લક્ષ્મીતન્ત્રમ્ · અધ્યાય 46

ષટ્‌ચત્વારિંશોઽધ્યાયઃ - 46
શ્રીઃ---
અનુક્રમેણ દેવેશ લક્ષ્મ્યાદીનાં ચ સાધનમ્।
વિવિધાનિ ચ કર્માણિ તન્મન્ત્રેભ્યોઽવધારય

1. આદિશબ્દેન કીર્તિજયામાયા ગૃહ્યન્તે।
ચતુરશ્રં ચતુર્દ્વારં કૃત્વા પૂર્વોદિતં પુરમ્।
તન્મધ્યેઽષ્ટદલં પદ્મં લિખેચ્છુક્લારુણપ્રભમ્

2. પુરનિર્માણમાહ---ચતુરશ્રમિત્યાદિના।
સિતાનિ ચતુરાલિખ્ય કોણેષુ સ્વસ્તિકાનિ ચ।
વ્યાપકત્વેન તુ પુરા મણિબન્ધમુખાદિતઃ

વિન્યસ્ય મૂલમન્ત્રં ચ હસ્તે દેહે ચ કેવલમ્।
પશ્ચાદાદૌ ચ હસ્તાભ્યાં લક્ષ્મીમન્ત્રં તથા ન્યસેત્

તદઙ્ગાનિ ચ વિન્યસ્ય હસ્તે દેહે યથા પુરા।
તસ્યાનુગચતુષ્કં યદ્દેવીનાં તદનુ ન્યસેત્

5. અનુગેતિ। ઋદ્ધ્યાદિચતુષ્કમન્ત્રમિત્યર્થઃ।
પ્રદેશિન્યાદિતો હસ્તદ્વયે તદનુ વિગ્રહે।
ઉત્તમાઙ્ગે તુ હૃન્મધ્ય ઊર્વોર્જાનુદ્વયે તથા

લાવણ્યાદ્યાંશ્ચ ચતુરો હ્યનામાદિ કરદ્વયે।
અઙ્ગુષ્ઠાન્તં ચ વિન્યસ્ય હસ્તે દેહે ચ વાસવ

7. અનુચરમન્ત્રાણાં ન્યાસમાહ---લાવણ્યાદ્યાનિતિ।
દક્ષિણે ચ તથા વામે સ્કન્ધે પક્ષદ્વયે તતઃ।
ન્યાસં કૃત્વા યથાન્યાયં શ્રીકામોઽથ યજેદ્ધૃદિ

લયયાગપ્રયોગેણ લક્ષ્મીમન્ત્રં તુ કેવલમ્।
કૃત્વાવલોકનાદ્યં તુ તો બાહ્યે તુ વિન્યસેત્

મૂતિમન્ત્રયુતં મૂલં કર્ણિકોપરિ વાસવ।
સકલાકલદેહં ચ સર્વમન્ત્રાન્વિતં વિભુમ્

10. કર્ણિકોપરીતિ। અષ્ટદલપદ્મકર્ણિકોપરીત્યર્થઃ। અકલો નિષ્કલઃ।
તદુત્સઙ્ગગતાં લક્ષ્મીં સ્વમન્ત્રેણાવતાર્ય ચ।
પૂર્વોક્તધ્યાનસંયુક્તો ભોગમોક્ષપ્રસિદ્ધયે

તદાગ્નેયે તદીશાને યાતવીયેઽથ વાયવે।
ચત્વારિ હૃદયાદીનિ નેત્રં કેસરસંતતૌ

તદગ્રે દક્ષિણે પૃષ્ઠે વામપાર્શ્વે ક્રમાન્ન્યસેત્।
ચતુષ્ટયં તુ ઋદ્ધ્યાદ્યં દ્વિભુજં તુ તથાકૃતિ

પદ્મગૌરપ્રતીકાશં શ્રીવૃક્ષચમરાઙ્કિતમ્।
પદ્માસનેનોપવિષ્ટં પ્રેક્ષમાણં તદાનનમ્

સ્વસ્તિકાનાં તદીશાદિકોણસ્થાને નિવેશ્ય તુ।
લાવણ્યાદ્યચતુષ્કં તુ સૌમ્યવક્ત્રં ચતુર્ભુજમ્

નીલકૌશેયવસનં પદ્મકુમ્ભકરાન્વિતમ્।
નલિનીધ્વજહસ્તં ચ સફલામલવૃક્ષધૃત્

દ્વારેષ્વસ્રં ચતુર્દિક્ષુ ન્યસ્ય પૂજ્ય યથા પુરા।
મૂલમન્ત્રયુતાં દેવીં લક્ષ્મીં ત્રિદશનન્દન

મુદ્રાસ્ચ દર્શયેત્ સર્વા યત્ર યત્ર હિ યાઃ સ્મૃતાઃ।
જપ્ત્વા કૃત્વા તતો હોમં સઘૃતૈસ્તુ તિલાક્ષતૈઃ

સામલૈઃ શ્રીફલૈશ્ચૈવ સતિ લાભે તુ પઙ્કજૈઃ।
યથાશક્તિ હ્યસંક્યૈસ્તુ હોમાન્તે વૃત્રસૂદન

લક્ષ્મીરૂપસ્તતો બૂત્વા સાધકઃ કૃતનિશ્ચયઃ।
જપેલ્લક્ષાણિ વૈ પઞ્ચ શુદ્ધાહારો જિતેન્દ્રિયઃ

