Lalitavistara · અધ્યાય 20

ઇતિ ॥
॥ ઇતિ શ્રીલલિતવિસ્તરે બોધિમણ્ડગમનપરિવર્તો નામ એકોનવિંશતિતમો ઽધ્યાયઃ ॥
સ્તર્ત્ પરિવર્ત 20
બોધિમણ્ડવ્યૂહપરિવર્તો વિંશતિતમઃ ।
ઇતિ હિ ભિક્ષવો બોધિસત્ત્વસ્ય બોધિમણ્ડનિષણ્ણસ્યં પૂર્વસ્યાં દિશિ ષટ્ કામાવચરા દેવાઃ સ્થિતા અભૂવન્ - મા બોધિસત્ત્વસ્ય કશ્ચિદન્તરાયં કાર્ષીદિતિ । એવં દક્ષિણપશ્ચિમોત્તરા દિશો દેવૈઃ પરિગૃહીતા અભૂવન્ ॥
ઇતિ હિ ભિક્ષવો બોધિસત્ત્વો બોધિમણ્ડનિષણ્ણસ્તસ્યાં વેલાયાં બોધિસત્ત્વસંચોદનીં નામ રશ્મિં પ્રામુઞ્ચત્, યયા રશ્મ્યા સમન્તાદ્દશસુ દિક્ષ્વપ્રમેયાસંખ્યેયાનિ ધર્મધાતુપરમાણ્યાકાશધાતુપર્યવસાનાનિ સર્વબુદ્ધક્ષેત્રાણ્યવભાસિતાન્યભૂવન્ ॥
અથ ખલુ પૂર્વસ્યાં દિશિ વિમલાયાં લોકધાતૌ વિમલપ્રભાસસ્ય તથાગતસ્ય બુદ્ધક્ષેત્રાલ્લલિતવ્યૂહો નામ બોધિસત્ત્વો મહાસત્ત્વસ્તયા પ્રભયા સંચોદિતઃ સન્ ગણનાસમતિક્રાન્તૈશ્ચ બોધિસત્ત્વૈઃ પરિવૃતઃ પુરસ્કૃતો યેન બોધિમણ્ડો યેન ચ બોધિસત્ત્વસ્તેનોપસંક્રામત્ । ઉપસંક્રમ્ય ચ તસ્યાં વેલાયાં બોધિસત્ત્વસ્ય પૂજાકર્મણે તથારૂપમૃદ્ધ્યભિસંસ્કારમભિસમકરોદ્ યેનદ્ધર્યભિસંસ્કારેણાભિસંસ્કૃતેન દશસુ દિક્ષ્વાકાશધાતુપર્યવસાનાનિ સર્વબુદ્ધક્ષેત્રાણ્યેકં મણ્ડલમાત્રમાદર્શયતિ સ્મ શુદ્ધસ્ય નીલવૈડૂર્યસ્ય । પઞ્ચગત્યુપપન્નાનાં સર્વસત્ત્વાનાં પુરતો બોધિમણ્ડે નિષણ્ણં બોધિસત્ત્વમુપદર્શયતિ સ્મ । તે ચ સત્ત્વાઃ પરસ્પરમેકાઙ્ગુલિકાભિર્બોધિસત્ત્વમુપદર્શયન્તિ સ્મ - કો ઽયમેવંરૂપઃ સત્ત્વો લલિતઃ, કો ઽયમેવંરૂપઃ સત્ત્વો વિરાજત ઇતિ । તેષાં ચ સત્ત્વાનાં પુરતો બોધિસત્ત્વો બોધિસત્ત્વાન્નિર્મિમીતે સ્મ । તત્ર તે બોધિસત્ત્વવિગ્રહા ઇમા ગાથા અભાષન્ત -
યસ્યા કિંચન રાગદોષકલુષા સા વાસના ઉદ્ધૃતા
યસ્યા કાયપ્રભાકૃતા દશદિશે સર્વે પ્રભા નિષ્પ્રભાઃ ।
યસ્યા પુણ્યસમાધિજ્ઞાનનિચયઃ કલ્પૌઘસંવર્ધિંતઃ
સો ઽયં શાક્યમુનિર્મહામુનિવરઃ સર્વા દિશો ભ્રાજતે

