લિઙ્ગપુરાણ · અધ્યાય 1.104

કથં વિનાયકો જાતો ગજવક્ત્રો ગણેશ્વરઃ
કથં પ્રભાવસ્તસ્યૈવં સૂત વક્તુમિહાર્હસિ ॥

એતસ્મિન્નન્તરે દેવાઃ સેન્દ્રોપેન્દ્રાઃ સમેત્ય તે
ધર્મવિઘ્નં તદા કર્તું દૈત્યાનામભવન્દ્વિજાઃ ॥

અસુરા યાતુધાનાશ્ ચ રાક્ષસાઃ ક્રૂરકર્મિણઃ
તામસાશ્ ચ તથા ચાન્યે રાજસાશ્ ચ તથા ભુવિ ॥

અવિઘ્નં યજ્ઞદાનાદ્યૈઃ સમભ્યર્ચ્ય મહેશ્વરમ્
બ્રહ્માણં ચ હરિં વિપ્રા લબ્ધેપ્સિતવરા યતઃ ॥

તતો ઽસ્માકં સુરશ્રેષ્ઠાઃ સદા વિજયસંભવઃ
તેષાં તતસ્તુ વિઘ્નાર્થમ્ અવિઘ્નાય દિવૌકસામ્ ॥

પુત્રાર્થં ચૈવ નારીણાં નરાણાં કર્મસિદ્ધયે
વિઘ્નેશં શઙ્કરં સ્રષ્ટું ગણપં સ્તોતુમર્હથ ॥

ઇત્યુક્ત્વાન્યોન્યમનઘં તુષ્ટુવુઃ શિવમીશ્વરમ્
નમઃ સર્વાત્મને તુભ્યં સર્વજ્ઞાય પિનાકિને ॥

અનઘાય વિરિઞ્ચાય દેવ્યાઃ કાર્યાર્થદાયિને
અકાયાયાર્થકાયાય હરેઃ કાયાપહારિણે ॥

કાયાન્તસ્થામૃતાધાર મણ્ડલાવસ્થિતાય તે
કૃતાદિભેદકાલાય કાલવેગાય તે નમઃ ॥

કાલાગ્નિરુદ્રરૂપાય ધર્માદ્યષ્ટપદાય ચ
કાલીવિશુદ્ધદેહાય કાલિકાકારણાય તે ॥

કાલકણ્ઠાય મુખ્યાય વાહનાય વરાય તે
અંબિકાપતયે તુભ્યં હિરણ્યપતયે નમઃ ॥

હિરણ્યરેતસે ચૈવ નમઃ શર્વાય શૂલિને
કપાલદણ્ડપાશાસિ ચર્માઙ્કુશધરાય ચ ॥

પતયે હૈમવત્યાશ્ ચ હેમશુક્લાય તે નમઃ
પીતશુક્લાય રક્ષાર્થં સુરાણાં કૃષ્ણવર્ત્મને ॥

પઞ્ચમાય મહાપઞ્ચ યજ્ઞિનાં ફલદાય ચ
પઞ્ચાસ્યફણિહારાય પઞ્ચાક્ષરમયાય તે ॥

પઞ્ચધા પઞ્ચકૈવલ્ય દેવૈરર્ચિતમૂર્તયે
પઞ્ચાક્ષરદૃશે તુભ્યં પરાત્પરતરાય તે ॥

ષોડશસ્વરવજ્રાઙ્ગ વક્ત્રાયાક્ષયરૂપિણે
કાદિપઞ્ચકહસ્તાય ચાદિહસ્તાય તે નમઃ ॥

ટાદિપાદાય રુદ્રાય તાદિપાદાય તે નમઃ
પાદિમેણ્ઢ્રાય યદ્યઙ્ગ ધાતુસપ્તકધારિણે ॥

શાન્તાત્મરૂપિણે સાક્ષાત્ ક્ષદન્તક્રોધિને નમઃ
લવરેફહલાઙ્ગાય નિરઙ્ગાય ચ તે નમઃ ॥

સર્વેષામ્ એવ ભૂતાનાં હૃદિ નિઃસ્વનકારિણે
ભ્રુવોર્ અન્તે સદા સદ્ભિર્ દૃષ્ટાયાત્યન્તભાનવે ॥

ભાનુસોમાગ્નિનેત્રાય પરમાત્મસ્વરૂપિણે
ગુણત્રયોપરિસ્થાય તીર્થપાદાય તે નમઃ ॥

તીર્થતત્ત્વાય સારાય તસ્માદપિ પરાય તે
ઋગ્યજુઃસામવેદાય ઓંકારાય નમો નમઃ ॥

ઓઙ્કારે ત્રિવિધં રૂપમ્ આસ્થાયોપરિવાસિને
પીતાય કૃષ્ણવર્ણાય રક્તાયાત્યન્તતેજસે ॥

સ્થાનપઞ્ચકસંસ્થાય પઞ્ચધાણ્ડબહિઃ ક્રમાત્
બ્રહ્મણે વિષ્ણવે તુભ્યં કુમારાય નમોનમઃ ॥

અંબાયાઃ પરમેશાય સર્વોપરિચરાય તે
મૂલસૂક્ષ્મસ્વરૂપાય સ્થૂલસૂક્ષ્માય તે નમઃ ॥

સર્વસંકલ્પશૂન્યાય સર્વસ્માદ્રક્ષિતાય તે
આદિમધ્યાન્તશૂન્યાય ચિત્સંસ્થાય નમોનમઃ ॥

યમાગ્નિવાયુરુદ્રાંબુ સોમશક્રનિશાચરૈઃ
દિઙ્મુખે દિઙ્મુખે નિત્યં સગણૈઃ પૂજિતાય તે ॥

સર્વેષુ સર્વદા સર્વ માર્ગે સમ્પૂજિતાય તે
રુદ્રાય રુદ્રનીલાય કદ્રુદ્રાય પ્રચેતસે
મહેશ્વરાય ધીરાય નમઃ સાક્ષાચ્છિવાય તે ॥

મખમદનયમાગ્નિદક્ષયજ્ઞક્ષપણવિચિત્રવિચેષ્ટિતં ક્ષમસ્વ ॥

યઃ પઠેત્તુ સ્તવં ભક્ત્યા શક્રાગ્નિપ્રમુખૈઃ સુરૈઃ
કીર્તિતં શ્રાવયેદ્વિદ્વાન્ સ યાતિ પરમાં ગતિમ્ ॥