગણૈઃ સાર્ધં નમસ્કૃત્વાપ્ય્ અતિષ્ઠત્તસ્ય ચાગ્રતઃ ॥

તદા પ્રભૃતિ લોકે ઽસ્મિન્ પૂજયન્તિ ગણેશ્વરમ્
દૈત્યાનાં ધર્મવિઘ્નં ચ ચકારાસૌ ગણેશ્વરઃ ॥

એતદ્વઃ કથિતં સર્વં સ્કન્દાગ્રજસમુદ્ભવમ્
યઃ પઠેચ્છૃણુયાદ્વાપિ શ્રાવયેદ્વા સુખીભવેત્ ॥