ઇતિ ॥
અથ ખલુ ભિક્ષવો દક્ષિણસ્યાં દિશિ રત્નવ્યૂહાયા લોકધાતો રત્નાર્ચિષસ્તથાગતસ્ય બુદ્ધક્ષેત્રાદ્રત્નચ્છત્રકૂટસંદર્શનો નામ બોધિસત્ત્વો મહાસત્ત્વસ્તયા પ્રભયા સંચોદિતઃ સન્ ગણનાસમતિક્રાન્તૈર્બોધિસત્ત્વૈઃ પરિવૃતઃ પુરસ્કૃતો યેન બોધિમણ્ડો યેન ચ બોધિસત્ત્વસ્તેનોપસંક્રામત્ । ઉપસંક્રમ્ય બોધિસત્ત્વસ્ય પૂજાકર્મણે એકરત્નછત્રેણ તં સર્વાવન્તં મણ્ડલમાત્રં સંછાદયતિ સ્મ । તત્ર શક્રબ્રહ્મલોકપાલાઃ પરસ્પરમેતદવોચન્ - કસ્યેદં ફલમ્, કેનાયમેવંરૂપો રત્નછત્રવ્યૂહઃ સંદૃશ્યત ઇતિ । અથ તસ્માદ્રત્નછત્રાદિયં ગાથા નિશ્ચરતિ સ્મ -
યેન ચ્છત્રસહસ્રકોટિનયુતા ગન્ધાન રત્નાન ચ
દત્તા અપ્રતિમેષુ મૈત્રમનસા તિષ્ઠન્તિ કે નિર્વૃતે ।
સો એષો વરલક્ષણો હિતકરો નારાયણસ્થામવાન્
બોધેર્મૂલમુપાગતો ગુણધરસ્તસ્યૈષ પૂજા કૃતા

ઇતિ ॥
અથ ખલુ પશ્ચિમાયા દિશશ્ચમ્પકવર્ણાયા લોકધાતોઃ પુષ્પાવલિવનરાજિકુસુમિતાભિજ્ઞસ્ય તથાગતસ્ય બુદ્ધક્ષેત્રાદિન્દ્રજાલી નામ બોધિસત્ત્વો મહાસત્ત્વસ્તયા પ્રભયા સંચોદિતઃ સન્ ગણનાસમતિક્રાન્તૈર્બોધિસત્ત્વૈઃ પરિવૃતઃ પુરસ્કૃતો યેન બોધિમણ્ડો યેન ચ બોધિસત્ત્વસ્તેનોપજગામ । ઉપેત્ય ચ બોધિસત્ત્વસ્ય પૂજાકર્મણે સર્વાવન્તં મણ્ડલમાત્રમેકરત્નજાલેન સંછાદયતિ સ્મ । તત્ર દશસુ દિક્ષુ દેવનાગયક્ષગન્ધર્વાઃ પરસ્પરમેવમાહુઃ - કસ્યાયમેવંરૂપો પ્રભાવ્યૂહ ઇતિ । અથ તસ્માદ્રત્નજાલાદિયં ગાથા નિશ્ચરતિ સ્મ -
રત્નાકરો રતનકેતુ રતિસ્ત્રિલોકે રત્નોત્તમો રતનકીર્તિ રતઃ સુધર્મે ।
રત્નાનિ ત્રીણિ ન ચ છેત્સ્યતિ વીર્યપ્રાપ્તઃ સો બોધિ પ્રાપ્સ્યતિ વરામિય તસ્ય પૂજા