હોમં કુર્યાજ્જપાન્તે તુ ક્રમાદ્બિલ્વામલામ્બુજૈઃ।
યથાશક્તિ હ્યસંખ્યૈસ્તુ અયુતાયુતસંખ્યયા

દદાતિ દર્શનં શક્ર હોમાન્તે પરમેશ્વરી।
પુત્ર સિદ્ધાસ્મિ તે બ્રૂહિ યત્તે મનસિ ચેપ્સિતમ્

કુરુ કાર્યાણ્યભીષ્ટાનિ મન્મન્ત્રેણાખિલાનિ ચ।
અદ્ય પ્રભૃતિ નિઃશઙ્કો દ્વન્દ્વોપદ્રવવર્જિતઃ

એવમુક્ત્વા તુ સા દેવી યાતિ યત્રાગતાશુ વૈ।
તતઃ કર્માણિ વૈ કુર્યાલ્લક્ષ્મ્યા અનુમતે મમ

સ એષ તુષ્ટોઽભીષ્ટં તુ શ્રિયં દદ્યાદ્યથાર્થિનામ્।
સંક્રુદ્ધો નિર્ધનં કુર્યાદ્વાઙ્માત્રેણ ધનેશ્વરમ્

શુલ્બં કુર્યાત્ સકૃદ્ધ્યાયન્ મન્ત્રજાપાચ્ચ હાટકમ્।
પૂરયિત્વામ્ભસા કુમ્ભં ક્ષીરેણ મધુનાથવા

નિધાય દક્ષિણે હસ્તે વામં તદુપરિ ન્યસેત્।
શતમષ્ટાધિકં મન્ત્રં જપેદ્ધ્યાનસમન્વિતમ્

રસેન્દ્રાભિનિવેશસ્થો હ્યેકચિત્તઃ સમાહિતઃ।
રસેન્દ્રત્વં સમાયાતિ તત્કુમ્ભે ત્વાહૃતં જલમ્

સરસો લક્ષવેધી સ્યાચ્છસ્રાદીનાં પુરંદર।
કરોતિ કાયમમરં જરારોગવિવર્જિતમ્

અઙ્ગુષ્ઠાકારમાત્રં તુ પુરા પાષાણમાહરેત્।
દક્ષિણોદરહસ્તેન વામેન બદરીસમમ્

અભિમન્ત્ર્ય તુ તૌ મુષ્ટી દ્વે શતે ષોઢશાધિકે।
દક્ષિણસ્થં તુ પાષાણં રત્નત્વમુપયાતિ ચ

વામે મુક્તાફલત્વં ચ મહામૂલ્યે તુ તે ઉભે।
યદ્યદિચ્છતિ જાત્યા વૈ તત્તદ્રત્નં ભવેત્તદા

તથા મુક્તાફલં તત્તત્ પ્રતિભાતિ કરોતિ ચ।
ગોગજાશ્વસમુદ્ધૂતમસ્થિ ચાદાય પાણિના

શતાર્ધં મન્ત્રિતં કૃત્વા પ્રવાલત્વં પ્રયાતિ તત્।
શતાભિમન્ત્રિતં કૃત્વા ત્રપુ સીસં તથાયસમ્

34. કૃત્વેતિ। ધારયતિ ચેદિતિ શેષઃ।
જાયતે કલધૌતં તુ રજતં વાતિનિર્મલમ્।
યદ્યદ્ ગૃહીત્વા દેવેન્દ્ર યં યં ધાતું સમીહતે

ક્રુદ્ધો વા પરિતુષ્ટસ્ચ તત્તત્ કુર્યાત્તુ સોઽન્યથા।
એવમશ્મમયાનાં તુ અન્યત્વમુપપદ્યતે

યા યા મનસિ વૈ યસ્ય વિભૂતિઃ પ્રતિભાતિ ચ।
તાં તાં દદાતિ તસ્યાશુ ધનધાન્યગવાદિકામ્

લિખિત્વા ભૂર્જપત્રે તુ યાગન્યાસક્રમેણ તુ।
રોચનાકુઙ્કુમાભ્યાં તુ સંધારયતિ યઃ સદા

38. રોચનાકુઙ્કુમાભ્યામિતિ। લિખિત્વેતિ પૂર્વેણાન્વયઃ।
સુવર્ણવેષ્ટિતં ચાઙ્ગે લક્ષ્મીમન્ત્રં શતક્રતો।
તસ્યાયુષો ભવેદ્ વૃદ્ધિઃ સર્વત્ર વિજયી મહાન્

પ્રાપ્નુયાન્મહતીં પૂજાં યત્ર યત્ર ચ સંવિશેત્।
ઇદમારાધનં પ્રોક્તં શ્રીકામાનાં વિશેષતઃ।
લક્ષ્મ્યાસ્રિદશશાર્દૂલ મમ યા પ્રથમા તનુઃ

ઇતિ શ્રીપાઞ્ચરાત્રસારે લક્ષ્મીતન્ત્રે લક્ષ્મીમન્ત્રસિદ્ધિપ્રકાશો નામ ષટ્‌ચત્વારિંશોઽઘ્યાયઃ
********ઇતિ ષટ્‌ચત્વારિંશોઽધ્યાયઃ********