ઇતિ ॥
અથ ખલૂત્તરસ્યાં દિશિ સૂર્યાવર્તાયા લોકધાતોશ્ચન્દ્રસૂર્યજિહ્મીકરપ્રભસ્ય તથાગતસ્ય બુદ્ધક્ષેત્રાદ્વ્યૂહરાજો નામ બોધિસત્ત્વો મહાસત્ત્વસ્તયા પ્રભયા સંચોદિતઃ સન્ ગણનાસમતિક્રાન્તૈર્બોધિસત્ત્વૈઃ પરિવૃતઃ પુરસ્કૃતઃ યેન બોધિમણ્ડો યેન ચ બોધિસત્ત્વસ્તેનોપસંક્રામત્ । ઉપસંક્રમ્ય બોધિસત્ત્વસ્ય પૂજાકર્મણે યાવન્તો દશસુ દિક્ષુ સર્વલોકધાતુષુ બુદ્ધક્ષેત્રગુણવ્યૂહાસ્તાન્ સર્વાંસ્તસ્મિન્ મણ્ડલમાત્રે સંદર્શયતિ સ્મ । તત્ર કેચિદ્બોધિસત્ત્વા એવમાહુઃ - કસ્યેમ એવંરૂપા વ્યૂહાઃ? અથ તેભ્યઃ સર્વવ્યૂહેભ્ય ઇયં ગાથા નિશ્ચરતિ સ્મ -
કાયો યેન વિશોધિતઃ સુબહુશઃ પુણ્યેન જ્ઞાનેન ચ
યેના વાચ વિશોધિતા વ્રતતપૈઃ સત્યેન ધર્મેણ ચ ।
ચિત્તં યેન વિશોધિતં હિરિધૃતી કારુણ્યમૈત્ર્યા તથા
સો એષો દ્રુમરાજમૂલુપગતઃ શાક્યર્ષભઃ પૂજ્યતે

ઇતિ ॥
અથ ખલુ પૂર્વદક્ષિણસ્યા દિશો ગુણાકરાયા લોકધાતોર્ગુણરાજપ્રભાસસ્ય તથાગતસ્ય બુદ્ધક્ષેત્રાદ્રુણમતિર્નામ બોધિસત્ત્વો મહાસત્ત્વસ્તયા પ્રભયા સંચોદિતઃ સન્ ગણનાસમતિક્રાન્તૈર્બોધિસત્ત્વૈઃ પરિવૃતઃ પુરસ્કૃતો યેન બોધિમણ્ડો યેન ચ બોધિસત્ત્વસ્તેનોપસંક્રામત્ । ઉપસંક્રમ્ય બોધિસત્ત્વસ્ય પૂજાકર્મણે સર્વગુણવ્યૂહં કૂટાગારં તસ્મિન્ મણ્ડલમાત્રે ઽભિનિર્મિમીતે સ્મ । તસ્ય તે પરિવારા એવમાહુઃ - કસ્યાયમેવંરૂપઃ કૂટાગારવ્યૂહઃ? તતશ્ચ કૂટાગારાદિયં ગાથા નિશ્ચરતિ સ્મ -
યસ્ય ગુણૈઃ સતતં ગુણગન્ધિકા ભોન્તિ સુરાસુર યક્ષ મહોરગાઃ ।
સો ગુણવાન્ ગુણરાજકુલોદિતો બોધિવિટપે ઉપવિષ્ટુ ગુણોદધિઃ

ઇતિ ॥
અથ ખલુ દક્ષિણપશ્ચિમાયા દિશો રત્નસંભવાયા લોકધાતો રત્નયષ્ટેસ્તથાગતસ્ય બુદ્ધક્ષેત્રાદ્રત્નસંભવો નામ બોધિસત્ત્વો મહાસત્ત્વસ્તયા પ્રભયા સંચોદિતઃ સન્ ગણનાસમતિક્રાન્તૈર્બોધિસત્ત્વૈઃ પરિવૃતઃ પુરસ્કૃતો યેન બોધિમણ્ડો યેન ચ બોધિસત્ત્વસ્તેનોપસંક્રામત્ । ઉપસંક્રમ્ય બોધિસત્ત્વસ્ય પૂજાકર્મણે અપ્રમેયાસંખ્યેયાન્ રત્નવ્યોમકાંસ્તસ્મિન્મણ્ડલમાત્રે ઽભિનિર્મિમીતે સ્મ । તેભ્યશ્ચ રત્નવ્યોમકેભ્ય ઇયં ગાથા નિશ્ચચાર -
ત્યક્તા યેન સસાગરા વસુમતી રત્નાન્યથો ઽનેકશઃ
પ્રાસાદાશ્ચ ગવાક્ષહર્મિકવરા યુગ્યાનિ યાનાનિ ચ ।
વ્યોમાલંકૃત પુષ્પદામ રુચિરા ઉદ્યાન કૂપા સભા
હસ્તા પાદ શિરોત્તમાઙ્ગનયનાઃ સો બોધિમણ્ડે સ્થિતઃ

ઇતિ ॥
અથ ખલુ પશ્ચિમોત્તરસ્યા દિશો મેઘવત્યા લોકધાતોર્મેઘરાજસ્ય તથાગતસ્ય બુદ્ધક્ષેત્રાન્મેઘકૂટાભિગર્જિતસ્વરો નામ બોધિસત્ત્વો મહાસત્ત્વસ્તયા પ્રભયા સંચોદિતઃ સન્ ગણનાસમતિક્રાન્તૈર્બોધિસત્ત્વૈઃ પરિવૃતઃ પુરસ્કૃતો યેન બોધિમણ્ડો યેન ચ બોધિસત્ત્વસ્તેનોપસંક્રામત્ । ઉપસંક્રમ્ય બોધિસત્ત્વસ્ય પૂજાકર્મણે કાલાનુસાર્યગુરુમેઘમભિનિર્માયોરગસારચન્દનચૂર્ણવર્ષં તસ્મિન્ મણ્ડલમાત્રે ઽભિપ્રવર્ષતિ સ્મ । તસ્માચ્ચ કાલાનુસારિમેઘમણ્ડલમાત્રાદિયં ગાથા નિશ્ચરતિ સ્મ -
ધર્મામેઘ સ્ફુરિત્વ સર્વત્રિભવે વિદ્યાધિમુક્તપ્રભઃ
સદ્ધર્મં ચ વિરાગ વર્ષિં અમૃતં નિર્વાણસંપ્રાપકમ્ ।
સર્વા રાગકિલેશબન્ધનલતા સો વાસના છેત્સ્યતિ
ધ્યાનર્દ્ધીબલૈન્દ્રિયૈઃ કુસુમિતઃ શ્રદ્ધાકરં દાસ્યતે

ઇતિ ॥
અથ ખલૂત્તરપૂર્વસ્યા દિશો હેમજાલપ્રતિછન્નાયા લોકધાતો રત્નચ્છત્રાભ્યુદ્ગતાવભાસસ્ય તથાગતસ્ય બુદ્ધક્ષેત્રાદ્ધેમજાલાલંકૃતો નામ બોધિસત્ત્વો મહાસત્ત્વસ્તયાપ્રભયા સંચોદિતઃ સન્ ગણનાસમતિક્રાન્તૈર્બોધિસત્ત્વૈઃ પરિવૃતઃ પુરસ્કૃતો યેન બોધિમણ્ડો યેન ચ બોધિસત્ત્વસ્તેનોપસંક્રામત્ । ઉપસંક્રમ્ય બોધિસત્ત્વસ્ય પૂજાકર્મણે સર્વેષુ તેષુ કૂટાગારેષુ રત્નવ્યોમકેષુ દ્વાત્રિંશલ્લક્ષણસમલંકૃતાન્ બોધિસત્ત્વવિગ્રહાનભિનિર્મિમીતે સ્મ । સર્વે ચ તે બોધિસત્ત્વવિગ્રહા દિવ્યમાનુષ્યકપુષ્પદામપરિગૃહીતા યેન બોધિસત્ત્વસ્તેનાભિનતકાયાસ્તાનિ પુષ્પદામાન્યભિપ્રલમ્બયન્તિ સ્મ । તે ઇમાં ગાથામભાષન્ત -
યેન બુદ્ધનયુતા સ્તવિત પૂર્વ ગૌરવેણ મહતા જનિય શ્રદ્ધામ્ ।
બ્રહ્મઘોષવચનં મધુરવાણિં બોધિમણ્ડોપગતં શિરસિ વન્દે

ઇતિ ॥
અથ ખલ્વધસ્તાદ્દિશઃ સમન્તવિલોકિતાયા લોકધાતોઃ સમન્તદર્શિનસ્તથાગતસ્ય બુદ્ધક્ષેત્રાદ્રત્નગર્ભો નામ બોધિસત્ત્વો મહાસત્ત્વસ્તયા પ્રભયા સંચોદિતઃ સન્ ગણનાસમતિક્રાન્તૈર્બોધિસત્ત્વૈઃ પરિવૃતઃ પુરસ્કૃતો યેન બોધિમણ્ડો યેન ચ બોધિસત્ત્વસ્તેનોપસંક્રામત્ । ઉપસંક્રમ્ય બોધિસત્ત્વસ્ય પૂજાકર્મણે તસ્મિન્ વૈદૂર્યમયમણ્ડલમાત્રે જામ્બૂનદસુવર્ણપદ્માન્યભ્યુદ્ગતાન્યુપદર્શયતિ સ્મ । તેષાં ચ પદ્માનાં કર્ણિકાસ્વર્ધકાયિકા નાર્યો વર્ણરૂપસંપન્નાઃ સર્વાલંકારપ્રતિમણ્ડિતા ઉપદર્શયતિ સ્મ । વામદક્ષિણે પાણિભિર્હર્ષકટકકેયૂરસુવર્ણસૂત્રમુક્તાહારાદિવિવિધાભરણપરિગૃહીતાઃ પુષ્પપટ્ટદામાનિ ચાભિપ્રલમ્બયન્ત્યો યેન બોધિમણ્ડો યેન ચ બોધિસત્ત્વસ્તેનોપર્યભિનતકાયાઃ । તાશ્ચેમાં ગાથામભાષન્ત -
યો ઓનમિષ્ટ સદા ગુરૂણાં બુદ્ધશ્રાવકપ્રત્યેકજિનાનામ્ ।
નિર્માણસુશીલ સદોજ્જુ પ્રષ્ઠો તસ્યા ઓનમથા ગુણધરસ્ય

ઇતિ ॥
અથ ખલૂપરિષ્ટાદ્દિશો વરગગનાયા લોકધાતોર્ગણેન્દ્રસ્ય તથાગતસ્ય બુદ્ધક્ષેત્રાદ્ગગનગઞ્જો નામ બોધિસત્ત્વો મહાસત્ત્વસ્તયા પ્રભયા સંચોદિતઃ સન્ ગણનાસમતિક્રાન્તૈર્બોધિસત્ત્વૈઃ પરિવૃતઃ પુરસ્કૃતો યેન બોધિમણ્ડો યેન ચ બોધિસત્ત્વસ્તેનોપસંક્રામત્ । ઉપસંક્રમ્ય બોધિસત્ત્વસ્ય પૂજાકર્મણે ગગનતલસ્થ એવ યાવન્તો દશસુ દિક્ષુ સર્વબુદ્ધક્ષેત્રેષ્વદૃષ્ટાશ્રુતપૂર્વાઃ સન્તિ પુષ્પધૂપગન્ધમાલ્યવિલેપનચૂર્ણચીવરવસ્ત્રાલંકારછત્રધ્વજપતાકાવૈજયન્તિરત્ન્ - અમણિકનકરજતમુક્તાહારહયગજરથપત્તિવાહનપુષ્પવૃક્ષપત્રપુષ્પફલદારકદારિકા દેવનાગયક્ષગન્ધર્વાસુરગરુડકિન્નરમહોરગશક્રબ્રહ્મલોકપાલમાનુષ્યામાનુષ્યાણાં સર્વા ગગનતલાન્મહાન્તં પુષ્પવર્ષમભિપ્રવર્ષન્તિ સ્મ સર્વસત્ત્વપ્રીતિસુખસંજનનં ચ । ન ચ કસ્યચિત્સત્ત્વસ્ય ભયં ચોત્પીડાં વા કરોતિ સ્મ ॥
તત્રેદમુચ્યતે -
પેયાલમેષ દિશતાસુ જિનૌરસા યે સંપૂજિતું હિતકરં અનુપ્રાપ્ત બોધિમ્ ।
તેષાં વિયૂહક્રમવિક્રમસુક્રમાણાં ઓપમ્યમાત્ર નિશૃણોથ જિનૌરસાનામ્

કે ચાગતા નભસિ મેઘ ઇવ સ્તનન્તો હારા સહસ્રનયુતાનિ પ્રલમ્બયન્તઃ ।
કે ચાગતા મકુટરત્નવિલમ્બચૂડાઃ પૌષ્પં વિમાન ગગને ઉપદર્શયન્તઃ

કે ચાગતા ધરણિસિંહ ઇવા નદન્તઃ શૂન્યાનિમિત્તપ્રણિધીરવમુઞ્ચમાનાઃ ।
કે ચાગતા યથ વૃષા અભિનન્દમાનાઃ ન ચ દૃષ્ટપૂર્વ રુચિરાણિ ક્ષિપન્તિ પુષ્પાં

કે ચાગતા નભસિ સાર ઇવા રવન્તો વર્ણાસહસ્ર સ્વકિ આત્મનિ દર્શયન્તઃ ।
કે ચાગતા શશિરિવા ગગને સુપૂર્ણાઃ સુગતાત્મજસ્ય ગુણમાલમુદીરયન્તઃ

કે ચાગતા રવિરિવ પ્રભ મુઞ્ચમાનાઃ સર્વાણિ મારભવનાનિ કરોન્તિ જિહ્મા ।
કે ચાગતા વિમલકેતુ યથેન્દ્રયષ્ટ્યઃ સંભારપુણ્યનિચિતાસ્તહિ બોધિમણ્ડે

કેચિત્ક્ષિપન્તિ ગગનાન્મણિરત્નજાલા ચન્દ્રા સુચન્દ્ર તથ બાલ વિરોચમાના ।
માન્દારવા સુમનવાર્ષિકચમ્પદામા સંબોધિસત્ત્વ દ્રુમરાજસ્થિતે ક્ષિપન્તિ

કે ચાગતા ધરણિ કમ્પયમાન પદ્ભ્યાં સંકમ્પિતા વસુધ પ્રીતિકરી જનસ્ય ।
કે ચાગતા ગ્રહિય મેરુ કરેતલેભિઃ ઉત્સૃષ્ટપુષ્પપુટ સંસ્થિત અન્તરીક્ષે

કે ચાગતાશ્ચતુરિ સાગર ગૃહ્ય મૂર્ધ્ના ઉત્સૃષ્ટ સિઞ્ચિ વસુધાં વરગન્ધતોયૈઃ ।
કે ચાગતા રતનયષ્ટિ ગૃહીત્વ ચિત્રં સંબોધિસત્ત્વમુપદર્શય સ્થિત્વ દૂરે

કે ચાગતા ભવિય બ્રહ્મ પ્રશાન્તરૂપાઃ શાન્તા પ્રશાન્તમનસઃ સ્થિત ધ્યાનધ્યાયી ।
રોમેભિ તેષ સ્વરુ નિશ્ચરતે મનોજ્ઞ મૈત્રીઉપેક્ષકરુણામુદિતાપ્રમાણા

કે ચાગતા મરુત શક્ર ઇવા યથૈવ દેવૈઃ સહસ્રનયુતૈશ્ચ પુરાકૃતાસ્તે ।
ઉપગમ્ય બોધિવટુ ગૃહ્ય કૃતાઞ્જલીભિઃ શક્રાભિલગ્ન મણિરત્ન ક્ષિપન્તિ ચિત્રા

કે ચાગતાશ્ચતુદિશા ચ યથૈવ પાલા ગન્ધર્વરાક્ષસપરીવૃત કિન્નરેભિઃ ।
વિદ્યુત્સ્ફુટાન્ત કુસુમાનિ પ્રવર્ષમાણાઃ ગન્ધર્વકિન્નરરૂતેન સ્તુવન્તિ વીરમ્

કે ચાગતાઃ કુસુમિતાં પ્રગૃહીત્વ વૃક્ષાન્ સફલાં સપુષ્પવરગન્ધ પ્રમુઞ્ચમાનાં ।
જાતેષુ તેષુ સ્થિત બુદ્ધ શુદ્ધકાયાઃ અવલમ્બમાન પ્રતિમણ્ડિ ક્ષિપન્તિ પુષ્પા

કે ચાગતાઃ કુસુમિતાઃ પુડિની ગૃહીત્વા પદ્મોત્પલૈઃ કુસુમિતૈસ્તથ પુણ્ડરીકૈઃ ।
દ્વાત્રિંશલક્ષણધરાઃ સ્થિત પદ્મગર્ભે સ્તવિષ્ટ અલિપ્તમનસં વિદુ બોધિસત્ત્વમ્

કે ચાગતા વિપુલકાય તથેવ મેરુ સ્થિત્વાન્તરીક્ષ સ્વકમાત્મનમુત્સૃજન્તિ ।
ઉત્સૃજ્યમાત્ર ભવિયા નવપુષ્પદામાઃ સંછાદયન્તિ ત્રિસહસ્રિ જિનસ્ય ક્ષેત્રમ્

કે ચાગતા ઉભયચક્ષુષિ કલ્પદાહં સંદર્શયન્ત વિભવં તથ સંભવં ચ ।
તેષાં શરીરિ બહુધર્મસુખા રણન્તિ તાં શ્રુત્વ સત્ત્વનયુતા પ્રજહન્તિ તૃષ્ણામ્

કે ચાગતા રવિતકિન્નરતુલ્યઘોષાઃ બિમ્બોષ્ઠચારુવદનાઃ પરિપૂર્ણવક્ત્રાઃ ।
કન્યા યથૈવ સુઅલંકૃત ચિત્રહારાઃ પ્રેક્ષન્ત યાં સુરગણા ન લભન્તિ તૃપ્તિમ્

કે ચાગતા વજિરકાય ઇવા અભેદ્યાઃ હેષ્ઠા પસ્કન્ધચરણૈઃ પ્રતિગ્રાહ્યમાણાઃ ।
કે ચાગતા રવિરિવા શશિપૂર્ણવક્ત્રાઃ જ્યોત્સ્નાકરાઃ પ્રભકરા હતક્લેશદોષાઃ

કે ચાગતા રતનમણ્ડિત રત્નપાણી સંછાદયિત્વ બહુક્ષેત્રસહસ્રકોટ્યઃ ।
વર્ષન્તિ રત્નવર પુષ્પ સુગન્ધગન્ધા સંતોષણાર્થં બહુસત્ત્વહિતં સુખાર્થમ્

કે ચાગતા મહતિ ધારણિ રત્નકોશાઃ રોમેભિ સૂત્રનયુતાનિ પ્રભાષમાણાઃ ।
પ્રતિભાનવન્ત મતિવન્ત સુબુદ્ધિવન્તો મત્તપ્રમત્તજનતાં પ્રતિબોધયન્તઃ

કે ચાગતા ગ્રહિય ભેરિ યથૈવ મેરુ આકોટ્યમાનુ ગગને સુમનોજ્ઞઘોષામ્ ।
યસ્યા રવં દશદિશે વ્રજિ ક્ષેત્રકોટ્યા અદ્યાવબોદ્ધુમમતં અનુબુદ્ધિ શાસ્તા